قىتايداعى ورتتەن كەلگەن شىعىن قانشا بولعانى بەلگىلى بولدى

استانا. قازاقپارات - 2025 -جىلدىڭ ءبىرىنشى جارتىجىلدىعىندا قىتايدا 552 مىڭ ءورت وقيعاسى تىركەلدى، دەپ حابارلايدى Kazinform اگەنتتىگى ق ح ر توتەنشە جاعدايلار مينيسترلىگىنە قاراستى ءورت قاۋىپسىزدىگى جانە قۇتقارۋ باسقارماسىنا سىلتەمە جاساپ.

قاڭتار مەن ماۋسىم ارالىعىندا ەلدىڭ ءورت ءسوندىرۋ جانە قۇتقارۋ بولىمشەلەرى 1,242 ميلليون شاقىرتۋعا شىققان. بۇل وتكەن جىلدىڭ سايكەس كەزەڭىمەن سالىستىرعاندا 7,7 پايىزعا كوپ. جۇرگىزىلگەن وپەراتسيالاردىڭ ناتيجەسىندە 98 مىڭ ادام قۇتقارىلىپ، تاعى 47 مىڭ ادام ەۆاكۋاتسيالانعان. الايدا 1084 ادام قازا تاۋىپ، 1149 ادام ءارتۇرلى دارەجەدەگى جاراقات العان.

باسپا ءسوز بريفينگىندە باسقارمانىڭ رەسمي وكىلى ليۋ جيان ءورت سانىنىڭ وتكەن جىلمەن سالىستىرعاندا وزگەرىسسىز قالعانىن، ياعني نەبارى 0,04 پايىزعا ارتقانىن ايتتى. سونىمەن قاتار، ونىڭ ايتۋىنشا، قازا تاپقاندار سانى 6,2 پايىزعا، جاراقات العاندار سانى 16,9 پايىزعا ازايعان.

جارتى جىل ىشىندە ورتتەن كەلگەن تىكەلەي ەكونوميكالىق شىعىن 4,08 ميلليارد يۋان (شامامەن 571,6 ميلليون دوللار نەمەسە 299,2 ميلليارد تەڭگە) بولعان. بۇل كورسەتكىش 2024 -جىلدىڭ سايكەس كەزەڭىمەن سالىستىرعاندا 9,3 پايىزعا تومەن.

ۆەدومستۆو مالىمەتىنشە، ورتتەردىڭ نەگىزگى سەبەپتەرى - ەلەكتر جەلىلەرىندەگى اقاۋلار، تۇرمىستا وتپەن ابايسىز ارەكەت جاساۋ، تەمەكى شەگۋ جانە قاراۋسىز قالعان اشىق وت كوزدەرى.

قىتايدىڭ ورتكە قارسى جانە قۇتقارۋ قىزمەتتەرى ءورت قاۋپىن ازايتۋعا باعىتتالعان كەشەندى شارالاردى جۇزەگە اسىرۋدى جالعاستىرىپ جاتىر. اسىرەسە، اۋىلدىق جەرلەر مەن شاعىن كوممەرتسيالىق نىساندارداعى ءورتتىڭ الدىن الۋعا ەرەكشە ءمان بەرىلۋدە، سەبەبى بۇل ايماقتاردا ءورت شىعۋ قاۋپى جوعارى.