قىتايداعى تۋرنيردە 4 تاەكۆوندوشىمىز ليتسەنزياعا تالاسادى

استانا. KAZINFORM - قىتايدىڭ تايان قالاسىندا 15-16- ناۋرىز ارالىعىندا تاەكۆوندودان پاريجگە جولداما تاراتاتىن ازيا ايماقتىق ىرىكتەۋ تۋرنيرى وتەدى.

قازاقستان قۇراماسىنان 4 سپورتشى ليتسەنزياعا تالاسادى. جالپى بۇل دوداعا 33 ەلدەن كەلگەن 96 سپورتشى قاتىسادى.

اتاپ ايتار بولساق، 57 كەلى سالماق دارەجەسىندە سپارتاكيادا جەڭىمپازى ماريا سيەۆوستيانوۆا، 58 كەلىدە قازاقستان كومانداسىنىڭ مۇشەسى ساميرحون اباباكيروۆ، 67+ كەلى سالماقتا ازيا ويىندارىنىڭ ەكى دۇركىن جۇلدەگەرى جانسەل دەنيز جانە 80 كەلىدە جاستار اراسىنداعى الەم چەمپيوناتىنىڭ قولا جۇلدەگەرى، سپارتاكيادا جەڭىمپازى باتىرحان تولەۋعالي بايراقتى باسەكەدە ەل نامىسىن قورعايدى.

ايتا كەتەيىك، بۇل سپورتتىق باسەكەدە ءار سالماقتا فينالعا شىققان سپورتشىلارعا ليتسەنزيا بەرىلەدى.