قىتايداعى تۋرنير: تاەكۆوندوشى باتىرحان تولەۋعالي جارتىلاي فينالعا شىقتى

турнир
فوتو: شامكەن بايىربەك

استانا. KAZINFORM - بۇگىن قىتايدىڭ تايان قالاسىندا باستالعان تاەكۆوندودان پاريجگە جولداما تاراتاتىن ازيا ايماقتىق ىرىكتەۋ تۋرنيرىندە ەل نامىسىن قورعايتىن 17 جاسار وتانداسىمىز باتىرحان تولەۋعالي العاشقى جەكپە-جەگىن وتكىزدى.

قازاقستاندىق سپورتشى تۋرنيردەگى ءبىرىنشى قارسىلاسى اكشاي حۋدانى (ءۇندىستان) ايقىن باسىمدىقپەن جەڭىپ، كەلەسى كەزەڭگە جولداما الدى.

ەندى ۇلتتىق قۇراما سپورتشىسى جارتىلاي فينالدا ساۋد ارابياسىنىڭ تاەكۆوندوشىسى ءالي مابرۋك ءال-مابرۋكپەن پاريج وليمپياداسىنىڭ ليتسەنزياسىن ساراپقا سالادى.

ەستەرىڭىزگە سالا كەتەيىك، قىتايدىڭ تايان قالاسىندا وليمپياداعا ليتسەنزيا بەرىلەتىن ازيا قۇرلىعىنىڭ سوڭعى ىرىكتەۋ تۋرنيرى ءوتىپ جاتىر. اتالعان تۋرنيردە ەل نامىسىن ءتورت سپورتشىمىز قورعاۋدا.

ونىڭ ءبىرى - 17 جاسار باتىرحان تولەۋعال بولسا، ەكىنشىسى 19 جاسار ماريا سيەۆوستيانوۆا. ءۇشىنشى سپورتشىمىز 58 كەلى سالماقتا ەل نامىسىن قورعايتىن ساميرحون اباباكيروۆ. ال ءتورتىنشى سپورتشىمىز قۇراما ۇزدىگى جانسەل دەنيز.

جوعارىداعى 4 سپورتشىنىڭ ىشىندە جانسەلدەن باسقاسى العاش رەت وليمپيادا ليتسەنزياسى ءۇشىن تالاسۋدا. دەنيز ريو (2016 ج) مەن توكيو وليمپياداسىنا (2021 ج) قاتىسقان.

قىتايداعى جارىستا پاريج وليمپياداسىنىڭ جولداماسىنا ءار سالماقتا فينالعا شىققان ەكى سپورتشى يە بولادى. بارلىعى تۋرنيردە 33 مەملەكەتتەن كەلگەن تاڭداۋلى 96 تاەكۆوندوشى كۇش سىناسادى.

اۆتور
كۇنسۇلتان وتارباي

سوڭعى جاڭالىقتار