قىتايداعى قازاق شيپاحاناسى 1-دارەجەلى سىيلىققا يە بولدى - شەتەلدەگى قازاق باسپا ءسوزى
«قازاقپارات» ح ا ا شەت ەلدەردە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
«التايدىڭ اۋاسى» ساتىلىمعا شىقتى - CNR
شاڭعى تەبۋ ماۋسىمىنىڭ باستالۋىنا وراي التاي قالاسى گەنارال تاۋى حالىقارالىق قار شاڭعى دەمالىس اۋدانىندا سيۋەدۋ پوشتا مەكەمەسى ىسكە قوسىلىپ، رەسمي تۇردە التايدىڭ اۋاسىن ساتۋ جۇمىسىن باستادى، دەپ حابارلايدى قىتايدىڭ «ورتالىق حالىق راديوسى» اقپارات پورتالى.
اتالعان ب ا ق-تىڭ مالىمەتىنشە، بۇل اۋانى جەدەل جولداما ارقىلى جولدايتىن ەلدەگى تۇڭعىش پوشتا مەكەمەسى ەسەپتەلەدى.
6-جەلتوقساندا سيۋەدۋ پوشتا بولىمشەسىنىڭ ۇجىمى «التاي اۋاسى» كونسەرۆىلەنگەن ونىمدەرىن تانىستىردى.
التاي ايماقتىق پوشتا باسقارۋ مەكەمەسىنىڭ مالىمەتىنشە، اۋانى قىتايدىڭ جەر-جەرىنە جەدەل جولداما ارقىلى جەتكىزۋ قۇرلىق جانە اۋە جولى ارقىلى ىسكە اسادى.
قىتايداعى قازاق شيپاحاناسى 1-دارەجەلى سىيلىققا يە بولدى - ukilialtay
جاقىندا قىتاي ەتنيكالىق مەديتسينا قاۋىمداستىعىنىڭ ءۇشىنشى سەسسياسىنىڭ ەكىنشى كەڭەس وتىرىسى ءوتىپ، قىتاي ەتنيكالىق مەديتسينا قاۋىمداستىعىنىڭ عىلىم جانە تەحنولوگيا سىيلىعى تابىس ەتىلدى.
بەيجىڭدە وتكەن اكادەميكتەر مەن ءداستۇرلى قىتاي مەديتسيناسى ماگيسترلەرىنىڭ اكادەميالىق الماسۋ كونفەرەنتسياسىندا التاي ايماقتىق ءداستۇرلى قازاق مەديتسينالىق اۋرۋحاناسى («قازاق ەمشىلىگى شيپاحاناسى» - اۆت. ) 2023 -جىلعى قىتاي ەتنيكالىق مەديتسينا قاۋىمداستىعىنىڭ عىلىم جانە تەحنولوگيانى دامىتۋ سىيلىعىنىڭ باس جۇلدەسىن جەڭىپ الدى. بۇل تۋرالى وسى اپتادا قىتايدىڭ Ukilialtay اقپاراتتىق پورتالى جازدى.
قىتايلىق باسىلىمنىڭ دەرەگىنشە، بۇل شيپاحانا (كلينيكا) جولداعان 3 زەرتتەۋ جوباسى 1-دارەجەلى سىيلىققا، «قازاق ەمشىلىگىندەگى قىزدىرمامەن (جاپسىرمامەن) ەمدەۋدى كلينيكادا قولدانۋ» جوباسى 2-دارەجەلى سىيلىققا، تاعى
3 عىلىمي جوباسى 3-دارەجەلى سىيلىققا يە بولدى.
التاي ايماقتىق قازاق ەمشىلىگى شيپاحاناسىنىڭ ساۋىقتىرۋ ءبولىمىنىڭ مەڭگەرۋشىسى، اعا دارىگەر گۇلدانا ءاناسقان قىزى تىلشىگە بەرگەن سۇحباتىندا، بۇل جەتكەن جەتىستىكتىڭ ءبارى اتالعان ەمدەۋ ورتالىعى قىزمەتكەرلەرىنىڭ ورتاق ەڭبەگى ەكەنىن ايتادى. بۇدان كەيىنگى ۋاقىتتا دا ارىپتەستەرى تىنباي جۇمىس ىستەپ، قالىڭ حالىقتىڭ دەنساۋلىعىن قورعاۋعا دايىن ەكەندىگىن تىلگە تيەك ەتتى.
باسىلىمنىڭ مالىمەتىنشە، قىتاي ۇلتتىق دارىگەرلىك قوعامىنىڭ عىلىم-تەحنيكا باعىتىنداعى بۇل سىيلىعىن ەلدىڭ عىلىم- تەحنيكا مينيسترلىگى، مەملەكەتتىك عىلىم-تەحنيكا سىيلىعى قىزمەت كەڭسەسى بەكىتكەن.
ايتا كەتەۋ كەرەك، قازاقتىڭ شيپاگەرلىك ءداستۇرىن زاماناۋي ەمدەۋ، دەنساۋلىق ساقتاۋ ىستەرىمەن ۇشتاستىرۋ ماقساتىندا 1985 -جىلى قىتايدىڭ التاي ايماعىنان تۇڭعىش رەت «التاي ايماقتىق قازاق شيپاحاناسى» اشىلدى. بۇگىندە قازاق شيپاگەرلىگىنىڭ عىلىمي تۇرعىدان جۇمىس جۇرگىزۋىنە جان- جاقتى مۇمكىندىكتەر اشىلعان. مۇندا قازاقتىڭ سان عاسىرلار بويى تاجىريبەدەن وتكەن ەمدەۋدىڭ ۇلگىلەرى بۇلاۋ، سىنىقشىلىق، بوبەكتەردى مايمەن سىلاۋ، دەنساۋلىقتى قورعاۋ سەكىلدى سان ءتۇرلى ءادىسى كەڭ قولدانىلادى. قاجىرلى ەڭبەكتىڭ ناتيجەسىندە 9 ءبولىمدى وقۋلىق قۇراستىرىلىپ، قازاق ەمشىلىگى جوعارى وقۋ ورىندارىندا وقىتىلا باستاعان.
تاشكەنتتە قازاقستاندىق ۋنيۆەرسيتەتتىڭ فيليالى اشىلادى - «ءوز ا»
تاشكەنت وبلىسى شىرشىق قالاسىندا م. اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ كوممەرتسيالىق ەمەس اكتسيونەرلىك قوعامىنىڭ فيليالى اشىلادى. وسىعان بايلانىستى مينيسترلەر كابينەتىنىڭ ءتيىستى قاۋلىسىنىڭ جوباسى جاريالاندى. بۇل تۋرالى وسى اپتادا وزبەكستاندىق «ءوز ا» اقپارات اگەنتتىگى حابارلادى.
فيليال قىزمەتىنىڭ نەگىزگى باعىتتارى - ەكونوميكا سالالارى ءۇشىن جوعارى بىلىكتى مامانداردى دايارلاۋ، ءبىلىم، عىلىم جانە ءوندىرىستىڭ ۇزدىكسىزدىگى مەن جۇيەلىلىگى. سونداي- اق الەمنىڭ بەدەلدى ءبىلىم جانە عىلىم ورتالىقتارىمەن ينتەگراتسيالانۋ قاعيداتتارى نەگىزىندە ماماندار مەن عىلىمي كادرلاردى دايارلاۋ جانە قايتا دايارلاۋ جۇيەسىن جاڭعىرتۋ جوسپارلانعان.
تۇرىك ىنتىماقتاستىق جانە ۇيلەستىرۋ اگەنتتىگى (ت ي ك ا) قازاقستاندا تۇرىك ءتىلى سىنىبىن اشتى - «TRT»
تيكا قازاقستاننىڭ قاراعاندى قالاسىنداعى ە. بوكەتوۆ اتىنداعى قاراعاندى ۋنيۆەرسيتەتىندە تۇرىك ءتىلى سىنىبىن اشقان. بۇل تۋرالى تۇركيا راديو تەليەۆيزيا پورتالى حابارلادى.
ە. بوكەتوۆ اتىنداعى قاراعاندى ۋنيۆەرسيتەتىنىڭ رەكتورى نۇرلان دۋلاتبەكوۆ ۋنيۆەرسيتەتتىڭ شەت تىلدەر فاكۋلتەتى عيماراتىندا اشىلعان سىنىپقا بايلانىستى سويلەگەن سوزىندە ۋنيۆەرسيتەت ستۋدەنتتەرى اراسىندا تۇرىك تىلىنە قىزىعۋشىلىقتىڭ جوعارى ەكەنىن ايتقان.
ت ي ك ا ۆيتسە-پرەزيدەنتى ءۇميت نادجي يورۋلماز 1995 -جىلدان بەرى قازاقستاندا ءارتۇرلى سالادا قىزمەتتەرىن اتقارىپ كەلە جاتقاندارىن ءتۇسىندىرىپ، ولاردىڭ ىشىندە ءبىلىم سالاسىنداعى جوبالاردىڭ ورنى ەرەكشە ەكەنىن تىلگە تيەك ەتكەن. ت ي ك ا-نىڭ وسى ۋاقىتقا دەيىن ەلوردا استانا مەن شىمكەنتتە تۇرىك سىنىپتارىن اشقانىن اتاپ كورسەتكەن يورۋلماز الداعى ۋاقىتتا باسقا قالالارداعى ۋنيۆەرسيتەتتەردە دە اشۋدى جالعاستىراتىندارىن ايتقان.
يران مەن قازاقستان ەكى ەل اراسىنداعى كەلىسىمدەرگە قول قويدى - «Parstoday»
يران مەن قازاقستان ەكى ەلدىڭ وكىلدەرى اراسىنداعى ەكونوميكالىق ىنتىماقتاستىق كوميسسياسىنىڭ 19-شى وتىرىسىندا ىنتىماقتاستىق كەلىسىمدەرىنە قول قويدى، دەپ حابارلايدى «Parstoday» اقپارات اگەنتتىگى.
اتالعان اقپارات اگەنتتىگىنىڭ مالىمەتىنشە، يراننىڭ اۋىلشارۋاشىلىق جيھاد ءمينيسترى مۇحامماد ءالي نيكباحت قازاقستان پرەمەر- ءمينيسترىنىڭ ورىنباسارى ءارى ساۋدا جانە ينتەگراتسيا ءمينيسترى سەرىك جۇمانعارينمەن كەزدەسۋىندە ەكى ەل اراسىنداعى ىنتىماقتاستىق جونىندەگى بىرلەسكەن كوميسسيانىڭ كەلىسسوزدەرىنىڭ بارىسىنا ريزالىعىن بىلدىرگەن.
يران مەن قازاقستان بىرلەسكەن كوميسسياسىنىڭ 19-شى وتىرىسىنىڭ ىنتىماقتاستىق قۇجاتى مەن ەكى ەل اراسىنداعى 3 ميلليارد دوللارعا دەيىنگى كوممەرتسيالىق بايلانىستاردىڭ جول كارتاسىنا يراننىڭ اۋىلشارۋاشىلىق جيھاد ءمينيسترى مەن قازاقستان پرەمەر-ءمينيسترىنىڭ ورىنباسارى قول قويدى.
سونىمەن قاتار يران ستاندارتى مەن قازاقستان مەترولوگيا ينستيتۋتى اراسىنداعى مەترولوگيا سالاسىنداعى ىنتىماقتاستىق تۋرالى مەموراندۋمعا، سونداي- اق قازاقستاننان كەلەتىن مال ەتىنىڭ ساۋداسىنا قويىلاتىن سانيتارلىق- ۆەتەرينارلىق پروتسەدۋرالار مەن تالاپتارعا يران مەن قازاقستان ەكى ەلىنىڭ وكىلدەرى دە قول قويعان.
شەتەلدىك تىلشىلەر شينجاڭنىڭ التاي ايماعىنا باردى - «حالىق گازەتى»
5-جەلتوقساندا ورتالىق ازيا مەن رەسەي ەلدەرىنەن كەلگەن جۋرناليستەر توبى قىتايدىڭ شىڭجاڭىنداعى التاي قالاسى گەنارال تاۋى حالىقارالىق تاۋ شاڭعىسى كۋرورتىنا جانە كوشەدەگى اسىل تاستاردى بوياۋ ستۋدياسىنا باردى، دەپ حابارلايدى «حالىق گازەتى».
قىتايلىق ب ا ق-تىڭ دەرەگىنشە، ولار سونداي-اق التايدىڭ تابيعي پەيزاجدارى مەن مادەني ەرەكشەلىكتەرى تۋرالى ءبىلۋ ءۇشىن، قار مەكەنى تۇرعىندار رايونىندا دومبىرادان كۇي تىڭدادى.
ۇيىمداستىرۋشىلار التاي ايماعى قار-مۇزدىڭ كوركەم مەكەنى عانا ەمەس، مادەنيەتتىڭ مايەگى تەرەڭدە جاتقان جەر ەكەنىن باق دەلەگاتسياسى مۇشەلەرىنە تۇسىندىرۋگە تىرىسقان.
باق وكىلدەرى سوڭىندا ونداعان شاڭعى تراسسالارى، تاماشا ينفراقۇرىلىمى جانە وزىق شاڭعى جابدىقتارى بار گەنارال تاۋى حالىقارالىق تاۋ شاڭعىسى كۋرورتىنا بارعان.
اۆتور
بەيسەن سۇلتان ۇلى
