قىتايداعى قازاق بوكسشى توقتاربەك تاڭاتقانعا 100 مىڭ يۋان تارتۋ ەتىلدى
بوكستان حاڭجۋ قالاسىندا وتكەن ⅩⅨجازعى ازيا ويىندارىنىڭ چەمپيونى توقتاربەك تاڭاتقان ۇلىن ءوزىنىڭ تۋعان جەرىندە التاي قالالىق پارتكومىنىڭ ورىنباسارى جەڭىسحان قۇرمان ۇلى 100 مىڭ يۋانمەن (6,5 ميلليون تەڭگە) ارنايى ماراپاتتادى، دەپ حابارلايدى Kazinform.
بۇل تۋرالى قىتايدىڭ ورتالىق حالىق راديوسى رەسمي تۇردە ءمالىم ەتتى.
التاي قالالىق پارتكوم باسشىلارى تاڭاتقان ۇلىن ماراپاتتاۋ ءۇشىن ونىڭ ۇيىنە ارنايى امانداسا بارعان.
«قالا باسشىلارى حالىقتىڭ ىقىلاستى سالەمى مەن ىزگى تىلەگىن جەتكىزىپ، ءارى 100 مىڭ يۋان سىيلىق اقشا ۇسىنۋمەن قاتار، توقتاربەكتىڭ العاشقى جاتتىقتىرۋشىسى مۇرات بوشاي ۇلىنا 50 مىڭ يۋان اقشا سىيلاپ، دارىندى بوكسشىنى باۋلىعان ۇلاعاتتى ەڭبەگىنە شىنايى العىس ءبىلدىردى»، - دەلىنگەن حابارلامادا.
سونداي- اق، توقتاربەكتىڭ ۇيىنە امانداسا بارعان جەرگىلىكتى اتقامىنەرلەر وسىنداي چەمپيوندى ەرجەتكىزگەن توقتاربەكتىڭ اتا- اناسىنا دا العىستارىن ءبىلدىردى.
شارا بارىسىندا توقتاربەك ەندىگى ارمانى وليمپيادانى باعىندىرۋ ەكەنىن دە اتاپ كەتتى.
«بۇل ناتيجەگە قول جەتكىزگەندە ەڭ اۋەلى اتا- انامنىڭ ماپەلەپ وسىرگەن شاپاعاتىنا، جاتتىقتىرۋشىمنىڭ باۋلىعان ەڭبەگىنە ەرەكشە العىس ايتامىن. سونداي- اق، بارلىق جاعدايىمىزدى جاساپ وتىرعان ەل بيلىگىنە، مەنى قولداپ كەلە جاتقان بارلىق جانكۇيەرلەرىمە شىنايى العىسىمدى ايتامىن. بۇل ازيا ويىندارى مەن ءۇشىن ۇلكەن تاجىريبە بولدى. ەندىگى ماقسات - كەلەسى جىلى وتەتىن ءتورت جىلدىق دودا وليمپيادا ويىندارىندا توپ جارۋ»، - دەپ اتاپ ءوتتى بوكسشى.
ەستەرىڭىزگە سالا كەتەيىك، قىتايدا تۇراتىن قانداسىمىز توقتاربەك تاڭاتقان حاڭجۋ قالاسىندا وتكەن ⅩⅨجازعى ازيا ويىندارىندا 80 كەلى سالماقتا جۇدىرىقتاسىپ، باس جۇلدەنى قانجىعاسىنا بايلاعان بولاتىن.
ول فينالدا اتاقتى فيليپپيندىك بوكسشى ەۋمير فەليكس مارسيالمەن جۇدىرىقتاسىپ، جەڭىس تۇعىرىنىڭ ەڭ بيىك ساتىسىنا كوتەرىلىپ قانا قويماي، پاريج وليمپياداسىنىڭ جولداماسىنا دا قول جەتكىزدى.
اۆتور
كۇنسۇلتان وتارباي
