قىتايداعى ەڭ ءىرى تەڭىز گاز كەن ورنىنىڭ ەكىنشى كەزەڭى پايدالانۋعا بەرىلدى
استانا. KAZINFORM - بۇل كەن ورنىنداعى جىلدىق گاز ءوندىرۋ كولەمى 4,5 ميلليارد تەكشە مەتردەن اسىپ، جوبالانعان ەڭ جوعارى دەڭگەيگە جەتەدى دەپ كۇتىلىپ وتىر، دەپ جازادى شينحۋا.
قىتايدىڭ ۇلتتىق وففشورلىق مۇناي كورپوراتسياسى (CNOOC) سارسەنبى كۇنى وڭتۇستىك قىتاي تەڭىزىنىڭ اكۆاتورياسىندا ورنالاسقان «شەنحاي-1» گاز كەن ورنى جوباسىنىڭ ەكىنشى كەزەڭى پايدالانۋعا بەرىلگەنىن حابارلادى. بۇل وقيعا ەلدەگى ەڭ ءىرى تەڭىز گاز جوباسىنىڭ تولىق جۇزەگە اسۋىن بىلدىرەدى.
«شەنحاي-1» كەن ورنىنىڭ گەولوگيالىق قورى 150 ميلليارد تەكشە مەتردەن اسادى. مۇندا گاز ءوندىرۋ 2021 -جىلعى ماۋسىم ايىندا باستالدى، سول كەزدە جوبانىڭ ءبىرىنشى كەزەڭى ىسكە قوسىلعان بولاتىن.
كەن ورنىندا وندىرىلگەن تابيعي گاز سيانگان ارنايى اكىمشىلىك اۋدانىنا، حاينان ارالىنداعى سانيا قالاسىنا جانە گۋاندۋن پروۆينتسياسىنداعى چجۋحاي قالاسىنا تەڭىز ارقىلى تاسىمالدانىپ، ەلدىڭ نەگىزگى ەكونوميكالىق وڭىرلەرىن گازبەن قامتيدى جانە ۇلتتىق گاز قۇبىر جەلىسىنە قوسىلادى.
«شەنحاي-1» - قىتايداعى ەڭ كۇردەلى تەرەڭ تەڭىز گاز جوباسى سانالادى. جوبا ەل ىشىندەگى تەڭىز قايراڭىندا بۇرىن- سوڭدى كەزدەسپەگەن ەڭ جوعارى تەمپەراتۋرا مەن قىسىم جاعدايلارىندا جۇزەگە اسىرىلعان. پايدالانۋ تەرەڭدىگى 1500 مەتردەن اسادى، ال ەڭ تەرەڭ ۇڭعىمالاردىڭ تەرەڭدىگى - 5000 مەترگە دەيىن جەتەدى.
جوبا مەنەدجەرى ليۋ كاننىڭ ايتۋىنشا، بۇل جوبانى ىسكە اسىرۋ بارىسىندا قۇرىلعان وندىرىستىك ينفراقۇرىلىم مەن تەحنولوگيالىق جۇيە بولاشاقتا تەڭىز مۇناي-گازىن كەشەندى تۇردە بارلاۋعا جول اشىپ، ەلدىڭ ەنەرگەتيكالىق قاۋىپسىزدىگىن قامتاماسىز ەتۋدە تەڭىز رەسۋرستارىنىڭ ءرولىن ارتتىرۋعا كومەكتەسەدى.
بۇدان بۇرىن قىتاي بيلىگى سەيسەنبى كۇنى 3-قىركۇيەكتە پەكيندە جاپونعا قارسى سوعىستا جانە الەمدىك فاشيزمگە قارسى سوعىستا جەڭىسكە جەتۋىنىڭ 80 جىلدىعىنا ارنالعان سالتاناتتى جيىن، سونىڭ ىشىندە تيانانمەن الاڭىندا اۋقىمدى اسكەري شەرۋ وتكىزەتىنىن جاريالادى.
