قىتايدا ۇيالى تەلەفون ءنومىرى 440000 دوللارعا ساتىلدى

استانا. KAZINFORM - قىتايدا وتە سيرەك كەزدەسەتىن جانە سيمۆولدىق مانگە يە ۇيالى تەلەفون ءنومىرى - 15177777777 - رەكوردتىق باعاعا ساتىلدى.

ءنومىر Ali Auction ونلاين ساۋدا الاڭىندا 3,2 ميلليون يۋانعا نەمەسە شامامەن 440000 ا ق ش دوللارىنا ساتىپ الىندى، دەپ حابارلايدى Kvedomosti.ru.

بۇل ءنومىردى ەلدىڭ ەڭ ءىرى تەلەكوممۋنيكاتسيالىق وپەراتورلارىنىڭ ءبىرى China Mobile ۇسىنادى. ول كىل 7 سانىنان تۇراتىندىقتان، قىتايداعى «باقىتتى ساندار» تىزىمىندە 12- توپقا كىرەدى. ءداستۇرلى قىتاي مادەنيەتىندە 7 سانى ساتتىلىك پەن تابىستىڭ سيمۆولى بولىپ سانالادى.

ءبىر قىزىعى، ءنومىردى ساتىپ العان ادام ونى مەنشىك رەتىندە ەمەس، 20 جىل پايدالانۋ قۇقىعىمەن الادى. كەلىسىمشارت بويىنشا ول اي سايىن 1500 يۋان (شامامەن 206 دوللار) تولەيدى.

سونىمەن قاتار، بۇل ءنومىردى باسقا ادامعا رەسمي تۇردە بەرۋ مۇمكىندىگى 5  جىلدان كەيىن عانا پايدا بولادى. كەلەسى راسىمدەۋ ءۇشىن كەم دەگەندە 5  جىل كۇتۋ كەرەك.
ساتىپ الۋشىنىڭ اتى-ءجونى جاريالانبادى، ءبىراق ساراپشىلار مۇنداي ەكسكليۋزيۆتى نومىرلەر قىتايدا بەدەلدىڭ، الەۋمەتتىك مارتەبەنىڭ جانە بايلىقتىڭ سيمۆولى رەتىندە جوعارى باعالانادى دەيدى. نومىرگە يە بولۋ كوبىنەسە بەدەلدى تۇلعالار نەمەسە ءىرى كومپانيالار ءۇشىن ينۆەستيتسيا رەتىندە قاراستىرىلادى.

ەسكە سالا كەتەيىك، وزبەكستاندا ۇيالى تەلەفون ءنومىرى 84,7 مىڭ دوللارعا ساتىلعانى جايلى جازعان ەدىك.