قىتايدا وتاندىق جۇيەمەن جابدىقتالعان كومپيۋتەر شىعارىلدى
استانا. KAZINFORM - وتاندىق HarmonyOS وپەراتسيالىق جۇيەسىمەن جاساقتالعان «حۋنمەن» كومپيۋتەرىنىڭ تانىستىرىلىمى 8-ءساۋىر كۇنى شىنجىن قالاسىندا ءوتتى.
Lianhe Zaobao باسىلىمىنىڭ جازۋىنشا، بۇل - قىتايدىڭ وتاندىق وپەراتسيالىق جۇيەنى جەكە كومپيۋتەر وندىرىسىنە قولدانۋ بويىنشا قول جەتكىزگەن ماڭىزدى جەتىستىگى.
بەلگىلى بولعانداي، «حۋنمەن» كومپيۋتەرىن شىعارۋعا Huawei كومپانياسى بەس جىل بويى دايىندالدى. جوباعا ون مىڭنان استام ينجەنەر، 20 دان استام عىلىمي-زەرتتەۋ ينستيتۋتى جۇمىلدىرىلعان، 2700 دەن استام پاتەنت الىنىپ، وپەراتسيالىق جۇيە تۇبەگەيلى قايتا جاسالعان.
رەسمي دەرەك بويىنشا، HarmonyOS - «بارلىق ستسەنارييگە ارنالعان» سمارت وپەراتسيالىق جۇيە. ۇسىنىلىپ وتىرعان «حۋنمەن» كومپيۋتەرى 19-مامىردا ساتىلىمعا شىعادى. بۇعان دەيىنگى Huawei كومپيۋتەرلەرىنەن ەرەكشەلىگى - جاڭا قۇرىلعى Linux ۇستەلدىك جۇيەسىنە ەمەس، تولىعىمەن Harmony يادروسىنا نەگىزدەلگەن.
سونىمەن قاتار، جاڭا كومپيۋتەرگە جاساندى ينتەللەكت (AI) پەن ينتەللەكتۋالدى ءوزارا ارەكەت فۋنكسيالارى ەنگىزىلگەن. قازىرگى ۋاقىتتا 300 دەن استام ەكوجۇيەلىك قوسىمشا HarmonyOS جۇيەسىنە بەيىمدەلىپ ۇلگەردى، ال جىل سوڭىنا دەيىن بۇل سان 2000 نان اسىپ جىعىلۋى مۇمكىن.
HarmonyOS جۇيەسى العاش رەت 2021-جىلى سمارتفوندارعا ورناتىلعان بولاتىن.
الايدا، Huawei ينتەرنەت- دۇكەنىنىڭ تۇتىنۋشىلارعا قىزمەت كورسەتۋ ورتالىعىنىڭ مالىمەتىنشە، ەسكى ۇلگىدەگى جانە قازىرگى كەزدە ساتىلىمدا بار Huawei نوۋتبۋكتەرى، ۇستەلدىك جانە مونوبلوك كومپيۋتەرلەرى «حۋنمەن» قۇرىلعىسىندا قولدانىلاتىن HarmonyOS 5 نۇسقاسىن ورناتۋعا نەمەسە جاڭارتۋعا جارامايدى.
بۇعان دەيىن Huawei سەرىكتەستەرىنىڭ 2025-جىلعى كونفەرەنسياسى الماتىدا وتكەنى تۋرالى حابارلاعان ەدىك.
