قىتايدا تۇراتىن قانداسىمىز توقتاربەك تاڭاتقان ازيادا التىنىنا تالاسادى
قىتايدا تۋىپ، بوكستان سول ەلدىڭ نامىسىن قورعاپ جۇرگەن قانداسىمىز - توقتاربەك تاڭاتقان بۇگىن حاڭجوۋداعى ازيا ويىندارىنىڭ فينالىندا التىنعا تالاسادى، دەپ حابارلايدى قازاقپارات ءتىلشىسى.

80 كەلى سالماقتا باق سىناپ جۇرگەن قازاق بالاسى جارتىلاي فينالدا جاستار اراسىندا 2022-جىلى وتكەن الەم چەمپيوناتىنىڭ جەڭىمپازى، وزبەكستاندىق تۋرابەك حابيبۋللايەۆتى 4:1 ەسەبىمەن تىزە بۇكتىردى.
ەندى توقتاربەك ازيادا التىنى ءۇشىن فيليپپيندىك بوكسشى ەۋمير فەليكس مارسيالمەن قولعاپ تۇيىستىرەدى.
ايتا كەتەيىك، قىتاي نامىسىن قورعاپ جۇرگەن قانداسىمىز فينالدا سۇرىنگەن جاعدايدىڭ وزىندە كۇمىس مەدالدان بولەك پاريج وليمپياداسىنىڭ جولداماسىن دا قانجىعالاپ تۇر.

توقتاربەك تاڭاتقان بۇل جارىستىڭ 1/8 فينالىندا قازاقستاندىق نۇربەك ورالبايدى جارىس جولىنان شىعارىپ تاستاعان بولاتىن.
الايدا، ول وزبەكستان استاناسىندا وتكەن 2023-جىلعى الەم چەمپيوناتىندا فينالعا دەيىن سۇرىنبەي جەتكەنىمەن، شەشۋشى سىندا ورالبايعا ۇتىلىپ، كۇمىس جۇلدەگەر اتانعان.

ەستەرىڭىزگە سالا كەتەيىك، توقتاربەك تاڭاتقان قىتايداعى قازاقتار ءجيى قونىستانعان التاي ايماعى الاعاق قالاشىعىنا قارايتىن تارالاڭ دەگەن اۋىلدا 1996-جىلى 18- قاراشادا قاراپايىم وتباسىندا دۇنيەگە كەلگەن.
توقتاربەك تاڭاتقان 2017-جىلى قازان ايىندا بوكستان قىتايدىڭ ۇلتتىق قۇراماسىنا قابىلدانعان.
ول قىتايدىڭ مەملەكەتتىك ۇلتتىق قۇراماسىنا قوسىلا سالا بىردەن 75 كەلى سالماقتا باق سىنايدى. كەيىننەن ۇلتتىق قۇراما باپكەرلەرى ونى توكيو وليمپياداسىنا دايىنداۋعا كىرىسەدى.
بۇل ورايدى ءمۇلت جىبەرمەگەن توقتاربەك وليمپيادا ويىندارىنا جولداما ساراپقا سالىنعان دودادا كوزدەگەنىنە جەتىپ، جاھاندىق دوداعا قاتىسۋعا مۇمكىندىك الادى.
وكىنىشكە قاراي، توكيو تورىندە توقتاربەكتىڭ باعى جانبادى.
ايتپاقشى، توقتاربەك توكيو وليمپياداسىنا دەيىن «قىتايدىڭ بوكس كورولى» اتاعىن 2017، 2019، 2020 جانە 2021-جىلدارى ءتورت رەت جەڭىپ الدى.
بۇل — قىتايدىڭ ءوزى ىشىندە عانا وتەتىن ەڭ بەدەلدى جارىستاردىڭ ءبىرى. سىياقىسى دا قوماقتى.
توقتالا كەتەتىن جايت، توقتاربەك — قىتاي قازاقتارى اراسىنداعى بوكسشىلاردان وليمپيادا ويىندارىنا قاتىسقان ەكىنشى قازاق بالاسى.
ودان بۇرىن كاسىپقوي بوكسشى قانات يسلام قىتاي تۋى استىندا 2004-جىلى افينا وليمپياداسىنا قاتىسقانىن، 2008-جىلى بەيجىڭ وليمپياداسىندا قانجىعاسى قولا مەدالمەن «مايلانعانىن» بىلەمىز.
مىنە، وسى قاناتتان كەيىن قىتايداعى قانداستار اراسىنان توقتاربەك ەكىنشى رەت وليمپيادا ويىندارىنا قاتىسقان بوكسشى بولدى.
بۇگىن ازيادا ويىندارىندا تاعى دا كەلەسى پاريج وليمپياداسىنىڭ جولداماسىن جەڭىپ الىپ وتىر.
اۆتور كۇنسۇلتان وتارباي