قىتايدا تايعا تاڭبا باسۋ ءراسىمى ءوتتى
استانا. KAZINFORM - قىتايدىڭ ىشكى موڭعول اۆتونوميالىق رەگيونى تونلياو قالاسى زالۋت وڭىرىندە تايعا تاڭبا باسۋ ءراسىمى ءوتتى، دەپ حابارلايدى قىتايلىق «حالىق گازەتى».
بۇل ءىس-شارا كوپتەگەن شاباندوزداردى قىزىقتىردى. تايعا تاڭبا باسۋ - موڭعول حالقىنىڭ ەجەلدەن كەلە جاتقان ءداستۇرى. ءار كوكتەمدە مالشىلار 2 جاسار تايلاردىڭ «ەسەيۋ ءراسىمىن» وتكىزەدى. بۇل كۇنى تايلارعا تاڭبا باسىلىپ، جال-قۇيرىعى كۇزەلىپ، ۇيىرگە قويا بەرىلەدى. بۇل ونىڭ قۇلىن كۇنىمەن قوش ايتىپ، ەسەيگەنىن، ات بولعانىن بىلدىرەدى.
تاڭبا ادەتتە جىلقىنىڭ جامباسىنا نەمەسە الدىڭعى اياعىنا باسىلادى. تاڭبا ولاردىڭ جىلقى تۇلىگىنە قوسىلۋىنىڭ جانە سىنعا تولعان ساپالى مال ەكەنىنىڭ بەلگىسى سانالادى. سونىمەن قاتار تايعا ءمور باسىلعاننان كەيىن، كوپشىلىك سول تاڭبادان جىلقىنىڭ كىمنىڭ مالى ەكەنىن اجىراتىپ وتىرعان.
ايتا كەتەيىك، قازاقتا «كۇيگىزبەسەڭ كۇيەسىڭ» دەگەن اتالى ءسوز بار. اتام زاماننان بەرى قازاق اسىرەسە جىلقى مالىنا رۋدىڭ ارنايى بەكىتىلگەن تاڭبالارىن باسىپ كەلدى. اتا-بابامىز جىلقىنى تايىندا (جاباعىسىندا) تاڭبالاعان. سودان دا بولار انىق، ايقىن كورىنىپ تۇرعان بوگەناي-بەلگىنى «تايعا تاڭبا باسقانداي» دەيدى.
ەسكە سالا كەتەيىك، بۇعان دەيىن شينجاڭدا ءجانابىل سىماعۇل ۇلى ەل باسقارعان جىلدارى 733 قازاق مەكتەبى بولعانى تۋرالى جازعامىز.
اۆتور
باقىتجول كاكەش
