قىتايدا تاقتاتاس مۇنايىنىڭ ۇلكەن قورى تابىلدى
استانا. KAZINFORM - قىتايدىڭ شاندۋڭ پروۆينسياسىنىڭ اۋماعىنا ورنالاسقان سينسين مۇناي الابىنىڭ فانەپين-1 ۋچاسكەسىندە تاقتاتاس مۇنايىنىڭ انىقتالعان گەولوگيالىق قورى 140 ميلليون توننادان استى. بۇل تۋرالى قىتايدىڭ حالى گازەتى باسىلىمى جازدى.
ال تەحنيكالىق تۇرعىدان وندىرۋگە بولاتىن مۇناي قورى 11,36 ميلليون توننا دەپ باعالانىپ وتىر. بۇل - قىتايدىڭ تابيعي رەسۋرستار مينيسترلىگى تىركەگەن گەولوگيالىق قورى 100 ميلليون توننادان كەم ەمەس العاشقى تاقتاتاستى مۇناي كەن ورنى
تاقتاتاس مۇنايى - ورگانيكالىق زاتتارعا باي تاقتاتاس قاباتتارىندا تۇزىلگەن مۇناي رەسۋرسى. قىتاي عىلىم اكادەمياسىنىڭ اكادەميگى جيا چەنجاۋ اتاپ وتكەندەي، تاقتاتاس مۇنايى - قىتايدا شيكى مۇناي ءوندىرىسىن تۇراقتاندىراتىن، ارتتىراتىن ماڭىزدى بالاما كوز، ال مۇناي قورىنىڭ انىقتالعان كولەمى - قازىرگى وندىرىسكە دەم بەرەتىن نەگىزگى كورسەتكىشتەردىڭ ءبىرى. ونىڭ ايتۋىنشا، 2024 -جىلدىڭ قاڭتارىندا قىتايدىڭ تابيعي رەسۋرستار مينيسترلىگى «تاقتاتاس قاباتتارىنداعى مۇناي قورىن ەسەپتەۋ ستاندارتىن» جاريالاعان، بۇل سالاداعى رەسۋرستاردى باسقارۋدىڭ جاڭا كەزەڭگە - جۇيەلەۋ مەن ستاندارتتاۋعا كوشكەنىن كورسەتتى.
- 10 -جىلدان استام ۋاقىت بويى جۇرگىزىلگەن زەرتتەۋ جۇمىسىنىڭ ناتيجەسىندە شەنلي مۇناي كەن ورنىندا انىقتالعان تاقتاتاس مۇنايىنىڭ جالپى قورى 10,5 ميلليارد تونناعا جەتتى. بۇل - سوڭعى 60 جىلدان بەرى انىقتالعان ءداستۇرلى مۇناي- گاز قورىنىڭ جالپى كولەمىنە تەڭ كورسەتكىش. كەشەندى بارلاۋ جانە يگەرۋ جۇمىستارىنىڭ ارقاسىندا بيىل شەنلي مۇناي كەن ورنىندا قوسىمشا 80 ميلليون توننا جاڭا قور انىقتالۋى مۇمكىن. بۇل قىتايدىڭ تاقتاتاس قاباتتارىنداعى مۇناي رەسۋرستارىن يگەرۋگە ۇلكەن سەرپىن بەرەدى، - دەپ اتاپ ءوتتى سينوپەك كورپوراتسياسىنىڭ باس ديرەكتورىنىڭ كومەكشىسى جانە شەنلي مۇناي باسقارماسىنىڭ اتقارۋشى ديرەكتورى سۋن يۋنجۋان.
ايتا كەتەيىك، العاشقى كومىرتەك-14 يادرولىق باتارەياسى قىتايدا جاسالدى.
اۆتور
ەرلان مازان
