قىتايدا تاعى ءبىر شەنەۋنىك پارا العانى ءۇشىن ءولىم جازاسىنا كەسىلدى
استانا. KAZINFORM - قىتايدىڭ شينجاڭ ۇيعىر اۆتونوميالىق رەگيونى پارتيا كوميتەتىنىڭ حاتشىسىنىڭ بۇرىنعى ورىنباسارى لي پىڭچين 822 ميلليون يۋاننان استام پارا الدى دەپ ايىپتالىپ، ءولىم جازاسىنا كەسىلدى.
Lianhe Zaobao باسىلىمىنىڭ حابارلاۋىنشا، قىتاي سوتى 22-ءساۋىر كۇنى لي پىڭچيننىڭ پارا الۋ ءىسى بويىنشا ءبىرىنشى ساتىداعى ايىپتاۋ ۇكىمىن جاريالادى. ۇكىمگە سايكەس، قىتايلىق شەنەۋنىككە اسا ءىرى كولەمدە پارا العانى ءۇشىن ءولىم جازاسى بەرىلىپ، قوسىمشا ساياسي قۇقىقتارىنان ءومىر بويىنا ايىرۋ جانە بۇكىل مال-مۇلكىن تاركىلەۋ جازاسى تاعايىندالدى. سوت شەشىمىمەن ءولىم جازاسىنىڭ ورىندالۋى ەكى جىل مەرزىمگە كەيىنگە قالدىرىلدى.
ەكى جىلدان كەيىن، سوت شەشىمىمەن ءولىم جازاسى ءومىر بويى باس بوستاندىعىنان ايىرۋ جازاسىنا اۋىستىرىلعان جاعدايدا، وعان مەرزىمىنەن بۇرىن بوساتىلۋ نەمەسە جازاسىن جەڭىلدەتۋ مۇمكىندىكتەرى قاراستىرىلمايدى.
تەرگەۋ بارىسىندا انىقتالعان جانە تاركىلەنگەن زاڭسىز مۇلكى مەن تابىسى مەملەكەتتىك بيۋدجەتكە اۋدارىلادى.
سوتتىڭ انىقتاۋىنشا، 1999 -جىلدان 2023 -جىلعا دەيىن ءتۇرلى دەڭگەيدە لاۋازىمدى قىزمەتتەر اتقارعان لي پىڭچين ءوز وكىلەتتىگى مەن جۇمىس بابىنداعى وڭتايلى جاعدايدى پايدالانىپ، ءبىرقاتار مەكەمە مەن جەكە تۇلعالارعا كەن ورىندارىن يگەرۋ، كاسىپكەرلىكپەن اينالىسۋ جانە كادرلىق اۋىس-ءتۇيىس بويىنشا «كومەكتەسىپ»، قارىمجىسىنا تىكەلەي نەمەسە اراداعى ادام ارقىلى 822 ميلليون يۋاننان استام زاڭسىز قاراجات العان.
65 جاستاعى لي پىڭچين - شانشي پروۆينسياسىنىڭ تۋماسى. ول قىتايدىڭ شينحاي، ىشكى موڭعوليا جانە شينجاڭ وڭىرلەرىندە بىرنەشە جىل بويى ءتۇرلى دەڭگەيدە باسشىلىق قىزمەتتەر اتقارعان. اسىرەسە 2016 -جىلى ش ۇ ا ر پارتيا كوميتەتىنىڭ حاتشىسىنىڭ ورىنباسارى بولىپ تاعايىندالىپ، پارتيا كوميتەتى حاتشىلىعىنىڭ جەتەكشىسى جانە ءبىلىم ءىسى جونىندەگى جۇمىس كوميتەتىنىڭ حاتشىسى قىزمەتىن قوسا اتقارعان. وسى كەزەڭدە يدەولوگيا جانە ءبىلىم سالاسىنداعى سەپاراتيزمگە قارسى كۇرەس ناۋقانىنا جەتەكشىلىك ەتكەن.
2021 -جىلدىڭ شىلدە ايىندا باسقا جۇمىسقا اۋىستىرىلعان. 2023 -جىلدىڭ جەلتوقسان ايىندا ونىڭ ۇستىنەن تارتىپتىك ءىس قوزعالىپ، 2024 -جىلى ماۋسىمدا پارتيا قاتارىنان شىعارىلعان.
اۆتور
ەرلان مازان
