قىتايدا قىلمىسكەردى دوپقا ۇقسايتىن روبوت-پوليتسەي ۇستايدى
استانا. قازاقپارات - دوپ سياقتى دومالاپ قوزعالاتىن روبوت-پوليتسەي كوشەلەردەگى ءتارتىپتى ساقتاۋعا كومەكتەسەدى. ونى پوليتسيا پاترۋلدەرى قولدانا باستادى.
Aikyn.kz قىتايلىق پوليتسەيلەرگە قىلمىسكەردى ۇستاۋعا كومەكتەسەتىن روبوت- دوپتىڭ سيپاتىن newatlas.com سايتىنا سۇيەنىپ تالدايدى.
125 كەلى سالماعى بار روبوت قىلمىسكەرلەردى دومالاپ قۋىپ جەتىپ، ءارتۇرلى قارۋلارمەن سوققى بەرەدى.
بۇل 125 كەلى سالماعى بار روبوت- دوپ جەردە دە، سۋدا دا 35 شاقىرىم/ساع جىلدامدىقپەن دومالاپ، قىلمىسكەرلەردى قۋىپ جەتەدى. ولارعا قاتتى زاقىمدامايتىن قارۋلارمەن سوققى بەرەدى، ۇستايدى.
بۇل روبوتتىڭ نەگىزگى پلاتفورماسى بىرنەشە جىلدار بويى ازىرلەنۋدە. Logon Technology مودەلىن جەتىلدىرگەن قىتايلىق Rotunbot RT- G كومپانياسى دوپ-پوليتسەيدى كوممەرتسيالىق قولدانىسقا ەنگىزدى. كومپانيا روبوت جەردە جۇمساق جىلجيتىنىن، گيروسكوپيالىق ءوزىن-ءوزى تۇراقتاندىرۋ جۇيەسىنىڭ كومەگىمەن جاقسى جىلدامدىقپەن قوزعالاتىنىن ايتادى.
دوپ-روبوت بىرنەشە سەنسورلارمەن، سونىڭ ىشىندە GPS ارقىلى ءوزىنىڭ ورنىن انىقتاۋعا ارنالعان، اينالانى كورۋ، ادامدارمەن جانە باسقا كەدەرگىلەرمەن سوقتىعىسۋدان ساقتايتىن قۇرالدارمەن جابدىقتالعان. روبوتقا قاۋىپتەر مەن نىسانداردى باقىلاۋ ءۇشىن بىرنەشە كامەرالار مەن ۋلترادىبىستىق سەنسورلار ورناتىلعان.
روبوت اۋىر سوققىلارعا توتەپ بەرە الاتىنداي ماتەريالدان جاسالعان، ول بيىكتىكتەن قاۋىپسىز قۇلاۋعا نەمەسە باسپالداقتان تومەن تۇسۋگە مۇمكىندىك بەرەدى. ول بالشىقتى، باتپاقتا دومالاپ جۇرە بەرەدى، جول تالعامايدى. ماتەريال سۋ وتكىزبەيتىن بولعاندىقتان، روبوت-دوپ قاجەت بولعان جاعدايدا وزەننەن دە قالقىپ وتەدى.
قازىر روبوت-پوليتسەيدى قىتايدىڭ وڭتۇستىك- شىعىس جاعالاۋىنداعى جىجياڭ پروۆينتسياسىنداعى ۆەنجوۋ قالاسىنىڭ پوليتسيا پاترۋلدەرى سىناقتان وتكىزۋدە. پوليتسيانىڭ ماقساتتارى ءۇشىن ول قىلمىسپەن كۇرەسۋگە ارنالعان گادجەتتەرمەن جاڭارتىلعان: كوزدەن جاس اعىزاتىن گاز، ءتۇتىن بومبالارى، گۋدوكپەن، اكۋستيكالىق داۋىس كۇشەيتكىشپەن جانە كۇدىكتىلەردى جاقىن قاشىقتىقتا اتىپ تۇسىرەتىن تور اتۋ قوندىرعىلارىمەن.
جەلىدە تارالعان ۆيدەودا روبوت- پوليتسەي دوبى قازىرگى ۋاقىتتا قاشىقتان باسقارىلادى. دەگەنمەن ازىرلەۋشىلەر روبوتتى جەتىلدىرىلىپ، ونى اۆتونومدى قولدانۋعا بولاتىنىن ايتادى. روبوت-دوپ بۇرىلىس جاساعاندا سەنىمسىز قوزعالاتىن سياقتى جانە ۆيدەولاردا ودان قاشىپ كەتۋ وڭاي سياقتى كورىنەدى. شىنايى ومىردە قىلمىسكەر قاسكوي باسپالداقپەن جوعارى كوتەرىلسە روبوت-دوپ وعان ىلەسە الماي قالاتىنداي.
ەكىنشى جاعىنان، قولدانىستاعى پوليتسيا روبوتتارى قاۋىپتى قىلمىسكەرلەردى ولتىرمەي ۇستاۋعا قولدانىلىپ كەلەدى. ال دوپقا ۇقسايتىن روبوتتار قولدانىستاعى تەحنولوگياعا قاراعاندا تيىمدىرەك بولۋى مۇمكىن. ويتكەنى روبوت- دوپتار قىلمىسكەردەن قالماي، ونى پوليتسيا قىزمەتكەرلەرىمەن بىرلەسىپ، وڭاي ۇستاي الادى. جەتىلدىرىلگەن روبوت- پوليتسەي بۇدان باسقا دا قىزمەتتەردى ورىنداۋعا قابىلەتتى بولاتىنىن ۋاقىت كورسەتەر دەپ ويلايمىز.
