قىتايدا قازاقستاننىڭ تۋريزم جىلى رەسمي تۇردە باستالدى
بەيجىڭ. KAZINFORM - بۇگىن بەيجىڭ قالاسىندا قىتايداعى قازاقستان تۋريزم جىلىنىڭ رەسمي اشىلۋ سالتاناتى ءوتىپ جاتىر. شارا اياسىندا بەيجىڭدە قازاقستان مەن قىتاي وكىلدەرىنىڭ قاتىسۋىمەن ءبىرقاتار قۇجاتتارعا قول قويىلدى.
اتالعان شارانىڭ اشىلۋ ءراسىمى قازاقستان- قىتاي تۋريستىك جانە ينۆەستيتسيالىق فورۋمىنان باستالىپ، ق ر تۋريزم جانە سپورت ءمينيسترى ەرمەك مارجىقپايەۆ قۇتتىقتاۋ ءسوز سويلەدى.
«قىتاي حالىق رەسپۋبليكاسىنداعى قازاقستاننىڭ تۋريزم جىلى - ەكى ەل اراسىنداعى دوستىق قارىم-قاتىناستى نىعايتۋعا ىقپال ەتەتىن ەرەكشە ءىس-شارا. بۇگىنگى ءىس-شارامىز وسى ماقساتقا جەتۋ جولىنداعى ماڭىزدى قادام بولىپ وتىر. ءبىزدىڭ ديالوگىمىز جەمىستى جانە ۇزاق مەرزىمدى ىنتىماقتاستىقتىڭ نەگىزىن قۇراي وتىرىپ، تۋريزم سالاسىنداعى سەرىكتەستىكتىڭ جاڭا كوكجيەكتەرىن اشادى دەپ سەنەمىز»، - دەدى مينيستر.
سونداي- اق ول قازاقستان - كەز كەلگەن ساياحاتشىنى ءوزىنىڭ كوشپەلى مادەنيەتىمەن، عاسىرلارعا جالعاسقان تاريحىمەن جانە بىرەگەي تابيعاتىمەن قىزىقتىراتىنىن اتاپ ءوتتى.
«ەلىمىزدىڭ تۋريستىك الەۋەتى زور. ءبىزدىڭ ماقساتىمىز - سول بايلىقتى بارلىعىنا قولجەتىمدى ەتۋ»، - دەپ تولىقتىردى ەرمەك مارجىقپايەۆ.
فورۋمعا قىتاي حالىق رەسپۋبليكاسىنىڭ مادەنيەت جانە تۋريزم ءمينيسترى سۋن لي دە قاتىستى.
«Kazakh Tourism» ۇ ك» ا ق باسقارما ءتوراعاسى قايرات ءسادۋاقاسوۆ تا ءسوز سويلەدى. ول جينالعان قاۋىمدى «Kazakh Tourism» ۇلتتىق كومپانياسىمەن تانىستىردى.
«قازاقستان - قىتايلىق تۋريستەر ءۇشىن ەڭ تارتىمدى باعىتتاردىڭ ءبىرى ەكەنىنە سەنىمدىمىز. ول ۆيزاسىز رەجيمدى قولدايتىن كورشىلەس ەل عانا ەمەس، سونىمەن قاتار «ءبىر بەلدەۋ، ءبىر جول» باستاماسىنىڭ ستراتەگيالىق سەرىكتەسى. ءبىز تۋريستەردىڭ نازارىنا ەكو-ەتنوتۋريزم، ويىن-ساۋىق جانە رەسمي ءىس-شارالاردى قامتيتىن «Eco-Ethnic-Entertainment-Events» كونسەپتسياسىن ۇسىنامىز»، - دەدى قايرات ءسادۋاقاسوۆ.
قازاقستانداعى ءار باعىتتىڭ الەۋەتى تۋرالى ايتا كەلە، ق. ءسادۋاقاسوۆ فورۋمعا قاتىسۋشىلاردى بيىل قىتايداعى قازاقستان تۋريزمى جىلى اياسىندا وتەتىن ءىس-شارالارعا قاتىسۋعا شاقىردى. 2024 -جىلعا ولاردىڭ 35 تەن استامى جوسپارلانعان.
تۋريزم جانە ينۆەستيتسيالىق فورۋم ەكى پانەلدىك سەسسيادان تۇردى:
• «قىتاي ساياحاتشىلارى ءۇشىن قازاقستانداعى ۇيىمداستىرىلعان تۋريزم مۇمكىندىكتەرى»
• «تۋريستىك بيزنەستەگى ارىپتەستىك: قازاقستان- قىتاي اراسىنداعى ينۆەستيتسيالىق مۇمكىندىكتەر».
جيىندا قىتايلىق ساياحاتشىلار ءۇشىن ۇيىمداستىرىلعان تۋريزم مۇمكىندىكتەرى مەن قازاقستان- قىتايدىڭ ينۆەستيتسيالىق مۇمكىندىكتەرى تالقىلاندى.
سونداي-اق فورۋمعا قاتىسۋشىلار ءۇشىن بىرەگەي كورمە ۇيىمداستىرىلدى، وندا قوناقتار قازاقستاننىڭ بارلىق 17 ايماعىنىڭ كورىكتى جەرلەرىمەن تانىسا الادى.
فورۋم سوڭىندا قازاقستاندىق جانە قىتايلىق تاراپتار اراسىندا ءبىرقاتار مەموراندۋمدارعا قول قويىلدى.
ەستەرىڭىزگە سالا كەتەيىك، ەرتەڭ، 29-ناۋرىزدا قوناقتاردى قىتايداعى قازاقستان تۋريزمى جىلىنىڭ رەسمي اشىلۋ سالتاناتى، مادەني باعدارلاماسى بار ەتنواۋىل، سونداي-اق كورنەكتى ارتىستەردىڭ قاتىسۋىمەن وتەتىن ۇلكەن گالا-كونسەرت كۇتۋدە.
اۆتور
كۇنسۇلتان وتارباي
