قىتايدا نوسەر مەن اپتاپقا بايلانىستى «سارى» دەڭگەيلى ەسكەرتۋ جاريالاندى
استانا. KAZINFORM - قىتاي حالىق رەسپۋبليكاسىنىڭ ۇلتتىق مەتەورولوگيالىق ورتالىعى (ۇ م و) سەنبى كۇنى ەلدىڭ ءبىرقاتار ايماعىندا نوسەر جاۋىن مەن اپتاپ ىستىققا بايلانىستى «سارى» دەڭگەيدەگى دابىل جاريالادى.
ۇ م و مالىمەتىنشە، سەنبى كۇنى ساعات 08:00-دەن جەكسەنبى كۇنى ساعات 08:00-گە دەيىن ىشكى موڭعوليا اۆتونوميالىق اۋدانى، حەيلۋڭجياڭ، جيلين، لياونيڭ، حىبەي پروۆينسيالارى، بەيجىڭ قالاسى جانە باسقا وڭىرلەردە قاتتى جاڭبىر جاۋۋى مۇمكىن.
اتاپ ايتقاندا، ىشكى موڭعوليا ارا، حەيلۋڭجياڭ، جياڭسۋ جانە باسقا دا وڭىرلەردە جاۋىن-شاشىن كولەمى 150 م م-گە دەيىن جەتۋى ىقتيمال. كەيبىر ايماقتاردا ءبىر ساعات ىشىندە 70 م م-دەن استام جاۋىن جاۋۋى مۇمكىن.
وسىعان بايلانىستى ۇ م و جەرگىلىكتى بيلىك ورگاندارى مەن ءتيىستى ۆەدومستۆولارعا نوسەرگە دايىن بولۋدى ۇسىندى. مەكتەپتەر مەن بالاباقشالار وقۋشىلاردىڭ قاۋىپسىزدىگىن قامتاماسىز ەتۋ شارالارىن قابىلداۋى ءتيىس، ال جۇرگىزۋشىلەرگە تاسقىن مەن جول كەپتەلىستەرىنە بايلانىستى بارىنشا ساق بولۋ ۇسىنىلدى.
ۇ م و بولجامىنشا، سەنبى كۇنى قىتايدىڭ كوپتەگەن وڭىرىندە اۋا تەمپەراتۋراسى 35-39 گرادۋسقا دەيىن كوتەرىلەدى.
اتاپ ايتقاندا، شانشي، سىچۋان پروۆينسيالارىندا، چۋڭچيڭ قالاسى مەن شينجاڭ- ۇيعىر اۆتونوميالىق اۋدانىنىڭ تۋرپان ويپاتىندا سىناپ باعاناسى 40 گرادۋستان دا اسىپ ءتۇسۋى مۇمكىن.
ۇ م و تۇرعىندارعا، اسىرەسە تۇستەن كەيىن اشىق اۋادا بەلسەندى ارەكەتتەن اۋلاق بولۋعا كەڭەس ايتتى. سونداي-اق، بالالار مەن قارتتار سەكىلدى وسال توپتاردى قورعاۋ ءۇشىن قاجەتتى ساقتىق شارالارىن قابىلداۋعا شاقىردى.
ەسكە سالا كەتەيىك، قىتايدا قولايسىز اۋا رايىنا قاتىستى ءتورت دەڭگەيلى ەسكەرتۋ جۇيەسى ەنگىزىلگەن: ەڭ جوعارى قاۋىپ دەڭگەيى - قىزىل ءتۇس، ودان كەيىن - قىزعىلت سارى، سارى جانە كوك تۇستەر.
