قىتايدا نوسەر جاۋىنعا بايلانىستى «كوك» دەڭگەيدەگى ەسكەرتۋ ۇزارتىلدى
استانا. KAZINFORM - قىتايدىڭ ۇلتتىق مەتەورولوگيالىق ورتالىعى سەنبى كۇنى ەلدىڭ كەيبىر وڭىرىندە جالعاسىپ جاتقان قاتتى جاۋىن-شاشىنعا بايلانىستى «كوك» دەڭگەيدەگى ەسكەرتۋ شارالارىنىڭ مەرزىمىن ۇزارتتى، دەپ حابارلايدى شينحۋا.
مەتەورولوگتاردىڭ بولجامى بويىنشا سەنبى كۇنى تاڭعى 08:00 دەن جەكسەنبى كۇنى تاڭعى 08:00 گە دەيىن حەبەي، شاندۋن، حەنان، تسزيانسۋ، انحوي، حۋبەي، حۋنان، چجەتسزيان، يۋننان، گۋاندۋن، حەيلۋنتسزيان پروۆينتسيالارىندا جانە گۋانسي-چجۋان اۆتونوميالىق اۋدانىندا قاتتى جاۋىن جاۋادى دەپ كۇتىلىپ وتىر.
ماماندار اتاپ وتكەندەي، تسزيانسۋ پروۆينتسياسىنىڭ سولتۇستىگىندە تاۋلىكتىك جاۋىن- شاشىن مولشەرى 150 م م- دەن اسىپ كەتۋى مۇمكىن.
ۇلتتىق مەتەورولوگيالىق ورتالىق جەرگىلىكتى بيلىك ورگاندارىنا نوسەر جاۋىنعا دايىن بولۋدى جانە قالا اۋداندارى مەن اۋىل شارۋاشىلىعى جەرلەرىندە سۋدى اعىزۋ بويىنشا ءتيىستى شارالاردى قابىلداۋدى ۇسىندى.
ايتا كەتەيىك، قىتايدا قولدانىستاعى اۋا رايىنا بايلانىستى ەسكەرتۋ جۇيەسى ءتورت دەڭگەيدەن تۇرادى: ەڭ جوعارى قاۋىپ - قىزىل ءتۇس، ودان كەيىنگى دەڭگەيلەر - قىزعىلت سارى، سارى جانە كوك.
ەسكە سالىپ وتسەك، قاتتى جانە تولاسسىز جاۋعان جاڭبىر مەن وزەندەردىڭ جوعارعى اعىسىنان كەلگەن سۋ كولەمىنىڭ ارتۋى سالدارىنان قىتايدىڭ وڭتۇستىك- باتىسىنداعى گۋيچجوۋ پروۆينتسياسىنىڭ ەكى ۋەزىندە كۇشتى سۋ تاسقىنى بولدى. سەيسەنبى كۇنى ساعات 14:30 داعى مالىمەت بويىنشا جۋنتسزيان جانە تسۋنتسزيان ۋەزدەرىندە تيىسىنشە 48900 جانە 32000 ادام ۋاقىتشا ەۆاكۋاتسيالاندى.
قىتاي بيلىگى سۋ تاسقىنىنان زارداپ شەككەن گۋيچجوۋ پروۆينتسياسىنا 100 ميلليون يۋان بولگەنى بەلگىلى بولدى.
ەكى كۇن بۇرىن گۋيچجوۋ پروۆينتسياسىندا تاسجول كوپىرى قۇلاپ، جۇك كولىگىنىڭ جۇرگىزۋشىسى قيراعان كوپىردە ءىلۋلى تۇرعان كولىك كابيناسىندا قالىپ قويعانىن حابارلاعان ەدىك.
كەيىننەن تابيعي اپات سالدارىنان التى ادامنىڭ قازا بولعانى انىقتالدى.
