قىتايدا مەكتەپ ءبىتىرۋ ەمتيحانى 9 ساعاتقا سوزىلادى

استانا. قازاقپارات - الەمنىڭ كوپ ەلىندە مەكتەپتەردە ەمتيحان باستالدى. كوبىنىڭ سىناق جۇيەسى بىزدەگىدەن وزگەشە. تەوريالىق بىلىمگە قاراعاندا وقۋشىنىڭ لوگيكالىق ويلاۋ قابىلەتىن كوبىرەك باعالايدى.

مىسالى، فرانسيا مەن فينليانديادا وقۋشى ەمتيحاندى جازباشا تاپسىرادى. مەكتەپ بىتىرۋشىلەر بەكىتىلگەن پاندەر بويىنشا ەسسە جازۋعا مىندەتتى. ال قىتايدا ەمتيحان 9 ساعاتقا سوزىلادى. ءيا، الەم ەلدەرى تۇلەكتەردىڭ ەمتيحانىنا زور ءمان بەرەدى. ءتىپتى كەي مەملەكەتتە كولىك قوزعالىسى شەكتەلىپ، تىنىشتىق ورنايدى.

الەمدەگى ەڭ كۇردەلى مەكتەپ ءبىتىرۋ ەمتيحانى قىتايدا. «گاۋكاۋ» دەپ اتالاتىن ۇلتتىق سىناق - مەكتەپ بىتىرۋشىلەر ءۇشىن ەڭ شەشۋشى كەزەڭ. ەمتيحان شامامەن 9 ساعاتقا سوزىلادى. ونى جىل سايىن 12 ميلليون تۇلەك تاپسىرادى. ءبىراق ولاردىڭ 10 ميلليونى عانا سۇرىنبەي وتەدى. ال قىتايدىڭ ەڭ ۇزدىك وقۋ ورىندارىنا ءتۇسۋ ءۇشىن تۇلەكتەردىڭ %0,25 عانا شەكتى بال جيناي الادى. ويتكەنى سىناق تىم كۇردەلى. ول قىتاي تىلىندە وتەدى.

مەكتەپ بىتىرۋشىلەردىڭ ءبىلىمى ماتەماتيكا، جاراتىلىستانۋ عىلىمدارى مەن ءتىل ءپانى بويىنشا باعالانادى. وقۋشىلار ەمتيحاندى جاقسى تاپسىرۋ ءۇشىن دايىندىقتى 2-3 جىل بۇرىن باستاپ، تاۋلىگىنە 12-14 ساعات ۋاقىتىن بولەدى.

وڭتۇستىك كورەيادا ەمتيحان كۇنى كوشەدە قوزعالىس توقتايدى

وڭتۇستىك كورەيادا مەكتەپ ءبىتىرۋ ەمتيحانىنا تۇتاس ەل اسا جاۋاپكەرشىلىكپەن قارايدى. سىناق كۇنى اۋە رەيستەرى توقتايدى، بارلىق مەكەمەدە جۇمىس ۋاقىتى قىسقارتىلادى. تۇلەكتەردى قورعاۋ ءۇشىن كولىك قوزعالىسى شەكتەلىپ، پوليتسيا جولداردى قاتاڭ باقىلايدى. بۇل بالالاردىڭ سىناقتى ەش الاڭداماي تاپسىرىپ شىعۋى ءۇشىن ۇيىمداستىرىلادى. ال ەمتيحاننىڭ ءوزى 8 ساعاتقا سوزىلادى.

مەكتەپ بىتىرۋشىلەر تەستتى تاڭداۋ پانىنەن بولەك كورەي مەن اعىلشىن ءتىلى، ماتەماتيكا، جاراتىلىستانۋ عىلىمدارى بويىنشا تاپسىرادى. ولار ەمتيحانعا دايىندىقتى ەرتە باستايدى. سوڭعى وقۋ جىلىندا ازىرلىكتى ءتىپتى كۇشەيتىپ، تاۋلىگىنە 12 ساعاتقا دەيىن دايىندالادى. سەبەبى تۇلەك ەمتيحاندى ءبىر-اق رەت تاپسىرا الادى. سوندىقتان ونىڭ ءار بالا مەن اتا-انا ءۇشىن ماڭىزى زور.

فينليانديادا ەمتيحاندى اعىلشىن تىلىندە تاپسىرۋعا رۇقسات بەرىلمەك

ساپالى ءبىلىم جۇيەسىمەن تانىمال فينليانديادا مەكتەپ ءبىتىرۋ ەمتيحانى ءدال قىتاي مەن وڭتۇستىك كورەياداعىداي كۇردەلى ەمەس. باستىسى، ەمتيحان سترەسسىز وتەدى. ءبىراق تەرەڭ ءبىلىمدى قاجەت ەتەدى. ويتكەنى قورىتىندى سىناق تەست ەمەس، جازباشا تۇردە جۇرەدى. بۇل ولاردىڭ تەوريالىق ءبىلىمىن عانا ەمەس، ويلاۋ قابىلەتى مەن اناليتيكالىق داعدىلارىن انىقتاۋعا مۇمكىندىك بەرەدى.

ال تۇلەكتەر ەمتيحاندى تەك فين نەمەسە شۆەد تىلىندە تاپسىرا الادى. بۇل وزگە ۇلت وكىلدەرى ءۇشىن قيىندىق تۋعىزىپ وتىر. وسىنى ەسكەرگەن ۇكىمەت سىناقتى اعىلشىن تىلىندە جۇرگىزۋ مۇمكىندىگىن قاراستىرىپ جاتىر. جاڭا وقۋ جىلىنان باستاپ مەكتەپتەردە ءدارىس اعىلشىن تىلىندە وقىتىلۋى مۇمكىن.

اندەرس ادلەركرويتس، فينليانديا ءبىلىم ءمينيسترى:

- ءبىز ءبىلىم بەرۋ جۇيەسىنە شۆەد پەن فين تىلىنەن بولەك تاعى ءبىر شەت ءتىلىن ەنگىزۋدى جوسپارلاپ وتىرمىز. ەگەر پارلامەنت ۇسىنىسىمدى قابىلداسا، ورتا ءبىلىم مەن ج و و- عا ءتۇسۋ سىناعى اعىلشىن تىلىندە جۇرگىزىلەدى. وزگەرىس ەلگە ورالعان ميگرانتتار مەن شەتەل ازاماتتارى اراسىندا قىزىعۋشىلىق تۋعىزۋى مۇمكىن.

فرانسيادا ەمتيحان جازباشا ءارى اۋىزشا وتەدى

ال فرانسيادا مەكتەپ ءبىتىرۋ ەمتيحانى جازباشا ءارى اۋىزشا وتەدى. بارلىق تۇلەك فيلوسوفيا پانىنەن ەسسە جازۋى مىندەتتى. ءار جازباشا سىناق 4-5 ساعاتقا سوزىلادى. اۋىزشا ەمتيحانعا 30 مينۋت ۋاقىت بەرىلەدى. جۇيە مەكتەپ ءبىتىرۋشىنىڭ ەستە ساقتاۋ ەمەس، لوگيكالىق ويلاۋ مەن تالداۋ جاساۋ قابىلەتىن باعالاۋعا قۇرىلعان.

گازاداعى وقۋشىلار ەمتيحان تاپسىرعىسى كەلەدى

ال گازا سەكتورىندا مەكتەپ وقۋشىلارى ءۇشىن ەمتيحاننىڭ وڭاي-قيىنى ەمەس، ونى تاپسىرۋدىڭ ءوزى قولجەتپەس ارمان. ايماقتا 1,5 جىلدان بەرى جالعاسىپ كەلە جاتقان سوعىستان وقۋشىلار بىلىمنەن قول ءۇزىپ قالدى. بۇرىن ءتالىم-تاربيە وشاعى بولعان مەكتەپتەر قازىر ولاردىڭ باس ساۋعالايتىن پاناسىنا اينالعان.

مادج حاماد، جەرگىلىكتى تۇرعىن:

- قازىر ءبىز پانالاپ جۇرگەن مەكتەپتە وسى ۋاقىتتا وقۋشىلار ەمتيحان تاپسىرىپ، بىتىرۋشىلەر ج و و- عا تۇسۋگە قامداناتىن ەدى. ارمانىم - دارىگەر بولۋ. قايعىدان قان جۇتقان، جانى دا، ءتانى دە جارالى حالىققا كومەكتەسكىم كەلەدى. قاقتىعىسقا دەيىنگى وقۋ جىلدارىم مەن ءۇشىن ومىرىمدەگى ەڭ باقىتتى ساتتەردىڭ ءبىرى بولدى. سوعىستان مەكتەپتى بىتىرە الماي قالدىم. ءبىزدىڭ ەلدە دە مەكتەپ بىتىرۋشىلەردىڭ ءبىلىمىن باعالاۋ جۇيەسىنىڭ وزىندىك ەرەكشەلىكتەرى بار. ۇلتتىق ءبىرىڭعاي تەستىلەۋ تۇلەكتى بىرنەشە ءپان بويىنشا تەكسەرەدى. ال ونىڭ كۇردەلىلىگى وقۋشىنىڭ دايىندىق دەڭگەيىنە بايلانىستى.

ايتا كەتەيىك، ءبىزدىڭ ەلدە ۇ ب ت سىناعى 16-مامىردا باستالىپ، 5 -شىلدەگە دەيىن جالعاسادى. تەست 4 ساعاتقا سوزىلادى، ال ەرەكشە ءبىلىم بەرۋ قاجەتتىلىگى بار بالالار ءۇشىن 40 مينۋتقا ۇزاعىراق.

24.kz