قىتايدا ماتەريالدىق ەمەس مادەني مۇرانىڭ قازاق ۋاكىلدەرى انىقتالدى - شەتەلدەگى قازاق باسپا ءسوزى
«KAZINFORM» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
شينحاي-شيزاڭ تاسجولىنىڭ بويىندا تيبەت بوكەندەرى مەن جابايى ەسەكتەرى جايىلىپ ءجۇر - «حالىق گازەتى»
شينحاي-شيزاڭ تاسجولىنىڭ شىعىسى شينحاي ولكەسىنىڭ سينين قالاسىنان باستالىپ، باتىسى سيجان اۆتونوميالىق رەگيونىنىڭ لحاسا قالاسىنان اياقتالادى.
شينحاي-شيزاڭ تاسجولىنىڭ بويىندا تيبەت بوكەندەرى سياقتى جابايى جانۋارلار جايىلىپ ءجۇر.
بۇل تۋرالى وسى اپتادا قىتايلىق «حالىق گازەتى» باسىلىمى حابارلايدى.
اتالعان ب ا ق-تىڭ دەرەگىنشە، جول بويىنداعى كورىنىس كوزدىڭ جاۋىن الادى. وندا جايلاۋدى، تۇزدى كولدى، قاعىر دالانى، قارلى تاۋلاردى، شولدەردى كورۋگە بولادى. 20-اقپان كۇنى ءتىلشى شينحايدىڭ گولمۋد قالاسىنان جولعا شىعىپ، شيزاڭعا كىرىپ، كۋنلۋن تاۋى، كەكەسيلي، سانجيانيۋان، يانشەپين، تانگۋلا تاۋلارى جانە باسقا جەرلەردى باسىپ وتكەن. جول بويى شينحاي-شيزاڭ تاسجولىنىڭ جاعاسىنان جايىلىپ جۇرگەن تيبەت بوكەندەرىن، تيبەت قارا قۇيرىقتارى جانە تيبەت جابايى ەسەكتەرىن كەزدەستىرگەن.
قىتايدا ماتەريالدىق ەمەس مادەني مۇرالاردىڭ قازاق مۇراگەرلەرى انىقتالدى - CNR
قىتايداعى ماتەريالدىق ەمەس مادەني مۇرالاردىڭ مەملەكەت دارەجەلى ۋاكىلدەرىنىڭ ەسىمدەرى بەلگىلى بولدى. ق ح ر مادەنيەت جانە ساياحات مينيسترلىگى 19-اقپان كۇنى مەملەكەت دارەجەلى ماتەريالدىق ەمەس مادەني مۇرالاردىڭ ۋاكىلدىك جالعاستىرۋشىسى دەپ كورسەتىلگەندەردىڭ تىزىمدىگىن جاريالادى.
بۇكىل ەل بويىنشا اتالعان تىزىمدىككە 958 ادام ەنگىزىلدى.
بۇل تۋرالى وسى اپتادا قىتايدىڭ «ورتالىق حالىق راديوسى» حابارلادى.
قىتايلىق ب ا ق-تىڭ مالىمەتىنشە، بۇلاردىڭ اراسىندا شينجاڭنان قازاق ماقال- ماتەلدەرىن جاڭعىرتۋشى قۋان نارىنباي ۇلى، قازاق تەرمە ونەرىنىڭ مۇراگەرى نۇرسارا اتەيبەك قىزى، قازاقتىڭ ۇلتتىق ات سپورت ءتۇرىنىڭ ءبىرى بولعان قىز قۋار ويىنىنىڭ مۇراگەرى كۇلان زەيتىنەر قىزى. سونداي-اق قازاق كەستەشىلىك ونەرىنىڭ مۇراگەرى اتانعان گۇلناز جانىمقان قىزى قاتارلى 23 ادام مەملەكەت دارەجەلى ماتەريالدىق ەمەس مادەني مۇرالاردىڭ مۇراگەرلەرى قاتارىنان ورىن العان.
موڭعوليادا قىس باسىنان بەرى كەمىندە 660000 باس مال شىعىنعا ۇشىرادى - «جەنمين جيباو»
موڭعوليانىڭ توتەنشە جاعدايلار جونىندەگى باس باسقارماسىنىڭ مالىمەتى بويىنشا، بيىلعى قىستا موڭعوليادا جاۋعان قار جىلدىق ورتاشا مولشەردەن 1,6 ەسە كوپ بولىپ، سوڭعى 50 جىلداعى ەڭ قالىڭ قار جاۋعان جىل بولدى، دەپ جازادى قىتايلىق «جەنمين جيباو».
قىتايلىق ب ا ق-تىڭ مالىمەتىنشە، موڭعوليانىڭ ۇلتتىق مەتەورولوگيالىق جانە قورشاعان ورتانى باقىلاۋ بيۋروسى 20- كۇنى حابارلاعانداي، 2023 -جىلى قىس مەزگىلى باستالعالى بەرى ەلدەگى ورتاشا جاۋعان قار 1975 -جىلدان بەرگى ەڭ جوعارى رەكوردتى قۇرادى.
موڭعوليانىڭ ۇلتتىق مەتەورولوگيالىق جانە قورشاعان ورتانى باقىلاۋ بيۋروسىنىڭ مالىمەتتەرى كورسەتكەندەي، قىس باستالعالى ەلدەگى ورتاشا جاۋعان قار مولشەرى 9,6 ميلليمەترگە جەتكەن، بۇل جىلدىق ورتاشا جاۋعان قاردان 1,6 ەسە كوپ.
ەلدىڭ 190 نان استام وكرۋگى مەن استاناسى ۇلانباتىردىڭ ەكى اۋدانى كوكتەمگى وندىرىستە كۇردەلى قيىندىقتارعا تاپ بولدى.
موڭعوليادا سيرەك كەزدەسەتىن قاقاعان اياز ءجۇرىپ، قارلى بوران سوققان. قازىرگى ۋاقىتتا بۇكىل ەلدىڭ %80 دان استام جەرى قالىڭ قارمەن قىمتانىپ جاتىر. مال شارۋاشىلىق رايوندارىنىڭ جول قاتىناسى نەگىزىنەن قيىندىققا تاپ بولۋدا.
تاعى ءبىر حابارلاندىرۋعا قاراعاندا، ەلدە از دەگەندە 13 مىڭ 500 مالشى وتباسى مال شارۋاشىلىق رايونىنان شىعا الماي قامالىپ قالعان. 38 مىڭ 400 كيلومەتر جولدى قالىڭ قار باسىپ جاتىر ەكەن.
«موڭعوليانىڭ ورتالىق جانە شىعىس بولىگىندەگى كەنت، سۋح-باتور، شىعىس جانە شىعىس گوبي پروۆينتسيالارىندا، سونداي-اق ورتالىق جانە باتىس بولىگىندەگى گوحانگاي پروۆينتسياسىندا اپاتتاردىڭ اۋىر ەكەنى بەلگىلى. تولىق ەمەس ستاتيستيكاعا سۇيەنسەك، قىس باستالعالى بەرى كەمىندە 660 مىڭ باس مال شىعىنعا ۇشىراعان»، دەپ جازادى قىتايلىق ب ا ق.
ايتا كەتەيىك، موڭعوليا - دۇنيە جۇزىندەگى كوشپەلى ءداستۇرىن ءالى كۇنگە دەيىن ساقتاپ كەلە جاتقان ەلدەردىڭ ءبىرى، ال مال شارۋاشىلىعى - ول ەلدىڭ ماڭىزدى تىرەك سالاسى. موڭعوليا مەملەكەتتىك ستاتيستيكا كوميتەتى جاريالاعان ساندى مالىمەتكە سۇيەنسەك، 2023 -جىلدىڭ سوڭىندا وسى ەلدىڭ قولدا بار مال سانى 64 ميلليون 700 مىڭ باس بولعان.
قىز- كەلىنشەكتەردى زاماناۋي ماماندىقتارعا ۇيرەتۋ ءۇشىن «قىزدار اكادەمياسى» پلاتفورماسى ىسكە قوسىلادى - «ءوز ا»
2024 -جىلدىڭ 21-اقپانىندا وزبەكستان رەسپۋبليكاسى پرەزيدەنتىنىڭ «وزبەكستان-2030» ستراتەگياسىن «جاستار جانە بيزنەستى قولداۋ جىلى» ىسكە اسىرۋ تۋرالى جارلىعى قابىلداندى. اتالعان جارلىققا سايكەس، جاس قىز-كەلىنشەكتەردى كاسىپكەرلىك، ماركەتينگ، گرافيكالىق ديزاين سىندى زاماناۋي ماماندىقتارعا ۇيرەتەتىن «قىزدار اكادەمياسى» الاڭى ىسكە قوسىلماق، دەپ حابارلايدى «ءوز ا» اقپارات اگەنتتىگى.
وزبەكستاندىق باسىلىمنىڭ دەرەگىنشە، اتالعان قاۋلىعا سايكەس، 2024 -جىلدىڭ 1 -ناۋرىزىنان باستاپ «ەشلار دافتاري» («جاستار داپتەرى») قورىنىڭ قاراجاتىن جاستاردى شەت تىلدەرى مەن كاسىپكە وقىتۋ ماقساتتارىنا باعىتتاۋ تاجىريبەسى جولعا قويىلادى. جاستاردى زاماناۋي كاسىپكە باۋلۋعا ارنالعان «ۇستاز» ارنايى پلاتفورماسى ىسكە قوسىلىپ، باستاپقى كەزەڭدە 250 مىڭ جاس وسى پلاتفورما ارقىلى قامتىلادى.
«سونداي-اق، جاس قىز-كەلىنشەكتەردى كاسىپكەرلىك، ماركەتينگ، گرافيكالىق ديزاين سىندى زاماناۋي ماماندىقتارعا ۇيرەتەتىن «قىزدار اكادەمياسى» الاڭى ىسكە قوسىلماق. وسى ارقىلى جاس قىز-كەلىنشەكتەر ءۇشىن ءتۇرلى بايقاۋلار، جوبالار، وقۋ-جاتتىعۋ جيىندارى، تاعىلىمدامالار ۇيىمداستىرىلادى»، دەپ جازادى «ءوز ا».
سونداي- اق وسى اپتادا «ءوز ا»-دا «وزبەكستاندا 2023 -جىلى 21 مىڭنان استام ەگىز ءسابي تۋعان» دەگەن تاقىرىپتاعى اقپارات جاريالاندى.
ستاتيستيكا اگەنتتىگىنىڭ مالىمەتى بويىنشا، 2023 -جىلى رەسپۋبليكادا 962 مىڭ نارەستە تىركەلگەن. ونىڭ ىشىندە 21 مىڭ 12 ەگىز سابيلەر.
جازبا سوڭىندا ءار ايماقتاعى تۋعان ەگىزدەردىڭ سانىن جاريالاعان.
قازاقستان استىعىن يرانعا ەكسپورتتاۋدى قالپىنا كەلتىرمەك — «Parstoday»
قازاقستان «FREEDOM SKY TRADING FZCO» كومپانياسىمەن يرانعا قازاقستاندىق استىقتى جەتكىزۋدى قالپىنا كەلتىرۋ تۋرالى كەلىسسوزدەر جۇرگىزۋدە، دەپ حابارلايدى يراننىڭ «Parstoday» اقپارات اگەنتتىگى.
اتالعان باسىلىمنىڭ «dairynews»- كە سىلتەمە جاساپ حابارلاۋىنشا، ونىمدەرگە ارپا، جەمدىك بيداي جانە جۇگەرى كىرەدى. بۇل كەلىسسوزدەر وسى اۋىلشارۋاشىلىق تاۋارلارىن سۋ جانە قۇرلىق جولدارى ارقىلى يرانعا تاسىمالداۋ سالاسىندا ىنتىماقتاستىق ورناتۋدى ماقسات ەتەدى. بۇل كومپانيا وكىلدەرىنەن الىنعان اقپاراتقا سايكەس، قازاقستاننان يرانعا استىق جەتكىزۋ توقتاتىلدى. بۇعان سەبەپ يراننىڭ رەسەيدەن استىق ساتىپ الۋعا باسىمدىق بەرۋىمەن، اسىرەسە رەسەي فەدەراتسياسى ونىمدەرىنىڭ باعاسى تومەندەگەننەن كەيىن بولعان.
ايتا كەتەيىك، قازاقستان مەن يران اراسىندا بيداي مەن ارپا سياقتى اۋىل شارۋاشىلىعى تاۋارلارى سالاسىندا بۇرىننان كەلە جاتقان ساۋدا قارىم- قاتىناستارى بار. قولايلى نارىقتىق كونيۋنكتۋرانى ەسكەرە وتىرىپ، استىق ەكسپورتىنىڭ تۇراقتى پروتسەسىن قۇرۋ ەلدەر اراسىنداعى ساۋدانى دامىتۋدىڭ ماڭىزدى اسپەكتىلەرىنىڭ ءبىرى بولىپ تابىلادى.
تۇرىكمەن اقىنىنىڭ 300 جىلدىق مەرەيتويى قازاقستاندا تويلاندى - TRT
تۇرىكمەننىڭ ۇلى اقىنى، ويشىلى ماقتىمق ۇلى پىراعىنىڭ تۋعانىنا 300 جىل تولۋىنا وراي مەرەكەلىك ءىس-شارا قازاقستاننىڭ ەلورداسى استانا قالاسىندا ءوتتى.
تۇرىكمەنستاننىڭ قازاقستانداعى ەلشىلىگى تاراپىنان ۇيىمداستىرىلعان ءىس-شاراعا عالىمدار، ديپلوماتتار، ونەر قايراتكەرلەرى جانە ستۋدەنتتەر قاتىستى، دەپ حابارلادى تۇركيا راديو تەليەۆيزيا پورتالى.
اتالعان ب ا ق- تىڭ دەرەگىنە سۇيەنسەك، تۇرىكمەنستاننىڭ قازاقستانداعى ەلشىسى باتىر رەجەپوۆتىڭ ايتۋىنشا، ماقتىمق ۇلى پىراعىنىڭ 300 جىلدىعىنا ارنالعان ءىس- شارا ەل ىشىندە دە، شەت مەملەكەتتەردە دە كەڭ كولەمدە اتالىپ وتىلۋدە. قازاق اقىنى، ءارى اعارتۋشىسى اباي قۇنانبايەۆ پەن ماقتىمق ۇلى پىراعىنىڭ ورتاق تۇستارى كوپ.
وسى ايادا تۇرىكمەنستاننىڭ استاناسى اشحابادتا اباي اتامىزدىڭ ەسكەرتكىشى، ال استانادا ماقتىمق ۇلى پىراعىنىڭ ەسكەرتكىشى ورناتىلعان.
شارادا تۇرىكمەنستاننان كەلگەن انشىلەر اقىننىڭ ولەڭدەرىنە جازىلعان اندەرىن ورىنداعان.
ەسكە الۋ جيىنىنىڭ سوڭىندا ماقتىمق ۇلى پىراعىنىڭ قازاق تىلىنە اۋدارىلعان ولەڭدەر كىتابى قازاقستاننىڭ سيرەك كىتاپتار مەن قولجازبالار ورتالىعىنا تاپسىرىلدى.
اۆتور
بەيسەن سۇلتان ۇلى
