قىتايدا ماسا ارقىلى تارالاتىن قاۋىپتى ۆيرۋستىڭ ءورشۋى بايقالدى

استانا. KAZINFORM - قىتايدىڭ وڭتۇستىگىندە چيكۋنگۋنيا قىزباسىنىڭ ءورشۋى تىركەلدى، دەپ حابارلايدى شينحۋا.

فوشان قالاسىندا چيكۋنگۋنيا قىزباسى تىركەلىپ، ول سىرتتان اكەلىنگەن جاعدايدان كەيىن جەرگىلىكتى دەڭگەيدە تارالا باستادى. اۋداندىق دەنساۋلىق ساقتاۋ باسقارماسىنىڭ مالىمەتىنشە، العاشقى جاعداي 8-شىلدەدە انىقتالعان. 15-شىلدەدەگى جاعداي بويىنشا، 478 راستالعان جاعداي تىركەلگەن، ولاردىڭ بارلىعى جەڭىل تۇردەگى اۋرۋعا جاتادى. نەگىزگى جۇقتىرۋ وشاقتارى - لەتسۋن، بەيتسزياو جانە چەنتسۋن ەلدى مەكەندەرى.

حابارلامادا ايتىلعانداي، چيكۋنگۋنيا قىزباسى - Aedes ماسالارى ارقىلى تارالاتىن ءجىتى ۆيرۋستىق اۋرۋ. ونىڭ باستى بەلگىلەرى - جوعارى دەنە قىزۋى، بورتپە جانە بۋىنداردىڭ اۋىرۋى. اۋرۋدىڭ كلينيكالىق كورىنىسى دەنگە قىزباسىنا ۇقساس بولىپ كەلەدى.

ىستىق ءارى ىلعالدى اۋا رايىندا اۋرۋ تاسىمالداۋشى ماسالاردىڭ بەلسەندىلىگى ارتىپ، دەنگە مەن چيكۋنگۋنيا سياقتى جاندىكتەر ارقىلى بەرىلەتىن اۋرۋلاردىڭ تارالۋ قاۋپى جوعارىلايدى.

ساراپشىلار تۇرعىندارعا ماسالاردىڭ كوبەيۋىنە جول بەرمەۋ ءۇشىن اشىق ىدىستاعى سۋدى توگىپ، كونتەينەرلەردى تازالاپ تۇرۋعا جانە ارنايى قورعانۋ قۇرالدارىن قولدانۋعا كەڭەس بەرەدى. اۋرۋ بەلگىلەرى بايقالعان جاعدايدا دارىگەرگە جۇگىنىپ، جاندىك شاققانىن نەمەسە سوڭعى ساپارلار تۋرالى حابارلاۋ قاجەت.

بۇعان دەيىن كولۋمبيا سارى بەزگەكتىڭ ورشۋىنە بايلانىستى توتەنشە جاعداي جاريالاعانىن جازعانبىز.