قىتايدا ەكى بالانى ولتىرگەن ەرلى-زايىپتى ءولىم جازاسىنا كەسىلدى

استانا. KAZINFORM - قىتايدا ءبىرىنشى نەكەدەگى بالالارىن ءولتىردى دەپ تانىلعان ەر ادام مەن ونىڭ كوڭىل قوسقان قىزى ءولىم جازاسىنا كەسىلدى. ولار ەكى كىشكەنتاي بالانى تۇرعىن ءۇيدىڭ تەرەزەسىنەن لاقتىرىپ جىبەرگەن، دەپ حابارلايدى BBC.

بالالاردىڭ اكەسى جاڭ بو مەن ونىڭ سۇيىكتىسى ە چەنچەن 2020 -جىلى ەكى جاسار قىز بەن ءبىر جاسار ۇلدى ولتىرگەنى ءۇشىن كىنالى دەپ تانىلدى. جۇپ سارسەنبى كۇنى چۋڭشين قالاسىندا ءولىم جازاسىنا كەسىلدى.

ولارعا ءولىم جازاسى ناقتى قالاي ورىندالعانى بەلگىسىز، ءبىراق قىتايدا ءولىم جازاسى كوبىنە ولىمگە اكەلەتىن ينەكسيا نەمەسە اتۋ ارقىلى جۇزەگە اسىرىلادى.

سوت جاڭنىڭ ە- گە ءوزىنىڭ وتباسىلىق جاعدايىن ايتپاستان ونىمەن «ورىنسىز» قارىم-قاتىناستا بولعانىن ايتتى. الايدا شىندىقتى بىلگەننەن كەيىن ە ونىمەن كەزدەسۋدى جالعاستىردى.

جاڭ 2020-جىلدىڭ اقپانىندا ايەلىمەن اجىراستى. الايدا سۇيىكتىسى ونىڭ ەكى بالاسىن «نەكەگە تۇرۋىنا كەدەرگى جانە بولاشاق بىرگە ءومىر سۇرۋىنە اۋىرتپالىق» دەپ سانادى.

بويجەتكەن جاڭدى قوس ءسابيدى ولتىرۋگە تالاي يتەرمەلەگەن. قاسكۇنەم جۇپ بالالاردىڭ تەرەزەدەن قۇلاۋىن جازاتايىم وقيعا رەتىندە ۇيىمداستىرۋدى كەلىسكەن. 2020-جىلدىڭ 2-قاراشاسىندا جاڭ بالالارىن 15-قاباتتاعى پاتەرىنىڭ تەرەزەسىنەن لاقتىرىپ جىبەردى.

بۇل جاڭالىق ەلدەگى تاڭداۋلى ۋنيۆەرسيتەتتىڭ ستۋدەنتى بولعان ۋ سەيۋ ءولىم جازاسىنا كەسىلگەن كۇنى تارادى. جاس جىگىت 2015 -جىلى اناسىن گانتەلمەن ۇرىپ ولتىرگەنى ءۇشىن كىنالى دەپ تانىلعان.

اۆتور

زارينا تۋعانبايەۆا