قىتايدا كوپىر قۇلاپ، جۇرگىزۋشى جۇك كولىگىندە ءىلىنىپ قالدى
استانا. KAZINFORM - قىتايدىڭ گۋيجوۋ پروۆينتسياسىندا تاسجول كوپىرى قۇلاپ، جۇك كولىگىنىڭ جۇرگىزۋشىسى قيراعان كوپىردە ءىلۋلى تۇرعان كولىك كابيناسىندا قالىپ قويدى.
قىتايدىڭ «لۇدجۋن چەنباو» باسىلىمىنىڭ حابارلاۋىنشا، 2025 -جىلعى 24 -ماۋسىمدا ساعات 07:40 شاماسىندا گۋيجوۋ پروۆينتسياسىنىڭ ساندۋ اۋدانىنداعى G76 تاسجولىنىڭ حوۋچجىحە كوپىرىنىڭ كىرەبەرىس بولىگى قۇلادى. ونىڭ قۇلاۋىنا ۇزدىكسىز جاۋعان قاتتى جاڭبىردان تۋىنداعان تاۋ جىنىستارىنىڭ سىرعۋى سەبەپ بولعان. وقيعا كەزىندە كوپىردە ءبىر قىزىل جۇك كولىگى بولدى، ونىڭ الدىڭعى بولىگى اۋادا ءىلۋلى تۇرىپ، جۇرگىزۋشى كابينادا قالىپ قويدى.
قىتايدىڭ «لۇدجۋن چەنباو» باسىلىمى مەن گۋيجوۋ پروۆينتسياسىنىڭ كولىك باسقارماسىنىڭ مالىمەتتەرى بويىنشا، ءورت سوندىرۋشىلەر جۇرگىزۋشىنى امان-ەسەن قۇتقارعان، وقيعا ورنىندا قازا بولعاندار نەمەسە جاراقات العاندار جوق.
كوپىر استىندا جاقىن ماڭداعى اۋىلدارعا تيەسىلى قۇرىلىس جۇمىستارىنا ارنالعان ءۇش كولىك بولعانى انىقتالدى، ءبىراق درونمەن تەكسەرۋ ناتيجەسىندە كولىكتەردىڭ ىشىندە ەشكىم بولماعانى راستالدى.
وقيعادان بۇرىن، 24 -ماۋسىمدا ساعات 05:51- دە كولىك باسقارماسى قىزمەتكەرلەرى كوپىردىڭ دەفورماتسياسىن بايقاپ، جولدىڭ جوعارى باعىتىن دەرەۋ جاۋىپ تاستادى. ساعات 07:11- دە جولدىڭ ەكى باعىتىنا دا ۋاقىتشا شەكتەۋ ەنگىزىلدى. توتەنشە جاعدايلار، پوليتسيا جانە كولىك باسقارماسىنىڭ قىزمەتكەرلەرى وقيعا ورنىنا جەدەل جەتىپ، قۇتقارۋ جۇمىستارىن ۇيلەستىرىپ، اينالما جولداردى ۇيىمداستىرىپ جاتىر. كوپىردىڭ قۇلاۋ سەبەبى قازىر تەرگەلىپ جاتىر.
بۇدان بۇرىن ءۇندىستاننىڭ ماحاراشترا شتاتىنىڭ پۋنا قالاسىندا كوپىر وپىرىلىپ، ءتورت تۋريست قازا تاپتى.
اۆتور
مۇقتار مۇرات
