قىتايدا «جۇمىسقا بارعىسى كەلمەيتىندەردى ەمدەيتىن كلينيكا» اشىلدى

استانا. KAZINFORM - «جۇمىسقا بارعىسى كەلمەيتىندەردى ەمدەيتىن كلينيكا» قىزمەتكەرلەرى كليەنتتەرگە جۇمىسقا بايلانىستى مازاسىزدىق، دەپرەسسيا جانە شارشاۋ سياقتى ماسەلەلەرمەن كۇرەسۋگە كومەكتەسەدى.

- بۇل سىرتقى بەلگىلەر كوبىنەسە كۇردەلى پسيحولوگيالىق نەمەسە الەۋمەتتىك فاكتورلاردان تۋىندايدى. ءبىزدىڭ مىندەتىمىز - مامان رەتىندە وسى سەبەپتەردى انىقتاپ، جۇيەلى تۇردە باعالاپ، دياگنوز قويىپ، ەمدەۋ مەن قولداۋ كورسەتۋ، - دەدى كلينيكا باسشىسى يۋە ليمين.

دياگنوستيكا ۇدەرىسىنە پاتسيەنتتەردىڭ جالپى ەموتسيونالدىق جاعدايىن باعالاۋ ءۇشىن سۇحبات وتكىزۋ جانە گيپەرتيرەوز سەكىلدى ورگانيكالىق اۋرۋلاردى جوققا شىعارۋ ءۇشىن تەكسەرۋ كىرەدى. سودان كەيىن دارىگەرلەر ءار ناۋقاسقا جەكە ەمدەۋ جوسپارىن ازىرلەيدى.

بۇل قىزمەتتى قۇرۋ يدەياسىن بۇرىن بالالارى «مەكتەپكە بارعىسى كەلمەيتىن» بالالارعا ارنالعان كلينيكاعا بارعان اتا-انالار ۇسىنعان.

الەۋمەتتىك جەلى قولدانۋشىلارى بۇل باستامانى ءازىل رەتىندە قابىلدادى.

«بۇل كلينيكانى ويلاپ تاپقان ادام - ناعىز دانىشپان!» - دەپ جازدى ءبىر قولدانۋشى.

«كلينيكاعا كىرەسىڭ دە، ەشقانداي دارىگەر كورمەيسىڭ، سەبەبى ولار دا جۇمىسقا كەلگىسى كەلمەيدى»، - دەپ قالجىڭدادى تاعى ءبىرى.

بۇعان دەيىن قىتايدا التسگەيمەر اۋرۋىن ەمدەۋگە ارنالعان ەكسپەريمەنتتىك حيرۋرگياعا تىيىم سالىنعانى حابارلانعان ەدى.