قىتايدا «دومبىرا كۇنى» اتالىپ ءوتتى
بەيجىڭ. KAZINFORM - قازاقستاننىڭ قىتايداعى ەلشىلىگى بەيجىڭ ۇلتتىق اسپاپتار وركەسترىنىڭ وقۋشىلارىمەن جانە ۇستازدارىمەن بىرلەسىپ «قازاقستاننىڭ ۇلتتىق مەرەكەسى - دومبىرا كۇنىن» اتاپ ءوتتى.
ەلشىلىكتىڭ Instagram پاراقشاسىندا جاريالاعان اقپاراتتا جاس مۋزىكانتتار ۇستازدارمەن بىرگە «كەلىنشەك كۇيىن» ورىنداعانى ايتىلعان.
2015 -جىلى رەسمي تۇردە قۇرىلعان بەيجىڭ ۇلتتىق وركەسترى - بەيجىڭدەگى قازاقتىڭ ۇلتتىق اسپابى «دومبىرادا» ويناۋدى كاسىبي تۇردە ۇيرەتەتىن جالعىز وركەستر بولىپ تابىلادى. بۇل وركەستر قىتايداعى جانە شەت ەلدەردەگى ەڭ ۇلكەن ساحنالاردا ونەر كورسەتەتىن 500 دەن استام مۋزىكانتتارى بار بەيجىڭدەگى ەڭ ءىرى مۋنيتسيپالدىق مادەني جانە ونەر ۇجىمدارىنىڭ ءبىرى.
ايتا كەتەيىك، ۇلتتىق دومبىرا كۇنى قازاقستاندا جىل سايىن شىلدەنىڭ العاشقى جەكسەنبىسىندە اتالىپ وتەدى.
ايدار وسپاناليەۆ
