قىتايدا التىن كۇرت ارزانداپ، حالىق اشەكەي بۇيىمداردى جاپپاي ساتىپ الىپ جاتىر

استانا. قازاقپارات - قىتايدا التىن كۇرت ارزاندادى. باعالى مەتال قۇنى وسى ايدا بىرنەشە رەت قۇلدىراپ رەكوردتىق دەڭگەيگە دەيىن تومەندەدى. بۇل لەزدە سۇرانىستى ارتتىرىپ، كەيبىر شاھاردا ساتىپ الۋشىلار اراسىندا دۇربەلەڭ تۋعىزدى.

قىتايدا التىننىڭ باعاسى ناۋرىز ايىنىڭ باسىنان بەرى بىردەن 15 مىڭ تەڭگەگە ءبىر-اق قۇلدىرادى. قازىر جەرگىلىكتى حالىق اشەكەي بۇيىمداردى جاپپاي ساتىپ الۋعا كوشتى. دۇكەندەردە ساتىپ الۋشىلار لەگى 30-40 پايىزعا دەيىن ارتقان. التىن ساۋدالايتىن دۇكەندەر مەن دۇڭگىرشەكتەر لىق تولى. ەلدە التىن كەيىنگى 43 جىلدا مۇنداي رەكوردتىق دەڭگەيدە ارزانداپ كورمەگەن. قىتايلار التىندى جاپپاي ساتىپ الىپ جاتىر.

 ساراپشىلاردىڭ ايتۋىنشا، ءدال وسىنداي جاعداي 1983 -جىلى بولعان. ول كەزدە مۇناي باعاسى تىم تومەندەۋىنە بايلانىستى بولعان كورىنەدى. مۇناي ءوندىرۋشى ەلدەر شەتەل ۆاليۋتاسىن الۋ ءۇشىن قورداعى التىندى جاپپاي ساتىلىمعا شىعارۋىنان باعا قۇلدىراعان دەسەدى. بۇل ديناميكا بۇگىنگى نارىقتا دا كورىنىس تاۋىپ وتىر.

«بۇل ماكروەكونوميكالىق فاكتورلار التىننان دا ماڭىزدى ەكەنىن كورسەتىپ وتىر»، - دەيدى ماماندار.

 ليۋ نانسۋن، دامۋ جانە رەفورمالار جونىندەگى ۇلتتىق كوميسسيانىڭ باعانى باقىلاۋ جانە تالداۋ ورتالىعىنىڭ مامانى:

- ناۋرىز ايىنىڭ باسىنان بەرى ءبىر گرام التىننىڭ باعاسى 200 يۋانعا تومەندەدى. ال وسى اپتانىڭ ىشىندە تاعى 100 يۋانعا ارزاندادى. باعا سۇرانىس تۋعىزىپ وتىر. بۇل نارىق.

گۋاڭجوۋ، شىنجىن، شاڭحاي سياقتى ءىرى قالالارمەن قاتار وزگە دە ورتا دەڭگەيلى شاھارلاردا ءدال وسىنداي جاعداي قالىپتاسىپ وتىر. ءبىر ەمەس بىرنەشە التىن بۇيىمنان ساتىپ الىپ جاتقاندار بار.

 ايتا كەتۋ كەرەك، بۇعان دەيىن ساراپشىلار گەوساياسي تاۋەكەلدەر باعالى مەتالدار ءۇشىن قولايلى بولۋى ءتيىس دەپ بولجاعان ەدى. الايدا نارىق ءوز دەگەنىن ىستەپ وتىر.

24.kz