قىتايدا العاش رەت روبوت دوكتورانتۋراعا وقۋعا قابىلداندى
استانا. KAZINFORM - قىتايدا العاش رەت گۋمانويد روبوت دوكتورانتۋراعا قابىلداندى. ول «دراما جانە كينو» ماماندىعى بويىنشا وقيتىن بولادى، دەپ جازدى South China Morning Post باسىلىمى.
Xueba 01 اتتى روبوت قىتايداعى جەتەكشى ونەر وقۋ ورىندارىنىڭ ءبىرى - شاڭحاي تەاتر اكادەمياسىنا (STA) قابىلداندى. ول دوكتورانتۋرا باعدارلاماسى اياسىندا ءداستۇرلى قىتاي وپەراسىن تەرەڭدەتىپ زەرتتەيدى. ساباقتار 14-قىركۇيەكتە باستالادى. وقىتۋ قۇنى جاريالانعان جوق.
بۇل روبوتوتەحنيكا سالاسىنداعى دوكتورانتۋرا باعدارلاماسى - ونەر مەن تەحنولوگيانى بىرىكتىرۋگە باعىتتالعان عىلىمي جوبانىڭ ءبىر بولىگى.
روبوتتىڭ سيپاتتاماسى:
بيىكتىگى: 1,75 مەتر
سالماعى: شامامەن 30 كەلى
سىرتقى كەلبەتى: سيليكون تەرىسى بار سىمباتتى ەر ادامعا ۇقسايدى
كيىمى: كوزىلدىرىك، كويلەك جانە شالبار
ءتىلى: ادامدارمەن قىتاي تىلىندە سويلەسەدى
روبوت دوكتورانتتارمەن بىرگە وپەرالىق قويىلىمداردى دايىندىقتا جاساپ، ساباقتارعا قاتىسىپ وتىرادى.
بۇرىنعى جەتىستىگى:
Xueba 01-دىڭ الدىڭعى نۇسقاسى دۇنيەجۇزىندەگى العاشقى گۋمانويد جارتىلاي مارافونىندا ءۇشىنشى ورىن العان.
قوعامدىق رەاكسيا:
جاڭالىق الەۋمەتتىك جەلىلەردە قىزۋ تالقىعا ءتۇستى.
- Xueba 01 - ادام مەن روبوت اراسىنداعى قاتىناستاردا ماڭىزدى ميسسيانى ءوز موينىنا الدى. ءبىز اقىرى روبوتتارمەن بىرگە ءومىر ءسۇرىپ، بىرگە ءبىلىم الاتىن دەڭگەيگە جەتتىك. ونىڭ جولى بولسىن!، - دەپ ءبىر قولدانۋشى جازدى.
الايدا سكەپتيكالىق كوزقاراس بىلدىرگەن دە بولدى.
- ونەرگە ومىرلىك تاجىريبە كەرەك. الگوريتممەن باسقارىلاتىن روبوتتىڭ تۋىندىلارى ادامداردىڭ جۇرەگىنە شىنايى اسەر ەتە المايدى، - دەپ جازدى باسقا قولدانۋشى.
ايتا كەتەيىك، بۇعان دەيىن گۋمانويد روبوتتىڭ دۋبايدا جولدان جۇگىرىپ وتكەن ۆيدەوسى الەۋمەتتىك جەلىلەردە ۆيرۋسقا اينالعان بولاتىن.
