قىتايدا اشىلاتىن قازاق مادەني ورتالىعىندا قانشا قىزمەتكەر جۇمىس ىستەمەك

استانا. KAZINFORM - بۇگىن سەناتتىڭ جالپى وتىرىسىندا «قازاقستان مەن قىتاي ۇكىمەتى اراسىندا ءوزارا مادەني ورتالىقتار قۇرۋ كەلىسىمىن راتيفيكاتسيالاۋ تۋرالى» زاڭى ماقۇلداندى.

Фото: Ақорда
Фото: Ақорда

«قىتايدا مادەني ورتالىقتاردى ءوزارا قۇرۋ تۋرالى شەشىم قابىلدانىپ، 2023-جىلعى 27-قاراشادا استانا قالاسىندا ۇكىمەتارالىق كەلىسىم جاسالدى. زاڭنىڭ نەگىزگى ماقساتى - بەيجىڭدە قازاقستان رەسپۋبليكاسىنىڭ، ال استانادا قىتاي حالىق رەسپۋبليكاسىنىڭ مادەني ورتالىعىن قۇرۋ. ورتالىقتاردى قۇرۋ ءوزارا قارىم-قاتىناستى نىعايتۋعا، ەكى حالىق اراسىنداعى ءوزارا تۇسىنىستىكتى جان-جاقتى قامتاماسىز ەتۋگە، دوستىق قارىم-قاتىناستاردى دامىتۋعا، مەملەكەتتەر اراسىنداعى مادەني-گۋمانيتارلىق ءىس-شارالار وتكىزۋگە، ەكى ەلدىڭ ءتىلىن، مادەنيەتىن، سالت-داستۇرلەرىن، تاريحىن تانىستىرۋعا ءوز سەپتىگىن تيگىزەتىن بولادى. كەلىسىمدە مادەني ورتالىق جىبەرۋشى مەملەكەت اككرەديتتەگەن، سول ەلدىڭ زاڭناماسىنا سايكەس جۇمىس ىستەيتىن كوممەرتسيالىق ەمەس ۇيىم - زاڭدى تۇلعا نىسانىندا جۇمىس اتقارادى»، - دەدى سەناتور عالياسقار سارىبايەۆ.

ونىڭ ايتۋىنشا، ورتالىقتارعا ءدىني، ميسسيونەرلىك نەمەسە سول مەملەكەتتىڭ زاڭناماسىنا قايشى كەلەتىن وزگە دە قىزمەت جۇرگىزۋىنە، سول سياقتى جەكە نەمەسە زاڭدى تۇلعالارعا وسىنداي قىزمەتتى جۇزەگە اسىرۋعا جاردەمدەسۋ رۇقسات ەتىلمەيدى.

زاڭدا مادەني ورتالىقتاردىڭ ورنالاسقان جەرىن انىقتاۋ، تابىستارى مەن مۇلكىنە سالىق سالۋ، باسشىسىنىڭ مارتەبەسى، تاعايىنداۋ، داۋلاردى رەتتەۋ ءتارتىبى، كەلىسىم جاساۋ، وزگەرىستەر مەن تولىقتىرۋلار ەنگىزۋ، زاڭدىق كۇشىنە ەنۋ، ۇزارتۋ مەرزىمدەرى قاراستىرىلعان.

«قازىر قازاقستان رەسپۋبليكاسىنىڭ مادەنيەت جانە اقپارات مينيسترلىگى قازاقستاندىق مادەني ورتالىق قىزمەتىنىڭ تۇجىرىمداماسىن ازىرلەدى. تۇجىرىمداماعا سايكەس، ورتالىق عيماراتىندا ءتۇرلى ءىس-شارالار، كينو، كونتسەرتتىك قويىلىمدار وتكىزۋگە ارنالعان كوپفۋنكتسيونالدى زال، كۋرستار، ترەنينگتەر، شىعارماشىلىق كەزدەسۋلەر وتكىزۋگە ارنالعان كوۆورينگ ورىندارى بار كىتاپحانا، كورمەلەر مەن تانىستىرۋ ءىس-شارالارىن ۇيىمداستىرۋعا ارنالعان ەكسپوزيتسيالىق الاڭ مەن مۋلتيمەديالىق كەڭىستىك، سونداي-اق تۋريزم بۇرىشىن ورنالاستىرۋ كوزدەلگەن. بەيجىڭدەگى قازاقستاندىق مادەني ورتالىقتىڭ شتات سانى 13 قىزمەتكەردەن تۇرادى، ونىڭ ىشىندە 3 قىزمەتكەر - قازاقستان ازاماتتارى، 10 قىزمەتكەر - قىتاي تاراپىنان جالداناتىن ازاماتتار بولادى. قىتايداعى وتانىمىزدىڭ مادەنيەت ورتالىعى رەسپۋبليكالىق بيۋجەتتەن قارجىلاندىرىلادى»، - دەدى دەپۋتات.

ۇكىمەت پەن ۋاكىلەتتى ورگاننىڭ قۇزىرەتتەرىن ايقىنداۋ ماقساتىندا «ق ر مادەنيەت تۋرالى» زاڭىنا ءتيىستى تۇزەتۋلەر مەن وزگەرىستەر ەنگىزىلەتىن بولادى.

«كەلىسىمدى راتيفيكاتسيالاۋ ەكى ەل اراسىندا مادەني-گۋمانيتارلىق، عىلىم مەن ءبىلىم بەرۋ بايلانىستارىن ودان ءارى كەڭەيتۋگە، مادەنيەت جانە ونەر قايراتكەرلەرىنىڭ كەڭ اۋقىمىن تارتۋ ارقىلى تۋريستىك الەۋەتتى دامىتۋعا، تاريحي-مادەني مۇراسىن ىلگەرىلەتۋگە وڭ سەرپىن بەرەدى»، - دەدى سەناتور.

سوڭعى جاڭالىقتار