قىتايدا 6G- دى ىسكە قوستى: ينتەرنەت جىلدامدىعى 5G- دەن 14 ەسە جوعارى
استانا. قازاقپارات – China Mobile كومپانياسى الەمدەگى العاشقى 6G بايلانىس جەلىسىن سىناقتان وتكىزدى.
بۇل - التىنشى بۋىنداعى سىمسىز تەحنولوگيالاردى سىناۋعا ارنالعان العاشقى جوبا. جەلى ينفراقۇرىلىمىنا 10 بازالىق ستانسيا كىرەدى. جوبا ازىرگە تەك زەرتتەۋ ماقساتىندا جۇزەگە اسىرىلۋدا جانە كوممەرتسيالىق قولدانىسقا ارنالماعان.
بۇل تۋرالى MyDrivers باسىلىمى جازدى.
China Mobile مالىمەتىنشە، پيلوتتىق سىناقتار بارىسىندا دەرەكتەردى بەرۋ جىلدامدىعى 280 گبيت/س دەڭگەيىنە جەتكەن. بۇل كورسەتكىش قازىرگى 5G جەلىلەرىنىڭ تەوريالىق شەگىنەن 14 ەسەگە جوعارى. مۇنداي جىلدامدىقپەن 50 گ ب كولەمىندەگى اقپاراتتى نەبارى 1,4 سەكۋندتا جۇكتەۋگە بولادى - بۇل قازىرگى ەڭ جىلدام سىمدى ينتەرنەتتەن الدەقايدا ءتيىمدى.
كومپانيانىڭ ايتۋىنشا، 6G باعىتىنداعى عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا سالىنعان جالپى ينۆەستيتسيا كولەمى 39,1 ميلليارد يۋاننان اسقان. China Mobile قىتايداعى ءتورت ءىرى ۇلتتىق عىلىمي-تەحنيكالىق جوباعا قاتىسىپ، الدىڭعى قاتارلى 10 6G- تەحنولوگيانى دامىتۋ بويىنشا ستراتەگيالىق باعىتتاردى بەلگىلەدى.
الدىن الا جوسپارعا سايكەس، قىتايدا 6G جەلىلەرىنىڭ تولىق اۋقىمدى ىسكە قوسىلۋى 2028-جىلعا قاراي باستالۋى مۇمكىن.
