قىتاي ينتەل كومپانياسىنا تەرگەۋ جۇرگىزۋى مۇمكىن
استانا. KAZINFORM - سينگاپۋرلىق «Lianhe Zaobao» باسىلىمى قىتايدىڭ الەمدىك چيپ ءوندىرىسى سالاسىنداعى جەتەكشى كاسىپورىن - Intel كومپانياسىنا تەرگەۋ جۇرگىزۋدى قاراستىرىپ وتىرعانىن حابارلادى.

باسىلىمنىڭ جازۋىنشا، قىتاي بيلىگى ا ق ش-تىڭ Google جانە NVIDIA كومپانيالارىنا مونوپولياعا قارسى تەرگەۋدى قايتا باستاۋ تۋرالى شەشىم قابىلداعاننان كەيىن، Intel-گە قاتىستى جاڭا تەرگەۋ جۇرگىزۋ مۇمكىندىگىن قاراستىرىپ جاتسا كەرەك.
ءمان-جايدى بىلەتىن تۇلعالاردىڭ ءبىرى قازىرگى ۋاقىتتا Intel-گە قاتىستى تەرگەۋدىڭ سيپاتى ءالى انىقتالماعانىن جانە ونىڭ رەسمي تۇردە باستالۋى قىتاي مەن ا ق ش اراسىنداعى قارىم-قاتىناستىڭ قالاي داميتىنىنا بايلانىستى بولاتىنىن ايتقان. باسىلىمنىڭ اتاپ كورسەتۋىنشە، قىتاي ءتوراعاسى شي جيينپيڭ مەن ا ق ش پرەزيدەنتى دونالد ترامپ جاقىن كۇندەرى تەلەفون ارقىلى سويلەسۋى مۇمكىن.
قىتاي Intel ءۇشىن ەڭ ءىرى نارىق. 2024 -جىلى كومپانيانىڭ قىتايداعى ساتىلىمى 15,5 ميلليارد دوللارعا جەتىپ، جاھاندىق تابىسىنىڭ %29 ىن قۇرادى.
قىتايدىڭ نارىقتى رەتتەۋ جونىندەگى مەملەكەتتىك باس باسقارماسى وتكەن جىلدىڭ جەلتوقسان ايىندا NVIDIA كومپانياسىنا قاتىستى مونوپولياعا قارسى تەرگەۋ باستالعانىن جاريالاعان بولاتىن. 4-اقپان كۇنى Google-گە قاتىستى دا ءدال وسىنداي تەرگەۋ باستالعانى ءمالىم بولدى.
قىتايلىق شينحۋا ۋنيۆەرسيتەتىنىڭ ۇلتتىق ستراتەگيالار ينستيتۋتىنىڭ ساراپشىسى ليۋ سيۋي بۇل تەرگەۋلەر ترامپ ۇكىمەتىنىڭ جاڭا تاريفتىك شارالارىنا قارسى قىتاي بيلىگىنىڭ قىساس قايتارۋ ماقساتىنداعى شارالارىنىڭ ءبىر بولىگى بولۋى مۇمكىن دەپ باعالايدى.
الايدا، ساراپشىنىڭ پىكىرىنشە، مونوپولياعا قارسى تەرگەۋدى ساۋدا كەلىسسوزدەرىندە قۇرال رەتىندە پايدالانۋ ا ق ش-تىڭ تاريفتىك ساياساتىنان زارداپ شەككەن قىتايلىق كومپانيالاردى قورعاۋدىڭ ەڭ ءتيىمدى جولى بولماۋى مۇمكىن. ونىڭ ايتۋىنشا، بۇل شيەلەنىستى ودان سايىن ۋشىقتىرا تۇسەدى.
ايتا كەتەيىك، قىتايدىڭ ىسكەرلىك توپتارى ا ق ش-تىڭ كەدەندىك باج سالىعىن كوتەرۋىنە قارسى.
اۆتور
ەرلان مازان