قىتاي ورتالىق ازيانىڭ 5 ەلىنە 1,5 ميلليارد يۋان قايتارىمسىز كومەك ۇسىنباق
استانا. KAZINFORM - قىتاي حالىق رەسپۋبليكاسىنىڭ ءتوراعاسى شي جينپيڭ ورتالىق ازيا ەلدەرىن «ءبىر بەلدەۋ - ءبىر جول» جوباسىن ءارى قاراي دا ىلگەرىلەتە تۇسۋگە ۇندەدى.
- ءبىز بيىل ورتالىق ازيا ەلدەرىنە حالىقتىڭ ءال -اۋقاتىن ارتتىرىپ، بىرلەسىپ دامۋعا مۇمكىندىك بەرەتىن جوبالاردى قولداۋ ءۇشىن 1,5 ميلليارد يۋان مولشەرىندە قايتارىمسىز كومەك كورسەتۋگە دايىنبىز، - دەدى قىتاي باسشىسى استاناداعى سامميتتە.
ق ح ر ءتوراعاسى ورتالىق ازيا ەلدەرىن «ءبىر بەلدەۋ-ءبىر جول» جوباسىن ءارى قاراي دا ىلگەرىلەتە تۇسۋگە ۇندەدى.
- قىتاي ءاردايىم ورتالىق ازيا مەملەكەتتەرىنىڭ سەنىمدى جانە ىزگى كورشىسى بولىپ قالا بەرەدى. ءبىز ورتالىق ازيا ەلدەرىمەن تەڭ دارەجەدە، شىنايى ءارى دوستىق نيەتپەن قارىم-قاتىناس ورناتىپ كەلەمىز جانە بۇل دوستىق ءاردايىم گۇلدەنە بەرەدى.
بۇگىن ءبىز ماڭگىلىك دوستىق پەن ىنتىماقتاستىق تۋرالى كەلىسىمگە قول قويامىز. بۇل كەلىسىم ءبىزدىڭ قارىم-قاتىناسىمىزدى قۇقىقتىق تۇرعىدان بەكىتەدى. بۇل - التى ەل اراسىنداعى قارىم-قاتىناس تاريحىنداعى جاڭا بەلەس جانە قىتايدىڭ كورشىلەس ەلدەرمەن جۇرگىزىپ وتىرعان سىرتقى ساياساتىنىڭ ءىرى جەتىستىگى. مۇنىڭ يگىلىگىن قازىرگىلەر دە، كەلەشەك ۇرپاق تا كورەتىنى انىق، - دەدى شي جينپيڭ.
ايتا كەتەيىك، ەلوردادا «ورتالىق ازيا - قىتاي» Ⅱ سامميتى ءوتىپ جاتىر.
ءىس-شاراعا مەملەكەت باسشىسى قاسىم-جومارت توقايەۆ، ق ح ر ءتوراعاسى شي جينپيڭ، وزبەكستان پرەزيدەنتى شاۆكات ميرزيەۆ، قىرعىزستان پرەزيدەنتى سادىر جاپاروۆ، تۇرىكمەنستان پرەزيدەنتى سەردار بەردىمۇحامەدوۆ جانە تاجىكستان پرەزيدەنتى ەمومالي راحمون قاتىسىپ وتىر.
«ورتالىق ازيا-قىتاي» 1-سامميتى 2023 -جىلدىڭ 19- مامىرىندا قىتايدىڭ شيان قالاسىندا وتكەن ەدى.
اۆتور
ەسىمجان ناقتىباي
