قىتاي-ورتالىق ازيا: مادەني كوپىر جانە مەديا باستامالار
استانا. KAZINFORM - استانادا «تاتۋ كورشىلىك جانە دوستىق: بولاشاققا بىرگە قادام» ورتالىق ازيا-قىتاي گۋمانيتارلىق الماسۋ فورۋمى ءوتتى. فورۋمعا مەملەكەتتىك ورگانداردىڭ باسشىلارى، ب ا ق، عىلىمي جانە ساراپشىلىق قاۋىم وكىلدەرى قاتىستى.
فورۋم بارىسىندا مەملەكەتتىك كەڭەسشى ەرلان قارين بۇل كەزدەسۋدىڭ ماڭىزدىلىعىن اتاپ ءوتىپ، مۇندا تەك قىتاي مەن ورتالىق ازيا ەلدەرىنىڭ ىنتىماقتاستىعى عانا ەمەس، سونىمەن قاتار ميلليونداعان ادامنىڭ تاعدىرى توعىسقان ۇلانعايىر ايماقتىڭ بولاشاعى تالقىلاناتىنىن جەتكىزدى.
- ءبىز ءاردايىم ءوزارا ءتيىمدى ارىپتەستىك ماسەلەلەرىندە ورتاق تۇسىنىستىك تابا الامىز. مەملەكەت باسشىسى قاسىم-جومارت توقايەۆ اتاپ وتكەندەي، قىتايمەن جان-جاقتى ىنتىماقتاستىق - قازاقستاننىڭ ورتا مەرزىمدى تۇراقتى دامۋىنىڭ باستى فاكتورى، - دەدى مەملەكەتتىك كەڭەسشى.
ە. قاريننىڭ ايتۋىنشا، ايماقتىڭ باستى ەرەكشەلىگى - اشىقتىق، تۇراقتى ەكونوميكالىق ءوسىم جانە گۋمانيتارلىق، مەديا سالالارىنداعى تىعىز بايلانىس. اقپاراتتىق پروتسەستەردىڭ ءرولى ارتىپ، سيفرلىق تەحنولوگيالار ەنگىزىلىپ جاتقان قازىرگى زاماندا كونتەنت ءوندىرۋ، تەحنولوگيالارمەن الماسۋ جانە مادەني بايلانىستى نىعايتۋ باعىتىنداعى بىرلەسكەن جۇمىس وزەكتى بولا ءتۇستى.
فورۋمدا ءسوز سويلەگەن قىتاي مەديا كورپوراتسياسىنىڭ (CMG) باسشىسى، ق ح ر كوممۋنيستىك پارتياسى و ك ۇگىت-ناسيحات ءبولىمىنىڭ جەتەكشىسىنىڭ ورىنباسارى شەن حايسيۋن الداعى ۋاقىتتا كوپتەگەن بىرلەسكەن جوبا مەن تىعىز ىنتىماقتاستىق كۇتىپ تۇرعانىن ايتتى.
- ءتوراعا شي جينپيڭ ورتالىق ازيا مەملەكەتتەرىمەن قارىم-قاتىناسقا ەرەكشە ءمان بەرەدى. ول قىتاي ءاردايىم سەنىمدى كورشى، سەرىكتەس جانە دوس ەكەنىن ايتادى، - دەدى شەن حايسيۋن.
ونىڭ ايتۋىنشا، قىتاي مەديا كورپوراتسياسى ورتالىق ازيا حالىقتارىمەن دوستىقتى نىعايتۋعا بار كۇشىن سالۋدى جالعاستىرادى.
- ءبىز ورتالىق ازيانىڭ جەتەكشى ب ا ق- تارىنداعى سەرىكتەستەرمەن جوعارى ساپالى باعدارلامالار جاساپ، «ورتالىق ازيامەن تىكەلەي بايلانىس» اتتى اقپاراتتىق جوبالاردى ۇيىمداستىرىپ وتىرمىز. بۇل اقپارات پەن تاجىريبە الماسۋعا مۇمكىندىك بەرەدى. كوپسالالى، كوپفورماتتى جانە كوپارنالى ىنتىماقتاستىق ودان ءارى نىعايا بەرەدى، - دەدى ول.
ديالوگ الاڭىندا ءسوز العان قازاقستاننىڭ مادەنيەت جانە اقپارات ءمينيسترى ايدا بالايەۆا «ءبىر بەلدەۋ - ءبىر جول» باستاماسىندا مادەنيەتتىڭ ورنى ەرەكشە ەكەنىن اتاپ ءوتتى.
- بۇل جوبا - جاي عانا اۋقىمدى ينفراقۇرىلىمدىق باستاما ەمەس، سونىمەن قاتار حالىقتارىمىزدىڭ جۇرەكتەرىن جالعايتىن كوپىر. گۋمانيتارلىق بايلانىستار، مادەني بىرلەسكەن باستامالار مەن مەديا ىنتىماقتاستىق سەنىم مەن اشىق ديالوگ كەڭىستىگىن قالىپتاستىرادى. سەبەبى مەديا مادەنيەتتى ناسيحاتتاۋدا جانە حالىقتارىمىزدى جاقىنداتاتىن گۋمانيتارلىق جوبالاردى جاريا ەتۋدە اسا ماڭىزدى ءرول اتقارادى، - دەدى ايدا بالايەۆا.
فورۋم اياسىندا «شي جينپيڭنىڭ سۇيىكتى ناقىل سوزدەرى» جوباسىنىڭ حالىقارالىق نۇسقاسىنىڭ تۇساۋكەسەرى ءوتتى.
«كيىم ءرامىز رەتىندە: قىتايدان - الەمگە» جانە قىتايدىڭ CGTN تەلەارناسىنىڭ جۋرناليستەرى قازاقستاننىڭ Jibek Joly/Silk Way ارناسىنىڭ قولداۋىمەن جۇزەگە اسىرعان «ورتالىق ازيا بويىنشا ۇلكەن ساپار» جوبالارى قورىتىندىلاندى. بۇل جوبا اياسىندا قازاقستانداعى ءومىر تۋرالى رەپورتاجدار سەرياسى ءتۇسىرىلدى.
سونىمەن قاتار قىتاي مەن ورتالىق ازيا ەلدەرىنىڭ جەتەكشى ب ا ق پلاتفورمالارىندا جۇرەتىن «مەن قىتايدا وقىدىم» باعدارلاماسىنىڭ باستالعانى جاريالاندى.
كەزدەسۋ بارىسىندا اقپارات سالاسىنداعى ىنتىماقتاستىقتى نىعايتۋ ماسەلەلەرى قارالدى، سونىڭ ىشىندە فورۋم اياسىندا ۇسىنىلعان «قىتاي جانە ورتالىق ازيا ەلدەرىنىڭ ب ا ق ىنتىماقتاستىعى باستاماسى» دا نازارعا الىندى.
ەسكە سالساق، ق ر مەملەكەتتىك كەڭەسشىسى ەرلان قارين قىتاي مەن ورتالىق ازيانىڭ «تاتۋ كورشىلىك جانە دوستىق: بولاشاققا بىرگە قادام» اتتى گۋمانيتارلىق الماسۋ فورۋمىندا مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن وقىپ بەردى.
اۆتور
گۇلنۇر عازيز قىزى
