قىتاي تاعى ءبىرقاتار ەلگە ۆيزاسىز رەجيم ەنگىزدى

استانا. قازاقپارات - 1-ماۋسىمنان باستاپ قىتاي تاعى بەس ەلدىڭ ازاماتتارىنا ءبىرجاقتى ۆيزاسىز رەجيم ەنگىزدى، دەپ حابارلايدى The Paper اقپاراتتىق پورتالى.

ناقتىراق ايتقاندا، 2025 -جىلعى 1-ماۋسىمنان 2026 -جىلعى 31-مامىرعا دەيىن برازيليا، ارگەنتينا، چيلي، پەرۋ جانە ۋرۋگۆاي ەلدەرىنىڭ جالپى ازاماتتىق پاسپورت يەلەرى قىتايعا ۆيزاسىز كىرە الادى.

اتالعان بەس ەلدىڭ ازاماتتارى قىتايعا ىسكەرلىك، تۋريزم، تۋىسشىلاۋ، الماسۋ جانە ترانزيت ماقساتىندا 30 كۇننەن اسپايتىن مەرزىمگە ۆيزاسىز كەلە الادى.

بۇل - قىتايدىڭ لاتىن امەريكاسى مەن كاريب ايماعىنداعى ەلدەرگە العاش رەت ۆيزاسىز رەجيم ەنگىزۋى. وسىلايشا، قىتاي ءبىرجاقتى ۆيزاسىز رەجيم ەنگىزگەن ەلدەردىڭ قاتارى 43 كە جەتتى.

قىتاي سىرتقى ىستەر مينيسترلىگىنىڭ رەسمي وكىلى ماو نين 28-مامىردا وتكەن كەزەكتى بريفينگتە 2025 -جىلعى 9-ماۋسىمنان 2026 -جىلعى 8-ماۋسىمعا دەيىن ساۋد ارابياسى، ومان، كۋۆەيت جانە باحرەين ازاماتتارىنا 30 كۇندىك ءبىرجاقتى ۆيزاسىز رەجيم ەنگىزىلەتىنىن حابارلاعان بولاتىن.

قازاقستان مەن قىتاي ءوزارا ۆيزاسىز رەجيم تۋرالى كەلىسىمگە 2023 -جىلدىڭ 17-مامىرىندا قول قويعان.

2024 -جىلى قىتايدان كەلگەن تۋريستەر سانى 650 مىڭ ادامنان اسىپ، 2019 -جىلمەن سالىستىرعاندا 9 ەسە وسكەن.

اۆتور

ەرلان مازان