قىتاي سپۋتنيكتەرى كوبەيىپ كەلەدى: پرەزيدەنت كەڭەسشىسى زاڭ قابىلداۋدا كەشىكپەۋ كەرەگىن ايتتى

استانا. KAZINFORM – ق ر پرەزيدەنتىنىڭ كەڭەسشىسى قۋانىشبەك ەسەكەيەۆ شەتەلدىك ءىرى سپۋتنيك وپەراتورلارىن قازاقستاندا لوكاليزاتسيالاۋدىڭ ماڭىزدىلىعى تۋرالى پىكىر ءبىلدىردى.

Қытай спутниктері көбейіп келеді: Президент кеңесшісі заң қабылдауда кешікпеу керегін айтуда
Фото: Мухтор Холдорбков/Kazinform

Astana Hub الاڭىندا سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى ۇيىمداستىرعان «تەلەكوممۋنيكاتسيالار تۋرالى» زاڭ جوباسىن ازىرلەۋ تۋرالى ستراتەگيالىق سەسسيا ءوتىپ جاتىر.

ق. ەسەكەيەۆ قازاقستانداعى تەلەديدار نارىعىنىڭ دامۋى تۋرالى ايتىپ، 2010 -جىلى باستالعان سيفرلىق تەلەۆيزيانى ەنگىزۋدىڭ كەشىگۋى نارىققا ايتارلىقتاي وزگەرىستەر الىپ كەلگەنىن اتاپ ءوتتى.

- 2010 -جىلى مەملەكەت تەلەۆيزيا نارىعىن قۇرۋدى باستادى، وندا سيفرلىق تەلەۆيزيانى وتە جىلدام ەنگىزۋ جوسپارلانعان ەدى. وسى جىلدى الساق، جوبا 12 جىلعا سوزىلىپ كەلەدى. وسى 12 جىلدا نارىقتا قانداي وزگەرىستەر بولعانىن كوردىك. رەسەيلىك وپەراتورلار ليتسەنزياسىز-اق نارىقتا قىزمەت ەتە باستادى. قازىردىڭ وزىندە قازاقستاندا شامامەن ميلليون رەسەيلىك ابونەنت بار. سيفرلىق تەلەۆيزيانى دامىتۋدىڭ باياۋ ءجۇرۋى نارىقتىڭ قاتتى تۇرلەنۋىنە اكەلدى. قازىرگى ۋاقىتتا تەلەۆيزيا نارىعىن تەك موبيلدى وپەراتورلار قالىپتاستىرىپ وتىر، ال ءداستۇرلى نارىق، مىسالى، كابەلدىك تەلەۆيدەنيە ارقىلى جەتكىزۋ مۇلدەم جويىلدى. ال رەسەيدە، كەرىسىنشە، كوپتەگەن ءداستۇرلى كابەلدىك وپەراتورلار ينتەرنەت پەن تەليەۆيدەنيەنى بىرگە ۇسىنادى، - دەيدى پرەزيدەنت كەڭەسشىسى.

ونىڭ ايتۋىنشا، ۋاقىتىندا قابىلدانباعان زاڭ نورمالارى تۇتاس يندۋستريانى جويىپ جىبەردى. بۇگىندە وسىنداي جاعداي تەلەكوممۋنيكاتسيالار نارىعىندا دا قايتالانۋى مۇمكىن.

- نەگىزىندە، قازىر بايلانىس نارىعى ءدال وسىنداي كەزەڭدى باستان وتكەرىپ جاتىر. مىسالى، نيگەريادا Starlink وتە جىلدام وپەراتور اتاندى. ال رەتتەلمەگەن قىزمەت كورسەتۋ تەلەكوممۋنيكاتسيا نارىعىنىڭ قايتا قۇرىلۋىنا اكەپ سوقتى. كلاسسيكالىق ۇيالى بايلانىس بيزنەسىندە ستاندارتتار تارتىسى مەن جيىلىكتەر ءۇشىن كۇرەس بولسا، ينتەرنەت جەتكىزۋ سالاسىندا - وربيتالىق سپۋتنيك وپەراتورلارى قاتىساتىن ۇلكەن باسەكەگە تولى نارىققا كەز بولدىق. ەڭ ءىرى وپەراتور - Starlink، سونىمەن قاتار AST Mobile موبيلدى وپەراتورلارمەن جۇمىس ىستەۋدى باستادى. مەنىڭ ويىمشا، جاڭا زاڭنامالىق شارالار قازىر وتە ماڭىزدى، ءبىز نارىقتاعى تاريحي قاتەلىكتەردى قايتالاماۋىمىز كەرەك، - دەپ اتاپ ءوتتى ەسەكەيەۆ.

وسىعان بايلانىستى ق. ەسەكەيەۆ رەتتەۋشى ورگانداردى شەتەلدىك كومپانيالاردى ەلدە لوكاليزاتسيالاۋ ماسەلەسىنە ەرەكشە نازار اۋدارۋعا شاقىردى.

- ەگەر ولار لوكاليزاتسيالانباسا، ءبىزدىڭ نارىق اۆتوكولىك نارىعى سياقتى لىق تولادى. قازىر قىتايدا قانشاما ءوندىرۋشى بارىن كورىپ وتىرسىزدار، قىتايدىڭ شامامەن ءۇش ءىرى سپۋتنيك كومپانياسى بار، ولار وربيتاعا 15-20 مىڭداي سپۋتنيك ورنالاستىرۋدى جوسپارلاپ وتىر. بۇل نارىقتىڭ قۇرىلىمىن ايتارلىقتاي وزگەرتەتىنى انىق، - دەپ تۇيىندەدى ول.

بۇعان دەيىن قازاقستان پويىزدارىندا ينتەرنەت قاشان پايدا بولاتىنى حابارلانعان ەدى.

اۆتور

ايجان سەرىكجان قىزى

سوڭعى جاڭالىقتار