قىتاي ەسكى كولىكتەر مەن تۇرمىستىق تەحنيكانى جاڭاسىنا ايىرباستاۋ باعدارلاماسىن قولعا الدى

استانا. KAZINFORM - قىتاي بيلىگى ەسكى كولىكتەر مەن تۇرمىستىق تەحنيكانى جاڭاسىنا ايىرباستاۋ باعدارلاماسىن قولعا الدى. بۇل تۋرالى قىتايدىڭ ساۋدا ءمينيسترى ۋاڭ ۋىنتاۋ «ەكى سەسسيا» بارىسىندا وتكەن بريفينگىدە ءمالىم ەتتى.

- بيىل تۇتىنۋدى ىنتالاندىرۋدىڭ تاعى ەكى نەگىزگى مىندەتى بار، ولاردىڭ ءبىرى - اۆتوموبيلدەردى، تۇرمىستىق تەحنيكانى، ءۇي مەن اس ءۇي جيھازدارىن جانە باسقا دا تۇتىنۋ تاۋارلارىن جاڭالارىنا ايىرباستاۋ، ال ەكىنشىسى - قىزمەتتەردى تۇتىنۋدى ىنتالاندىرۋ، - دەدى ۋاڭ ۋىنتاۋ.

ونىڭ ايتۋىنشا، قىتايدىڭ اۆتوموبيل، تۇرمىستىق تەحنيكا جانە ءۇي جيھازدارى نارىعى وتە ۇلكەن، ءبىراق ونىمدەردىڭ ايتارلىقتاي بولىگى قازىردىڭ وزىندە ەسكىرگە. بۇل جوعارى ەنەرگيا تۇتىنۋعا جانە ايتارلىقتاي شىعارىندىلارعا اكەلەدى. سونىمەن قاتار بۇل ونىمدەردىڭ كەيبىرەۋلەرى ۇزاق ۋاقىت پايدالانۋ سالدارىنان قاۋىپسىزدىككە قاۋىپ توندىرەدى.

2013-2023 -جىلدار ارالىعىندا تۇرعىنداردىڭ جان باسىنا شاققانداعى قىزمەتتەردى تۇتىنۋ شىعىنى 39,7-دەن %45,2- عا دەيىن ءوستى.

2023-جىلى قىتايداعى جاڭا كولىكتەردىڭ ساتىلىمى العاش رەت 30 ميلليون بىرلىكتەن استى، بۇل وتكەن جىلمەن سالىستىرعاندا %12- عا ارتىق. ەلدەگى ەسكى كولىك ساۋداسىنىڭ كولەمى 18,41 ميلليون داناعا (%15+) جەتتى.

قىتايداعى كولىك يەلەرىنىڭ سانى 340 ميلليونعا جەتتى، بۇل كورسەتكىش بويىنشا قىتاي الەمدە ءبىرىنشى ورىندا تۇر.

توڭازىتقىش، كىر جۋعىش ماشينالار جانە كونديتسيونەر سياقتى تۇرمىستىق تەحنيكانىڭ نەگىزگى ساناتتارىنىڭ سانى 3 ميلليارد بىرلىكتەن اسادى. ساۋدا مينيسترلىگىنىڭ مالىمەتىنشە، كەيبىر تۇرمىستىق تەحنيكا 10-20 جىلدان استام قولدانىستا بولعان.

بۇعان دەيىن قىتاي حالىق رەسپۋبليكاسىنىڭ ساۋدا مينيسترلىگى 2024-جىلدى «تۇتىنۋدى ىنتالاندىرۋ جىلى» دەپ جاريالاۋدى ۇسىنعان بولاتىن.

اۆتور

ەركەجان سماعۇلوۆا