قىتاي ەۋروپارلامەنتتىڭ بەس دەپۋتاتىنا سالىنعان سانكسيالاردى الىپ تاستادى

استانا. KAZINFORM - قىتاي بيلىگى ەۋروپارلامەنتتىڭ بەس دەپۋتاتى مەن ولاردىڭ وتباسىلارىنا قاتىستى سالىنعان سانكسيالاردى الىپ تاستاۋ تۋرالى شەشىم قابىلدادى، دەپ حابارلايدى ت ا س س.

بۇل ەۋروپا وداعى مەن قىتاي اراسىنداعى پارلامەنتتىك ديالوگتى قايتا جانداندىرۋعا جول اشادى. بۇل تۋرالى ەۋروپارلامەنتتىڭ رەسمي مالىمدەمەسىندە ايتىلدى.

- بۇگىن ەۋروپارلامەنت ءتوراعاسى روبەرتا مەتسولا ەپ- دەگى ساياسي فراكسيالاردىڭ باسشىلارىن قىتاي بيلىگىنىڭ سانكسيالاردى الىپ تاستاۋ جونىندەگى شەشىمى تۋرالى حاباردار ەتتى، - دەلىنگەن قۇجاتتا.

مالىمدەمەدە بۇل قادام ەۋروپا وداعى مەن قىتاي اراسىنداعى پارلامەنتتىك ديالوگتى قايتا باستاۋعا مۇمكىندىك بەرەتىنى ايتىلعانىمەن، ەۋروپارلامەنت قىتايمەن اراداعى كۇردەلى ماسەلەلەردى ەلەمەۋگە نيەتتى ەمەس ەكەنىن دە اتاپ ءوتتى.

- ەۋروپارلامەنت دەپۋتاتتارى ەندى قىتايلىق ارىپتەستەرىمەن ەۋروپانىڭ مۇددەلەرى تۋرالى سالدارىنان قورىقپاي اشىق تالقىلاي الادى. قىتايمەن قارىم-قاتىناسىمىز كۇردەلى جانە كوپقىرلى بولىپ قالا بەرەدى. مۇنداي جاعدايلاردا ەڭ ءتيىمدى جول، ءوزارا ارەكەتتەستىك پەن ديالوگ، - دەدى روبەرتا مەتسولان.

مالىمدەمەدە سانكسيالاردىڭ ناقتى قاي كۇننەن باستاپ جويىلاتىنى كورسەتىلمەگەن.

قىتاي 2021 -جىلعى 22-ناۋرىزدا ەۋروپارلامەنتتىڭ بەس دەپۋتاتىنا جانە ە پ- تىڭ ادام قۇقىقتارى جونىندەگى قوسالقى كوميتەتىنە سانكسيالار ەنگىزىپ، اتالعان دەپۋتاتتاردىڭ قىتاي اۋماعىنا كىرۋىنە تىيىم سالعان بولاتىن.

بۇل قادامعا جاۋاپ رەتىندە ەۋروپا وداعى قىتايمەن بارلىق پارلامەنتتىك ىنتىماقتاستىق ءتۇرىن توقتاتتى.

ايتا كەتەلىك ا ق ش يران مەن قىتاي كومپانيالارىنا سانكتسيا سالعان ەدى.