قىتاي قازاقستاندىق اۋىل شارۋاشىلىعى ونىمدەرىنىڭ ەكسپورتىن ارتتىرۋعا مۇددەلى

استانا. KAZINFORM - ق ر اۋىل شارۋاشىلىعى ءمينيسترى ايداربەك ساپاروۆ ق ح ر-نىڭ قازاقستانداعى توتەنشە جانە وكىلەتتى ەلشىسى جان شياۋمەن كەزدەستى.

ق ر اۋىل شارۋاشىلىعى مينيسترلىگىنىڭ حابارلاۋىنشا، تاراپتار قوس مەملەكەت اراسىنداعى ىنتىماقتاستىعىن ودان ءارى دامىتۋ مۇمكىندىكتەرىن تالقىلادى.

مينيستر اۋىل شارۋاشىلىعى سالاسىنداعى ىنتىماقتاستىق قازاقستان- قىتاي قارىم-قاتىناستارىنىڭ ماڭىزدى قۇرامداس بولىگى ەكەنىن، بۇل ەلدەر اراسىنداعى اۋىل شارۋاشىلىعى ونىمدەرىنىڭ ساۋداسىنا وڭ سەرپىن بەرەتىنىن اتاپ ءوتتى. 2023 -جىلى ا و ك ونىمدەرىنىڭ تاۋار اينالىمى 1,6 ەسەگە ءوسىپ، 1,3 ميلليارد دوللاردان استى. سونىمەن قاتار، سوڭعى جىلدارى قىتاي حالقىنىڭ ورگانيكالىق جانە ەكولوگيالىق تازا قازاقستاندىق اۋىل شارۋاشىلىعى ونىمدەرىن تۇتىنۋعا سۇرانىسى ارتقان. وتكەن جىلى اسپان استى ەلىنە اۋىل شارۋاشىلىعى ونىمدەرىنىڭ ەكسپورتى 2 ەسەگە ءوسىپ، 1,01 ميلليارد دوللاردى قۇرادى.

«قىتاي نارىعى دا قازاقستاندىق استىقتى ەكسپورتتاۋعا ۇلكەن قىزىعۋشىلىق تانىتىپ وتىر. ءبىز جىل سايىنعى جەتكىزۋ كولەمىن 2 ميلليون تونناعا دەيىن ارتتىرۋ مۇمكىندىگىمىز بار»، - دەدى ايداربەك ساپاروۆ.

اۋىل شارۋاشىلىعى ءمينيسترى چجان سياودان بيىل تاۋارلاردىڭ جاڭا تۇرلەرىن ەكسپورتتاۋ جونىندەگى ەكىجاقتى قۇجاتقا كەلىسۋ مەن قول قويۋدى جەدەلدەتۋگە جاردەم كورسەتۋدى سۇرادى. بۇل - سالقىنداتىلعان ەت، قۇس شارۋاشىلىعى ونىمدەرى، قوسىمشا ونىمدەر، قىزىلشا جانە كارتوپ ونىمدەرى.

سونداي-اق، ايداربەك ساپاروۆ قىتايعا ەكسپورتتاۋ ءۇشىن مال شارۋاشىلىعى ونىمدەرىن وندىرەتىن جاڭا قازاقستاندىق كاسىپورىنداردى اككرەديتتەۋ ماسەلەسىن شەشۋدە دە ەلشىنىڭ كومەگى قاجەت ەكەندىگىن جەتكىزدى.

ايداربەك ساپاروۆ قىتاي ۇكىمەتىنە اۋىل شارۋاشىلىعى ونىمدەرىنىڭ ساپاسىن تەكسەرۋگە ارنالعان زەرتحانالىق جابدىقتاردى بەرۋگە كەلىسكەنى ءۇشىن العىسىن ءبىلدىردى. قازاقستان قىتاي تاراپىمەن بىرلەسىپ، ونى ەلگە تەزىرەك جەتكىزۋ ماقساتىندا جابدىقتى بەرۋ تەتىكتەرىن تالقىلاۋعا دايىن.

سونداي-اق، ا ش م باسشىسى قىتايلىق كاسىپكەرلەردى اۋىل شارۋاشىلىعى ونىمدەرى مەن ازىق-تۇلىك ونىمدەرىن ءوندىرۋ جانە تەرەڭ وڭدەۋ، ونىڭ ىشىندە وندىرىستىك كووپەراتسيا قاعيداتتارى بويىنشا بىرلەسكەن جوبالار ۇيىمداستىرۋعا شاقىردى.

ءمينيستردىڭ ايتۋىنشا، قازاقستان ۇكىمەتى بىرلەسكەن جۇمىس ءۇشىن جاعداي جاسايتىن بولادى.

ءوز كەزەگىندە جان شياۋ مينيسترگە قىتاي قازاقستاننان ەت، استىق جانە وزگە دە اۋىل شارۋاشىلىعى ونىمدەرىن ۇزدىكسىز يمپورتتاۋدى قامتاماسىز ەتۋ بويىنشا ىنتىماقتاستىققا دايىن ەكەنىن ايتتى. قىتاي نارىعىنىڭ كولەمىن ەسكەرە وتىرىپ، قازاقستاننان كەلەتىن يمپورتتى ۇلعايتۋدىڭ مۇمكىندىگى زور ەكەنىن جەتكىزدى.

بۇدان بولەك، ق ح ر ا و ك سالاسىنداعى ىنتىماقتاستىق جونىندەگى كىشى كوميتەتتى قۇرۋ جونىندەگى جۇمىستى باقىلاۋعا الۋدى ۇسىنادى. پلاتفورما تۇراقتى نەگىزدە بىرلەسكەن ساپارلاردى ۇيىمداستىرۋعا جانە اۋىل شارۋاشىلىعى سالاسىنىڭ وزەكتى ماسەلەلەرى بويىنشا ق ر جانە ق ح ر ۋاكىلەتتى ۆەدومستۆولارى اراسىندا تۇراقتى تىكەلەي بايلانىستار ورناتۋعا مۇمكىندىك بەرەدى. جارعىنىڭ جوباسى ازىرلەندى جانە قىتاي تاراپى وعان مامىر ايىندا قازاقستاندا وتەتىن شىۇ- عا قاتىسۋشى ەلدەر مينيسترلەرىنىڭ كەڭەسىندە قول قويۋدى ۇسىندى. جان شياۋ سونىمەن قاتار س ق و-دا جاڭا تەحنولوگيالارمەن جابدىقتالعان زاماناۋي ەت كومبيناتىن سالۋ تۋرالى ۇسىنىس جاسادى.

كەزدەسۋ سوڭىندا قوس تاراپ كەلىسسوزدەر قازاقستان مەن قىتاي اراسىنداعى اۋىل شارۋاشىلىعى سالاسىنداعى ىنتىماقتاستىقتى ودان ءارى نىعايتۋعا سەپتىگىن تيگىزەتىنىنە سەنىم ءبىلدىردى.