قىتاي «قاسقىر-روبوتتى» ىسكە قوستى
استانا. قازاقپارات- 2029 -جىلعا قاراي جاساندى ينتەلەكتىنىڭ اقىلى ادامنان اسپاسا، كەم تۇسپەۋى مۇمكىن. عالىمدار وسىلاي دەپ وتىر. وسىعان دەيىن بۇل جۇيە ادامنىڭ ورنىن الماستىرا المايدى دەگەن پىكىرلەر ايتىلاتىن.
دەگەنمەن عالىمداردىڭ بولجامى سيفرلى عالام ادامزات تۇرمىسىنا دەندەپ ەنىپ كەلە جاتقانىن كورسەتەدى.
قىتاي «قاسقىر-روبوتتى» ىسكە قوستى
قىتاي قاسقىر-روبوت جاساپ شىعاردى. بۇل ەڭ جىرتقىش اڭ ەكەنى بەلگىلى. جەتى قاراڭعى تۇندە انىق كورەدى. ساققۇلاق. ودان قالدى 200 ميلليون ءيىستى اجىراتا الادى. قىتايلار قاسقىردىڭ وسى قابىلەتتەرىن ەسەپكە العان بولۋى كەرەك. جاي روبوت ەمەس، جاۋىنگەر روبوتتار جاساپ شىقتى. ەگەر سىناقتان ءساتتى وتسە، قورعانىس سالاسىندا قولدانادى.
ءتورت اياقتى قۇلتەمىر، ارنايى بارلاۋ قۇرالدارىمەن جابدىقتالعان. سۋىق قارۋمەن قارۋلانعان. بولاشاقتا بۇل روبوتتار تەك اسكەري ماقساتتا ەمەس، ءورت ءسوندىرۋ، ونەركاسىپ جانە حيميالىق كاسىپورىنداردى تەكسەرۋ، جالپى ادام ءۇشىن ەڭ قاۋىپتى سالالاردا پايدالانىلماق.
ليۋ چجە، China South Industries Group Corporation وكىلى:
- بۇل بولات جاۋىنگەرلەر ءوزارا ارەكەتتەسۋدىڭ كۇشتى مۇمكىندىكتەرىنە يە جانە ءارتۇرلى جاعدايلاردا، سونىڭ ىشىندە قالا كوشەلەرىندە، زاۋىتتاردا جانە شاحتالاردا كۇردەلى ميسسيالاردى ورىنداي الادى. ورتالىق باسقارۋ قۇرالىمەن بىرگە بۇكىل وترياد ەكى شاقىرىمعا دەيىن جەتەدى، ال باتارەيانىڭ قىزمەت ەتۋ مەرزىمى - ءۇش ساعات.
قازىردە قىتاي ۇشاتىن اۆتوموبيل شىعاراتىن زياتكەرلىك بازا قۇرىپ جاتىر. ول جوسپارعا سايكەس 2025 -جىلدىڭ ەكىنشى جارتىسىندا اياقتالادى. ال ولاردى جاپپاي ءوندىرۋ جانە تۇتىنۋشىلارعا جەتكىزۋ 2026 -جىلى باستالادى.
AGI كەلە جاتىر
يلون ماسك 2025 -جىلى، ال جاساندى ينتەللەكت سالاسىنداعى كەي ساراپشىلار 2029 -جىلعا قاراي اقىلى ادامنان كەم تۇسپەيتىن جاساندى سانا اگەنتى پايدا بولادى دەپ بولجايدى. ياعني AI- دان AGI- عا قادام باسۋ.
بۇل ەكەۋىنىڭ ايىرماشىلىعى نەدە؟
ايتالىق: قازىرگى جي (AI) مودەلدەرى ءبىر سالادا عانا جۇمىس ىستەيدى. ChatGPT ماتىندىك ۇلگىلەر جاسايدى، Dall-E نەمەسە Midjourney عاجاپ بەينەلەر، سۋرەتتەر جاساۋعا ارنالعان، Wix سياقتى كومپانيالار جي- ءدى ۆەب- ديزاين ءۇشىن پايدالانادى. ال جالپى ماقساتتاعى جاساندى ينتەللەكت (AGI) - بۇل ادام سياقتى ءبارىن جاساي الاتىن گيپوتەتيكالىق باعدارلاما. ول جاڭا داعدىلار مەن جاعدايلارعا بەيىمدەلىپ، ادامنىڭ قاتىسۋىنسىز ءوز بەتىنشە ۇيرەنە الادى جانە ادام ساناسىن تۇسىنە الادى.
«قازىردە كوپتەگەن جاساندى ينتەللەكت (AI) بەلگىلى ءبىر تاپسىرما ءۇشىن جاسالعان. ال جالپى جاساندى ينتەللەكت (AGI) - كوگنيتيۆتى تاپسىرمالاردىڭ كەڭ اۋقىمىن ادام سياقتى ورىنداي الاتىن نەمەسە ادامنان دا اسىپ تۇسەتىن جۇيە. جاساندى ينتەللەكت سالاسىندا نانوتەحنولوگيا ادام ميىن كومپيۋتەرلەرمەن بايلانىستىرۋ، ولاردىڭ اراسىندا ۇزدىكسىز ينتەرفەيس قۇرۋ ماسەلەسى ماڭىزدى ءرول اتقارادى»، - دەيدى رەيموند كۋرتسۆەيل، امەريكالىق ونەرتاپقىش، جاساندى ينتەللەكت سالاسىنداعى عالىم.
Statista: الەمدىك AI نارىعى قارقىندى دامىپ كەلەدى
گەرمانيانىڭ Statista اناليتيكالىق كومپانياسىنىڭ بولجامىنا سايكەس جاساندى ينتەللەكتىگە نەگىزدەلگەن باعدارلامالار مەن جوبالاردىڭ الەمدىك نارىعى جىل سايىن %28- كە ءوسىپ وتىر. ال عاسىر ورتاسىنا قاراي بۇل كورسەتكىش %57- كە جەتۋى مۇمكىن.
AI تەحنولوگيالارىن دامىتۋ بويىنشا الەمدىك كوشباسشى - ا ق ش. جاساندى ينتەللەكتى دامىتۋعا سالىنعان ينۆەستيتسيالاردىڭ ەڭ كوپ كولەمى وسى ەلگە تيەسىلى. بىلتىرعى جىلدىڭ قورىتىندىسى بويىنشا بۇل سوما 328 ميلليارد دوللاردان استى. ا ق ش مۇنداي جەتىستىككە ءىرى كومپانيالاردىڭ، Google, Facebook, Amazon جانە Microsoft-تىڭ ارقاسىندا قول جەتكىزدى. ىزدەۋ جۇيەلەرى، ۇسىنىس الگوريتمدەرىنەن باستاپ اۆتونومدى كولىك قۇرالدارى مەن مەديتسينالىق تەحنولوگيالارعا دەيىنگى كوپتەگەن ونىمدەر قولدانىسقا ەندى.
جاپونيا جي ەنگىزۋگە $225 ميلليارد جۇمسايدى
جاپونيا دا جاساندى ينتەللەكت تەحنولوگياسىن بەلسەندى تۇردە ەنگىزىپ كەلەدى. ەل بيلىگى «قوعام 5.0» الەۋمەتتىك- ەكونوميكالىق جانە مادەني تۇجىرىمداماسىن ۇستانادى. ول ءومىردىڭ بارلىق سالالارىندا سيفرلىق تەحنولوگيالاردى قولدانۋعا نەگىزدەلگەن. مۇندا AI تەحنولوگيالارىن دامىتۋ سالاسىنداعى عىلىمي زەرتتەۋلەر مەن يننوۆاتسيالارعا سالىنعان ينۆەستيتسيا كولەمى 8 ميلليارد دوللارعا تەڭ. كەلەسى بەس جىل ىشىندە جاپونيا ءتۇرلى عىلىمي- زەرتتەۋ جانە تاجىريبەلىك- كونسترۋكتورلىق باعدارلامالارعا 225 ميلليارد دوللار جۇمساۋدى جوسپارلاپ وتىر.
24.kz
