قىتاي مىڭنان استام ا ق ش كاسىپورنىن كەدەندىك تىركەۋدەن شىعاردى

استانا. KAZINFORM - قىتايدىڭ باس كەدەن باسقارماسى 16-ناۋرىز كۇنى ا ق ش-تىڭ 1000-نان استام ەت وڭدەۋ كاسىپورنىنىڭ قىتايعا ازىق-تۇلىك ەكسپورتتاۋ بويىنشا كەدەندىك تىركەۋىنىڭ كۇشىن جويدى.

بۇل شارا ا ق ش ەت ونىمدەرىنىڭ قىتايعا ەكسپورتتالۋىنا ايتارلىقتاي اسەر ەتۋى مۇمكىن، دەپ حابارلايدى Lianhe Zaobao باسىلىمى.

قىتاي باس كەدەن باسقارماسىنىڭ رەسمي سايتىنداعى مالىمەتكە سايكەس، ا ق ش-تىڭ شوشقا، سيىر جانە قۇس ەتىن وندىرەتىن كاسىپورىندارىنىڭ، سونىڭ ىشىندە Tyson Foods ،Smithfield جانە Cargill سياقتى ءىرى وندىرۋشىلەردىڭ كەدەندىك تىركەۋ مارتەبەسى «جارامسىز» بولىپ وزگەرگەن.

بۇل كاسىپورىندار 5 جىل بۇرىن ا ق ش پەن قىتاي اراسىنداعى ساۋدا كەلىسىمىنە سايكەس قىتايعا ەت ونىمدەرىن ەكسپورتتاۋعا رۇقسات العان بولاتىن. الايدا قىتاي بيلىگى شەتەلدىك ازىق-تۇلىك ەكسپورتتاۋشىلارعا ەل اۋماعىندا ساۋدا جاساۋ ءۇشىن كەدەندىك تىركەۋدەن ءوتۋدى قوسا مىندەتتەيدى.

باسىلىمنىڭ جازۋىنشا، ا ق ش كاسىپورىندارىنا بايلانىستى كەدەندىك تىركەۋدىڭ شامامەن ۇشتەن ەكىسىنىڭ مەرزىمى اياقتاعان، بۇل ءتيىستى كومپانيالاردىڭ قىتاي نارىعىنا كىرۋىن شەكتەۋى، سونداي-اق ەكىجاقتى ساۋداعا اۋىر شىعىن اكەلۋى ىقتيمال.

ا ق ش اۋىل شارۋاشىلىعى مينيسترلىگى قىتايدىڭ باس كەدەن باسقارماسىنا ءتيىستى كاسىپورىنداردىڭ تىركەۋ مەرزىمىن ۇزارتۋ تۋرالى بىرنەشە مارتە سۇرانىس جىبەرگەن، الايدا قىتاي تاراپى جاۋاپ بەرمەگەن.

بيىلعى اقپان ايىندا ا ق ش-تىڭ 84 كاسىپورنىنىڭ قىتايداعى كەدەندىك تىركەۋىنىڭ مەرزىمى اياقتاعان بولاتىن. دەگەنمەن بۇل كاسىپورىنداردىڭ ونىمدەرى قىتايعا ءالى دە جەتكىزىلىپ جاتىر. ءبىراق سالا ساراپشىلارى بۇل احۋالدىڭ قانشا ۋاقىتقا جالعاساتىنىن ءداپ باسىپ بولجاي الماي وتىر.

2024 -جىلدىڭ قورىتىندىسى بويىنشا، ا ق ش قىتاي ءۇشىن ءۇشىنشى ءىرى ەت جەتكىزۋشى سانالادى. وتكەن جىلى ا ق ش قىتايعا 590 مىڭ توننا ەت ءونىمىن ەكسپورتتاعان، بۇل قىتايدىڭ جالپى ەت يمپورتىنىڭ %9- ى. ا ق ش- تىڭ الدىندا برازيليا مەن ارگەنتينا تۇر.

قىتايلىق كومپانيا روبوت-بالا كۇتۋشىنى جاساپ شىعاراتىنىن جازعان بولاتىنبىز.

اۆتور

ەرلان مازان