قىتاي-ميانما اۋە قاتىناسى جويقىن ءزىلزالادان كەيىن قايتا جانداندى
استانا. KAZINFORM - جويقىن ءزىلزالادان كەيىن توقتاتىلعان قىتايدىڭ كۋنمين قالاسى مەن ميانمانىڭ ماندالاي قالاسى اراسىنداعى اۋە قاتىناسى قالپىنا كەلتىرىلدى، دەپ جازادى شينحۋا.
جەكسەنبى كۇنى قىتايدىڭ وڭتۇستىك-باتىسىنداعى يۋننان پروۆينتسياسىنىڭ اكىمشىلىك ورتالىعى - كۋنمين مەن ميانمانىڭ ماندالاي قالاسى اراسىنداعى ەكى باعىتتاعى اۋە رەيستەرى قايتا باستالدى. بۇل باعىتتاعى قاتىناس ناۋرىز ايىندا ميانمادا بولعان جويقىن ءزىلزالا سالدارىنان ۋاقىتشا توقتاتىلعان بولاتىن.
China Eastern Airlines اۋە كومپانياسىنىڭ يۋننان فيليالىنان حابارلاعانداي، كۋنمين-ماندالاي باعىتى بويىنشا MU2029/MU2030 رەيستەرى Boeing 737 ۇشاعىمەن ورىندالادى. بۇرىنعى جۇمىس كەستەسى ساقتالعان: اپتاسىنا ءتورت رەت - دۇيسەنبى، سارسەنبى، جۇما جانە جەكسەنبى كۇندەرى ۇشادى.
28-ناۋرىزدا ميانمادا ماگنيتۋداسى 7,9 بولاتىن جەر سىلكىنىسى تىركەلگەن ەدى. تابيعي اپات سالدارىنان كوپتەگەن نىسان، سونىڭ ىشىندە ماندالاي اۋەجايىنىڭ ينفراقۇرىلىمى زاقىمداندى. وسىعان بايلانىستى اۋە قاتىناسى ۋاقىتشا توقتاتىلعان ەدى.
China Eastern Airlines كومپانياسى اۋە قاتىناسىنىڭ قالپىنا كەلۋى قىتاي مەن ميانما اراسىنداعى ەكىجاقتى ساۋدا، مادەني-گۋمانيتارلىق بايلانىس، اپاتتان كەيىنگى قالپىنا كەلتىرۋ ىسىندە ىنتىماقتاستىقتى نىعايتۋعا جانە يۋننان پروۆينتسياسىنىڭ وڭتۇستىك-شىعىس ازيامەن بايلانىسىن ودان ءارى بەكەمدەۋگە سەپتىگىن تيگىزەدى دەپ سەنىم ءبىلدىردى.
ايتا كەتەيىك، وڭتۇستىك-شىعىس ازيا ەلدەرى اسسوتسياتسياسى (اسەان) قاڭتار- مامىر ايلارىنىڭ قورىتىندىسى بويىنشا قىتايدىڭ ەڭ ءىرى ساۋدا سەرىكتەسى بولىپ قالدى. بۇل كەزەڭدە قىتاي مەن اسەان اراسىنداعى تاۋار اينالىمى 3,02 تريلليون يۋانعا (شامامەن 422 ميلليارد ا ق ش دوللارىنا) جەتىپ، وتكەن جىلدىڭ سايكەس كەزەڭىمەن سالىستىرعاندا 9,1 پايىزعا ارتتى.
بۇدان بۇرىن 28 -ناۋرىزداعى جويقىن جەر سىلكىنىسىنەن كەيىن جابىلعان يانگون- ماندالاي تەمىرجول جەلىسى مەن ماندالاي حالىقارالىق اۋەجايى 7 -ساۋىردە قايتا اشىلعانىن جازعانبىز.
8 -ساۋىردەگى جاعداي بويىنشا ميانماداعى جەر سىلكىنىسىنەن قازا تاپقاندار سانى 3,5 مىڭنان استى.
