قىتاي مەن ە و ەلەكتروموبيلدەر سالاسىنداعى تاريفتىك داۋلار بويىنشا كونسۋلتاتسيالار وتكىزدى
استانا. KAZINFORM - قىتاي مەن ەۋروپالىق وداق ە و- نىڭ قىتايلىق ەلەكتر كولىكتەرگە قاتىستى جۇرگىزىلىپ جاتقان سۋبسيدارلىققا قارسى تەرگەۋىنە قاتىستى «جان-جاقتى، تەرەڭ جانە سىندارلى» كەڭەستەر وتكىزدى. بۇل تۋرالى ق ح ر ساۋدا مينيسترلىگى تاراتقان حابارلامادا ايتىلعان.
بەلگىلى بولعانداي، ق ح ر ساۋدا ءمينيسترى ۆان ۆەنتاو بەيسەنبى كۇنى بريۋسسەلدە ەۋروپالىق كوميسسيا ءتوراعاسىنىڭ اتقارۋشى ورىنباسارى جانە ساۋدا كوميسسارى ۆالديس دومبروۆسكيسپەن كەزدەسىپ، قىتايلىق ەلەكتر كولىكتەرىن سۋبسيديالاۋ ماسەلەسىن تالقىلادى.
كەزدەسۋ بارىسىندا ەكى تاراپ كەلىسپەۋشىلىكتەردى كونسۋلتاتسيالار ارقىلى شەشۋگە ساياسي ەرىك-جىگەرىن انىق ءبىلدىردى. تاراپتار باعا مىندەتتەمەلەرى بويىنشا كەلىسسوزدەردى ىلگەرىلەتۋدى جالعاستىرۋعا جانە دوستىق ديالوگ پەن كەڭەسۋ ارقىلى ءوزارا قولايلى شەشىمگە قول جەتكىزۋ ءۇشىن كۇش-جىگەرىن اياماۋعا كەلىستى.
«ەۋروكوميسسيا ە و ونەركاسىپتىك كاسىپورىندارىنىڭ رەسمي شاعىمىنسىز سۋبسيدارلىققا قارسى تەرگەۋدى باستادى جانە قابىلدانعان شەشىمدەر «ورىنسىز، نەگىزسىز جانە ادىلەتسىز» بولدى»، - دەپ مالىمدەدى قىتاي حالىق رەسپۋبليكاسىنىڭ ساۋدا مينيسترلىگى.
قىتاي ە و- نى قىتاي، فرانسيا جانە ەۋرووداق باسشىلارى ديالوگ پەن كەڭەسۋ ارقىلى ەكونوميكالىق جانە ساۋدا قايشىلىقتارىن دۇرىس شەشۋ تۋرالى قول جەتكىزگەن ماڭىزدى كونسەنسۋستى جۇزەگە اسىرۋعا جانە قىتايمەن ىمىراعا كەلۋ ءۇشىن بەلسەندى قادامدار جاساۋعا شاقىردى.
