قىتاي مەن ناۋرۋ ديپلوماتيالىق قارىم-قاتىناسىن قالپىنا كەلتىردى
قىتاي. KAZINFORM - قىتاي مەن ناۋرۋ ديپلوماتيالىق قارىم-قاتىناسىن قالپىنا كەلتىردى. سارسەنبى كۇنى دياويۋيتاي مەملەكەتتىك رەزيدەنتسياسىندا ءتيىستى قۇجاتتارعا قول قويۋ ءراسىمى ءوتتى.
سارسەنبى كۇنى قىتايدىڭ سىرتقى ىستەر ءمينيسترى ۆان ي مەن ناۋرۋ سىرتقى ىستەر ءمينيسترى لايونەل اينگيمەا بەيجىڭدە كەلىسسوزدەر جۇرگىزىپ، ارتىنشا تاراپتار «قىتاي حالىق رەسپۋبليكاسى مەن ناۋرۋ رەسپۋبليكاسى اراسىنداعى ديپلوماتيالىق قاتىناستاردى قالپىنا كەلتىرۋ تۋرالى بىرلەسكەن كومميۋنيكەگە» قول قويدى.
- ناۋرۋ رەسپۋبليكاسىنىڭ ۇكىمەتى الەمدە ءبىر عانا قىتاي بار ەكەنىن، قىتاي حالىق رەسپۋبليكاسىنىڭ ۇكىمەتى بۇكىل قىتايدىڭ جالعىز زاڭدى ۇكىمەتى، ال تايۆان قىتاي تەرريتورياسىنىڭ اجىراماس بولىگى ەكەنىن مويىندايدى. ناۋرۋ رەسپۋبليكاسىنىڭ ۇكىمەتى بۇگىننەن باستاپ تايۆانمەن ديپلوماتيالىق قاتىناسىن ءۇزىپ، الداعى ۋاقىتتا ەشقانداي رەسمي قارىم-قاتىناستى دامىتپاۋعا مىندەتتەنەدى. قىتاي حالىق رەسپۋبليكاسىنىڭ ۇكىمەتى ناۋرۋ رەسپۋبليكاسى ۇكىمەتىنىڭ بۇل ۇستانىمىن جوعارى باعالايدى، - دەلىنگەن قۇجاتتا.
24- قاڭتاردان باستاپ ەكى ەل ەلشىلىك دەڭگەيىندەگى ديپلوماتيالىق قارىم-قاتىناستارىن قالپىنا كەلتىردى.
