قىتاي ەلى تاعى ءبىر تەحنولوگيالىق توڭكەرىس جاساۋعا دايىن

تەحنولوگيالىق الپاۋىتتار ادام تارىزدەس (گۋمانويد) روبوتتارعا ۇلكەن ءۇمىت ارتىپ وتىر. ساراپشىلاردىڭ ايتۋىنشا، قىتاي بۇل جارىستا الدەقايدا العا كەتكەن.

CNBC تەلەارناسىنىڭ حابارلاماسىنا سۇيەنگەن Aikyn.kz روبوتوتەحنيكاداعى باسەكەلەستىكتىڭ سەبەپتەرىن تالدايدى.

ينۆەستورلاردىڭ روبوتتارعا دەگەن قىزىعۋشىلىعى ارتىپ كەلەدى. بۇعان امەريكالىق Nvidia مەن Tesla كومپانيالارىنىڭ باتىل مالىمدەمەلەرى مەن جوسپارلارى سەبەپ بولۋدا. الايدا ساراپشىلار ا ق ش كومپانيالارى گۋمانويد روبوتتار نارىعىندا قىتايدان قالىپ قويعانىن مالىمدەۋدە.

قىتاي ەلەكترلى كولىكتەر شىعارۋدا قالاي الەمدىك كوشباسشى بولسا، روبوت شىعارۋدا دا سونداي تابىسقا جەتۋدى كوزدەپ وتىر. گۋمانويدتار - جاساندى ينتەللەكتپەن جابدىقتالعان، سىرتقى ءتۇرى مەن قوزعالىسى ادامعا ۇقسايتىن ماشينالار. ولار ونەركاسىپتەن باستاپ ادامعا قىزمەت كورسەتۋ سالاسىنا دەيىن كەڭ قولدانىلۋى مۇمكىن.

Nvidia باس ديرەكتورى دجەنسەن حۋانگ جاقىندا «امبەباپ روبوتوتەحنيكا ءداۋىرى» باستالعانىن جاريالاپ، كومپانيانىڭ گۋمانويد روبوتتار جاساۋعا ارنالعان جاڭا تەحنولوگيالىق پورتفەلىمەن تانىستىردى.

Tesla-نىڭ Optimus اتتى روبوتى – ا ق ش-تاعى ەڭ ۇزدىك مودەل سانالادى. يلون ماسك بيىل 5000 دانا روبوت ءوندىرۋدى جوسپارلاپ وتىر. بۇل جوسپار ماسكتى ا ق ش-تىڭ باسقا ستارتاپتارىنان - Apptronik پەن Boston Dynamics-تەن وزىپ شىعۋعا كومەكتەسۋى مۇمكىن. ءبىراق وعان قىتاي سياقتى مىقتى قارسىلاسپەن ايقاسۋعا تۋرا كەلەدى.

قىتايلىق Unitree Robotics (حاڭجوۋ) كومپانياسى وتكەن ايدا تۇتىنۋشىلارعا گۋمانويد روبوتتار ساتۋدى باستادى. شاڭحايلىق Agibot (Zhiyuan Robotics) بولسا ولار Optimus سياقتى 5000 دانا روبوت وندىرگەن. ساراپشىلاردىڭ ايتۋىنشا، قىتايلىق BYD ەلەكتروموبيل شىعارۋدا Tesla-نى قۋىپ جەتىپ، باعاسىن تومەندەتىپ جاتقانى سياقتى، روبوتتار نارىعىندا دا ءدال سونداي ديناميكا قايتالانۋى مۇمكىن.

«قىتايدىڭ ەلەكتروموبيل يندۋسترياسىنداعى سياقتى، گۋمانويد روبوتتار سالاسىندا دا توڭكەرىس جاسايتىن الەۋەتى بار. ءبىراق بۇل جولى اسەر تەك ءبىر سالامەن شەكتەلمەي، تۇتاس ەڭبەك نارىعىن وزگەرتەدى»، - دەيدى SemiAnalysis كومپانياسىنىڭ تالداۋشىسى رەيك كنۋحسەن.

Morgan Stanley اقپان ايىنداعى ەسەبىندە قولدانۋ سالاسىنا بايلانىستى گۋمانويد روبوتتاردىڭ قۇنى 10000 نان 300000 ا ق ش دوللارىنا دەيىن بولۋى مۇمكىن دەپ بولجايدى. الايدا قىتايلىق كومپانيالار ارزان ءارى ءتيىمدى ءوندىرىس كولەمىنىڭ ارقاسىندا ا ق ش-تى باعا بويىنشا باسىپ وزدى.

Unitree مامىر ايىندا G1 روبوتىن تۇتىنۋشىلارعا $16000 باعامەن ۇسىندى. سالىستىرۋ ءۇشىن، Tesla-نىڭ Optimus Gen2 مودەلى $20000 شاماسىندا بولۋى مۇمكىن. بۇل باعاعا جەتۋ ءۇشىن دە امەريكالىق كومپانيا ءوندىرىس اۋقىمىن كەڭەيتىپ، زەرتتەۋ شىعىندارىن ازايتىپ، قىتايدىڭ ارزان كومپونەنتتەرىن پايدالانۋى كەرەك.

قاڭتار ايىندا Unitree كومپانياسى روبوتوتەحنيكا سالاسىندا ناعىز سەنساتسيا جاسادى. ونىڭ ون التى H1 گۋمانويد روبوتى اي كۇنتىزبەسى بويىنشا جاڭا جىلدى قارسى الۋ قۇرمەتىنە ۇيىمداستىرىلعان كورسەتىلىمدىك ءبيدىڭ قۇرامىندا ونەر كورسەتتى. بۇل شوۋ ۇلتتىق تەلەديداردان تىكەلەي ەفيردە بەرىلىپ، قىتايدا ۇلكەن قىزىعۋشىلىق تۋدىردى.

Aikyn.kz وسى Unitree كومپانياسىنىڭ G1 روبوتى تۋرالى «امەريكادا روبوت ادامعا قارسى شىعىپ، تاپانشا كەزەنگەن (ۆيدەو)» اتتى ماتەريالدا جازدى.

ساراپشىلار قىتايدىڭ روبوتوتەحنيكا سالاسىندا الدەقايدا وزىپ كەتكەنىن مويىنداۋدا. Morgan Stanley كومپانياسى اقپان ايىنداعى زەرتتەۋىندە سوڭعى بەس جىلدا «گۋمانويد» ءسوزى كەزدەسەتىن پاتەنتتىك وتىنىمدەر بويىنشا قىتاي الەمدە ءبىرىنشى ورىندا ەكەنىن جاريالادى. قىتاي - 5688 پاتەنت، ال ا ق ش - 1483 پاتەنت تىركەلگەن.

Xiaomi سياقتى تەحنولوگيا الىبىنان باستاپ، BYD ،Chery ،Xpeng سياقتى ەلەكتروموبيل وندىرۋشىلەرى - ءبارى دە گۋمانويد روبوتتار جاساۋمەن اينالىسادى.

«ءبىزدىڭ زەرتتەۋلەر قىتايدىڭ گۋمانويدتىق روبوتوتەحنيكادا ەڭ اسەرلى ىلگەرىلەۋدى كورسەتىپ وتىرعانىن دالەلدەيدى. بۇل ستارتاپتاردىڭ تابىستى بولۋىنىڭ سەبەبى: ويلاستىرىلعان جەتكىزۋ تىزبەكتەرى، وندىرىسكە ەنگىزۋ مۇمكىندىكتەرى مەن ۇكىمەتتىڭ مىقتى قولداۋى»، - دەلىنگەن Morgan Stanley جازباسىندا.

2023 -جىلى قىتايدىڭ ونەركاسىپ جانە اقپاراتتىق تەحنولوگيالار مينيسترلىگى روبوت ءوندىرىسىن قولدايتىن نۇسقاۋلىقتار شىعاردى. وندا 2025 -جىلعا دەيىن جاپپاي ءوندىرىستى باستاۋ مىندەتى قويىلعان. BofA Global Research ساراپشىسى مين سيۋن لي:

«قىتاي گۋمانويد روبوتتاردى بولاشاقتا تۋىندايتىن جۇمىس كۇشىنىڭ تاپشىلىعىن جەڭىلدەتۋدىڭ جولى رەتىندە قاراستىرادى. الداعى 3-4 جىلدا ولار زاۋىت جەلىلەرىندە ادام ەڭبەگىن الماستىرادى، كەيىنىرەك قىزمەت كورسەتۋ سالاسىنا دا ەنەدى»، - دەيدى.

جۇمىس تابۋ - قازىردىڭ وزىندە ۇلكەن پروبلەما. بولاشاقتا گۋمانويدتار ونى ودان ءارى كۇردەلەندىرىپ جىبەرەدى.

ماسكتىڭ بولجاۋىنشا، 2025 -جىلى Tesla-دا 1000 نان استام Optimus روبوتى جۇمىس ىستەيدى. ءبىراق قىتاي بۇل جاعىنان دا وزىپ بارادى. BYD جانە Geely زاۋىتتارىندا Unitree-دىڭ گۋمانويد روبوتتارى جۇمىس ىستەي باستاعانىن قىتايدىڭ مەملەكەتتىك مەدياسى حابارلادى.

SemiAnalysis كومپانياسى: «Unitree G1 - قازىرگى تاڭدا نارىقتاعى جۇمىسقا جارامدى جالعىز گۋمانويدتىق روبوت. ونىڭ قۇرامىندا بىردە-ءبىر امەريكالىق كومپونەنت جوق. قىتاي ينتەللەكتۋالدىق روبوتوتەحنيكانى، سونىڭ ىشىندە گۋمانويد روبوتتاردى ەكونوميكالىق پايداعا اينالدىرا الاتىن جالعىز ەل بولىپ وتىر. بۇل ا ق ش ءۇشىن قاۋىپتى - ويتكەنى ول بارلىق باعىتتا ۇتىلىپ جاتىر»، - دەگەن مالىمدەمە تاراتتى.

ساراپشىلاردىڭ ويىنشا، ا ق ش تەز ارادا مىقتى وندىرىستىك بازانى جانداندىرىپ، Tesla جانە باسقا دا كومپانيالار ءۇشىن قاجەت كومپونەنتتەردى قىتايدان ەمەس، «friendshoring» (وداقتاستارمەن بىرلەسىپ شىعارۋ - اۆت. ) ءادىسى بويىنشا باسقا ەلدەردەن تاسىمالداۋى كەرەك.

Bank of America ساراپشىلارىنىڭ ەسەبى بويىنشا 2030 -جىلعا دەيىن الەم بويىنشا جىل سايىن 1 ميلليون گۋمانويد روبوت ساتىلاتىن بولادى. ال 2060 -جىلعا قاراي الەمدە 3 ميلليارد روبوت جۇمىس ىستەيتىن بولادى.