قىتاي ەلى قازاق حالقىنا ەشقاشان جاماندىق جاساعان جوق - توقايەۆ
استانا. KAZINFORM - قىتاي ەلى قازاق حالقىنا ەشقاشان جاماندىق جاساعان جوق. بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭمەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا مەملەكەت باسشىسى قاسىم- جومارت توقايەۆ ايتتى.
«ەڭ الدىمەن شاقىرۋىمدى قابىل الىپ، قازاقستانعا مەملەكەتتىك ساپارمەن كەلگەنى ءۇشىن قادىرلى دوسىم شي جينپيڭگە شىنايى ريزاشىلىعىمدى بىلدىرەمىن. وسى ساپارىڭىز قازاق- قىتاي جىلناماسىنداعى ايتۋلى ءارى تاريحي وقيعا. وعان قوسا بۇل ەكى ەل اراسىنداعى ىنتىماقتاستىقتى جاڭا دەڭگەيگە كوتەرۋگە دەگەن ءسىزدىڭ نيەتىڭىزدىڭ ايقىن كورىنىسى دەپ بىلەمىن. مەن بۇل يگى ۇمتىلىستى تولىقتاي قولدايمىن. قىتاي - ءبىز ءۇشىن تاتۋ كورشى، دوستاس جانە ماڭگىلىك جان- جاقتى ستراتەگيالىق سەرىكتەس مەملەكەت. بۇل ءبىزدىڭ ەلدەرىمىزگە ورتاق قۇندىلىقتار مەن ورتاق ۇستانىم دەپ ايتقىم كەلەدى. ونىڭ تاريحي تامىرى تەرەڭدە جاتقانى ءسوزسىز»، - دەدى قازاقستان پرەزيدەنتى.
مەملەكەت باسشىسى ەجەلدەن ەكى ەلدىڭ حالىقتارى اراسىندا ءوزارا قولداۋ نەگىزىندەگى تىعىز ساۋدا جانە گۋمانيتارلىق بايلانىستار بەلسەندى دامىپ كەلگەنىن باسا ايتتى.
«حالىقتارىمىز ۇلى جىبەك جولى باستاۋ الىپ، تورتكۇل دۇنيەگە تارالعان كيەلى جولدا ىنتىماعى مەن بىرلىگىن جاراستىرعان. تاريح قويناۋىنا ۇڭىلەتىن بولساق، قىتاي ەلى قازاق حالقىنا ەشقاشان جاماندىق جاساعان جوق. ەشقانداي توسقاۋىلدار قويعان ەمەس. جاردەم عانا بەرگەن. ءبىزدىڭ ەلدەرىمىز ءاردايىم تىعىز بايلانىستا جانە دوستىق قارىم- قاتىناستا بولدى. بۇگىن دە سولاي جانە سولاي بولىپ قالا دا بەرمەك. مەن بۇعان كامىل سەنەمىن. ءبىر سوزبەن ءبىز وسى سارا جولدى مىندەتتى تۇردە جالعاستىرامىز. حالىقتارىمىزدىڭ اراسىنداعى سان قىرلى ىنتىماقتاستىقتى بەكەمدەي بەرەمىز. بۇگىنگى كەلىسسوز ناتيجەسى سونىڭ ايقىن دالەلى»، - دەدى قاسىم- جومارت توقايەۆ.
