قىتاي ەكوجۇيەنى ساقتاۋ ءۇشىن وزەن بويىنداعى بوگەتتەردى جويىپ جاتىر
استانا. KAZINFORM - قىتاي چاڭجياڭ دارياسىنىڭ سالاسىندا جۇزدەگەن بوگەت پەن شاعىن سۋ ەلەكتر ستانسيالارىن بۇزدى، دەپ حابارلايدى شينحۋا.
چاڭجياڭ دارياسىنىڭ جوعارعى اعىسىنىڭ ءىرى سالالارىنىڭ ءبىرى - چيشۋي وزەنى باسسەينىندە قىتايلىق بەكىرە مەن باسقا دا سيرەك كەزدەسەتىن بالىق تۇرلەرىنىڭ ميگراتسيا جولدارىن قالپىنا كەلتىرۋ ماقساتىندا جۇزدەگەن بوگەت پەن شاعىن سۋ ەلەكتر ستانسيالارى بۇزىلدى.
چيشۋي وزەنى يۋننان، گۋيجوۋ جانە سىچۋان پروۆينسيالارى ارقىلى اعىپ وتەدى جانە ۇلتتىق تابيعي قورىق اۋماعىنا كىرەدى. الايدا الدىڭعى جىلدارى بۇل اۋماقتا گيدروتەحنيكالىق نىسانداردىڭ جاپپاي سالىنۋى بيولوگيالىق ارتۇرلىلىكتىڭ ازايۋىنا الىپ كەلدى. 2022 -جىلى قىتايلىق بەكىرە جابايى تابيعاتتا جويىلىپ كەتكەن ءتۇر رەتىندە رەسمي تۇردە تانىلدى.
2020 -جىلى باستالعان ەكولوگيالىق قايتا قۇرۋ اياسىندا وزەن ەكوجۇيەسىن قالپىنا كەلتىرۋگە باعىتتالعان اۋقىمدى باعدارلاما جۇزەگە اسىرىلىپ جاتىر. گۋيجوۋ پروۆينسياسى بيلىگىنىڭ مالىمەتىنشە، 2024 -جىلدىڭ سوڭىنا دەيىن 373 شاعىن گ ە س-تىڭ 342 سى جۇمىسىن توقتاتسا، 357 بوگەتتىڭ 300 ى بۇزىلعان.
وتكەن كوكتەمدە عالىمدار قالپىنا كەلتىرىلگەن ورتادا قىتايلىق بەكىرەنىڭ تابيعي جولمەن ۋىلدىرىق شاشۋىن العاش رەت تىركەدى. قىتاي عىلىم اكادەمياسى جانىنداعى گيدروبيولوگيا ينستيتۋتىنىڭ مالىمەتىنشە، سوڭعى دەرەكتەر چيشۋي وزەنى باسسەينىندە سيرەك كەزدەسەتىن بالىقتاردىڭ مەكەندەيتىن ورتاسى مەن كوبەيۋ جاعدايلارىنىڭ قالپىنا كەلە باستاعانىن كورسەتىپ وتىر.
ەكوجۇيەنى جاقسارتۋ جۇمىستارىنا بوگەتتەردى جويۋمەن قاتار، سۋ الماسۋىن قالپىنا كەلتىرۋ، ەكولوگيالىق اعىندى قامتاماسىز ەتۋ جانە نەگىزگى ارنانىڭ سالالارمەن بايلانىسىن كۇشەيتۋ شارالارى دا كىردى. ەڭ ۇلكەن قيىندىق - بالىقتاردىڭ ميگراتسيالىق جولدارىن بوساتۋ بولعان.
سوڭعى مونيتورينگ دەرەكتەرىنە سايكەس، چيشۋي وزەنى باسسەينىندەگى بيولوگيالىق ارتۇرلىلىك تۇراقتى تۇردە ارتىپ كەلەدى. قىتايلىق بەكىرە، ازيالىق ميكسوتسيپرين جانە يانيۋاندىق تۇقى سياقتى سيرەك تۇرلەردىڭ سانى مەن جيىلىگىنىڭ ەداۋىر ارتقانى تىركەلدى.
