قىتاي ەكسپورتى ءوستى: ا ق ش نارىعى قىسقارسا دا، ازيا مەن افريكا باعىتى قارقىن الدى
استانا. KAZINFORM - ا ق ش-قا جەتكىزۋ كولەمىنىڭ تومەندەۋىنە قاراماستان، قىتاي ەكسپورتى ءوسۋ ديناميكاسىن كورسەتىپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى ق ح ر-دىڭ باس كەدەن باسقارماسىنا سىلتەمە جاساپ.
دۇيسەنبى كۇنى جاريالانعان كەدەن مالىمەتتەرىنە سايكەس، ماۋسىم ايىندا قىتاي ەكسپورتى وتكەن جىلدىڭ وسى كەزەڭىمەن سالىستىرعاندا %7,2 عا ءوستى، ال يمپورت %2,3 عا ارتتى.
سىرتقى ساۋدا سەرىكتەستەرى اراسىندا ەڭ ۇلكەن ءوسىم اسەان ەلدەرىمەن (وڭتۇستىك- شىعىس ازيا مەملەكەتتەرىنىڭ قاۋىمداستىعى) ساۋدادا تىركەلدى - %9,6 (شامامەن 513,4 ميلليارد دوللار) . ودان كەيىنگى ورىنداردا:
ەۋروپالىق وداق - %3,5 (شامامەن 395,1 ميلليارد دوللار)،
وپوپ (ءبىر بەلدەۋ - ءبىر جول باستاماسىنا قاتىسۋشى مەملەكەتتەر) - %4,7 (شامامەن 1,58 تريلليون دوللار)،
افريكا ەلدەرى - %14,4 (شامامەن 165,3 ميلليارد دوللار) وسىممەن.
سونىمەن بىرگە، قۇراما شتاتتارمەن تاۋار اينالىمى %9,3 عا ازايىپ، 2,08 تريلليون يۋاندى (291,3 ميلليارد دوللار) قۇرادى.
باسقارما وكىلدەرى سىرتقى ساۋدا قۇرىلىمىندا وڭ وزگەرىستەردى دە اتاپ ءوتتى: جوعارى تەحنولوگيالى ونىمدەردىڭ ۇلەسى %9,2 عا ارتسا، قىتايلىق برەندتەردىڭ ەكسپورتتاعى ۇلەسى %32,4 عا جەتكەن.
التى ايلىق ناتيجەلەردى قورىتىندىلاعان ق ح ر باس كەدەن باسقارسى باسشىسىنىڭ ورىنباسارى ۆاڭ لينجيۋن قىتايدىڭ سىرتقى ساۋدانى تۇراقتى دامىتۋعا قاجەتتى بارلىق رەسۋرستارى مەن مۇمكىندىكتەرى بار ەكەنىن اتاپ ءوتتى. ول نەگىزگى فاكتورلار رەتىندە نارىق قۇرىلىمىنىڭ ءارتاراپتاندىرىلۋىن، جوعارى يننوۆاتسيالىق دەڭگەيدى، ءونىمنىڭ باسەكەگە قابىلەتتىلىگىن جانە ەكسپورتقا باعىتتالعان كاسىپورىنداردىڭ يكەمدىلىگىن اتادى.
