قىتاي ك ح د ر-مەن ستراتەگيالىق ۇيلەستىرۋدى نىعايتۋعا دايىن
بەيجىڭ. KAZINFORM - قىتاي ءتوراعاسى شي جينپيڭ قىتايدىڭ قازىرگى جاعدايدا سولتۇستىك كورەيامەن ستراتەگيالىق ۇيلەستىرۋدى كۇشەيتۋگە دايىن ەكەنىن مالىمدەدى.
بۇل تۋرالى قىتاي سىرتقى ىستەر مينيسترلىگىنىڭ سايتىندا جاريالانعان شي جينپيڭ ك ح د ر كوشباسشىسى كيم چەن ىنعا ەلدەر اراسىنداعى ديپلوماتيالىق قارىم-قاتىناستاردىڭ ورناعانىنا 75 جىل تولۋىنا وراي جولداعان قۇتتىقتاۋ جەدەلحاتىندا ايتىلعان.
«قازىرگى جاعدايدا قىتاي ك ح د ر-مەن ەكى ەل اراسىنداعى ديپلوماتيالىق قارىم-قاتىناستىڭ 75 جىلدىعىن ستراتەگيالىق ۇيلەستىرۋدى نىعايتۋ، دوستىق قارىم-قاتىناس پەن ىنتىماقتاستىقتى تەرەڭدەتۋ جانە قىتاي مەن ك ح د ر اراسىنداعى ءداستۇرلى دوستىقتىڭ جاڭا تاراۋلارىن جازۋدى جالعاستىرۋ مۇمكىندىگى رەتىندە قابىلداۋعا دايىن»، - دەپ كەلتىرەدى قىتاي سىرتقى ىستەر مينيسترلىگىنىڭ سايتى شي جينپيڭنىڭ ءسوزىن.
قىتاي كوشباسشىسىنىڭ اتاپ وتۋىنشە، سوڭعى 75 جىلدا «ەكى ەل حالىق بيلىگىن نىعايتۋ جانە ۇلتتىق ەگەمەندىكتى قورعاۋ جولىنداعى كۇرەستە ءبىر-ءبىرىن قولداپ، ايماقتىق بەيبىتشىلىك پەن تۇراقتىلىقتى دامىتۋ جانە حالىقارالىق ادىلەتتىلىكتى قامتاماسىز ەتۋدە تىعىز ىنتىماقتاستىقتا بولعان».
بۇعان دەيىن قىتاي الەمدەگى ەڭ ۇلكەن «يادرولىق پارككە» اينالۋدى جوسپارلاپ وتىرعانى حابارلانعان بولاتىن. بۇگىندە ەلدە قۋاتى 58 گ ۆ ت بولاتىن 56 اتوم ەنەرگەتيكالىق بلوگى بار، قۋاتى 30 گ ۆ ت بولاتىن 26 جاڭا رەاكتوردىڭ قۇرىلىسى جۇرگىزىلۋدە. دەگەنمەن، يادرولىق ەنەرگيا قىتايدىڭ جالپى ەلەكتر قۋاتىنىڭ شامامەن %5- ىن عانا قۇرايدى، بۇل الەمدىك ورتاشا كورسەتكىشتەن %10 تومەن.
اۆتور
زارينا تۋعانبايەۆا
