قىتاي جانە ورتا ازيا مەملەكەتتىك باسقارۋ اكادەميالارىنىڭ جەلىسى قۇرىلادى
مەملەكەتتىك باسقارۋ سالاسىن دامىتۋ ماقساتىندا قىتاي جانە ورتا ازيا باسقارۋ اكادەميالارىنىڭ جەلىسىن قۇرۋ جونىندە كەلىسىمگە قول قويىلدى.
بۇل تۋرالى ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ باسپا ءسوز قىزمەتىنەن ءمالىم ەتتى، دەپ حابارلايدى Kazinform.
قىتاي حالىق رەسپۋبليكاسىنىڭ استاناسى بەيجىڭدە «وركەنيەتارالىق بايلانىس جانە جاھاندىق دامۋ» تاقىرىبىنداعى فورۋم ءوتىپ جاتىر. شاراعا قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ اكادەميالىق قىزمەت جونىندەگى ۆيتسە-رەكتورى مارگاريتا قادىروۆا، اكادەميانىڭ قاراعاندى وبلىسى فيليالىنىڭ ديرەكتورى سەرىكجان بايبوسىنوۆ، اقتوبە وبلىسى فيليالىنىڭ ديرەكتورى سايدا ءسادۋاقاسوۆا قاتىسۋدا. فورۋمنىڭ اشىلۋ سالتاناتىندا استانا مەملەكەتتىك قىزمەت حابى باسقارۋشى كوميتەتىنىڭ ءتوراعاسى ءاليحان بايمەنوۆ بايانداما جاسادى.
اكادەميا ۆيتسە-رەكتورى مارگاريتا قادىروۆا فورۋمدا ءسوز سويلەپ، مەملەكەتتىك باسقارۋ سالاسىنداعى قازاقستان مەن قىتاي بايلانىسى تۋرالى بايانداما جاسادى.
«وركەنيەتارالىق بايلانىس جانە جاھاندىق دامۋ فورۋمىندا قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى مەن قىتايدىڭ ۇلتتىق باسقارۋ اكادەمياسى اراسىنداعى سەرىكتەستىك تۋرالى، بولاشاقتا قولعا الىناتىن ورتاق جوبالارىمىز بەن ءبىلىم باعدارلامالارىمىز جايلى بايانداما جاسادىم. سونداي-اق فورۋم اياسىندا كوشباسشىلىقتى دامىتۋ جانە جاڭعىرتۋ باعىتىندا قىتاي جانە ورتا ازيا ديالوگى جۇرگىزىلدى. ەڭ باستى جاڭالىق - بۇگىنگى كەلىسسوزدەر ناتيجەسىندە مەملەكەتتىك باسقارۋ سالاسىن دامىتۋ ماقساتىندا قىتاي جانە ورتا ازيا باسقارۋ اكادەميالارىنىڭ جەلىسىن قۇرۋ جونىندە كەلىسىمگە قول قويىلدى. اتالعان كەلىسىم مەملەكەتتىك قىزمەتشىلەردى وقىتۋ، اكادەميامەن ورتاق زەرتتەۋلەر جۇرگىزۋ، تاجىريبە الماسۋ، ترەنينگتەر وتكىزۋ، جالپى مەملەكەتتى باسقارۋ باعىتىنداعى جوبالاردى ءوزارا سەنىم مەن سىيلاستىق، اشىقتىق قاعيداتتارىنا سۇيەنە وتىرىپ جۇزەگە اسىرۋعا باعىتتالعان»، - دەدى مارگاريتا بولەگەن قىزى.
قىتايدا باسقارۋ اكادەمياسى مەن جوعارى پارتيا مەكتەبى بىرىكتىرىلگەن. اكادەميا رەكتورى ۇكىمەت باسشىسىنىڭ ورىنباسارى بولىپ تابىلدى. اكادەميا قىتاي ەلىنىڭ يدەولوگياسىن قالىپتاستىرۋ مەن ايقىنداۋدا باستى قىزمەت اتقارادى. 20 ميلليون جۋىق مەملەكەتتىك جانە پارتيا قىزمەتكەرلەرى مەن ءىرى مەملەكەتتىك كاسىپورىندار قىزمەتكەرلەرىنىڭ بىلىكتىلىگىن ارتتىرۋ - وسى جوعارى وقۋ ورنىنىڭ تىكەلەي مىندەتى.
