قىتاي حالىقارالىق سيفرلىق يۋان ورتالىعىن اشتى
استانا. KAZINFORM - شاڭحايدا رەسمي تۇردە حالىقارالىق سيفرلىق يۋان وپەراتسيالىق ورتالىعى اشىلدى، دەپ حابارلايدى شينحۋا.
ورتالىقتىڭ اشىلۋى قىتاي حالىق بانكىنىڭ ءتوراعاسى پان گۋنشەننىڭ ماۋسىم ايىندا لۋجياجۋي فورۋمىندا جاريالاعان جاڭا شارالارىنىڭ ءبىر بولىگى. باستاما سيفرلىق يۋاننىڭ ينتەرناتسيوناليزاتسياسىنا جاردەمدەسۋ، قارجى نارىعىن دامىتۋ جانە سيفرلىق تەحنولوگيالارداعى يننوۆاتسيالاردى قولداۋعا باعىتتالعان.
شينحۋا ۋنيۆەرسيتەتىنىڭ ۇلتتىق قارجىلىق زەرتتەۋلەر ينستيتۋتىنىڭ ديرەكتورى تيان سيۋان ورتالىقتىڭ ىسكە قوسىلۋى سيفرلىق يۋاننىڭ دامۋىنداعى ماڭىزدى قادام ەكەنىن اتاپ ءوتتى.
- ورتالىق قىتايدىڭ جاھاندىق قارجى جۇيەسىندەگى ىقپالىن ىلگەرىلەتەدى جانە جاھاندىق ترانسشەكارالىق تولەمدەر جۇيەسىن جەتىلدىرۋ ءۇشىن قىتايدىڭ اشىق، ينكليۋزيۆتى جانە يننوۆاتسيالىق شەشىمىن ۇسىنادى، - دەدى ول.
ورتالىقتىڭ ىسكە قوسىلۋىمەن بىرگە سيفرلىق ترانسشەكارالىق تولەمدەر پلاتفورماسى، بلوكچەين قىزمەتتەرى پلاتفورماسى جانە سيفرلىق اكتيۆتەر پلاتفورماسىن قوسا العاندا، ءۇش نەگىزگى پلاتفورما اشىلدى.
