قىتاي شەتەلدىكتەردىڭ ەلدەن بالا اسىراپ الۋىنا تىيىم سالدى

استانا. KAZINFORM - قىتاي بيلىگى شەتەلدىكتەردىڭ بالا اسىراپ الۋ تاجىريبەسىن توقتاتۋ جونىندە شەشىم قابىلدادى. بەيجىڭ بۇل شەشىمنىڭ نەگە قابىلدانعانىن تۇسىندىرمەدى، تەك ونىڭ حالىقارالىق كەلىسىمدەرگە سايكەس كەلەتىنىن باسا ايتتى، دەپ جازادى BBC.

بەيسەنبى كۇنگى بريفينگتە قىتاي س ءى م وكىلى ماو نين بەيجىڭ بۇدان بىلاي شەتەلدىكتەرگە ەلدە بالا اسىراپ الۋعا رۇقسات بەرمەيتىنىن ايتتى، تەك قانداس تۋىستارى عانا بالا نەمەسە وگەي بالانى اسىراپ الۋى مۇمكىن.

ول مۇنداي شەشىمگە ناقتى تۇسىنىك بەرمەدى، تەك ونىڭ حالىقارالىق كونۆەنتسيالارعا قايشى كەلمەيتىنىن اتاپ ءوتتى.

بەيجىڭ سونىمەن قاتار شەتەلدىك ۇكىمەتتەر مەن وتباسىلارعا قىتايلىق بالالاردى اسىراپ الۋعا دايىن بولعاندارى ءۇشىن العىس ايتتى.

سوڭعى ءۇش ونجىلدىقتا شەتەلدىكتەر كەم دەگەندە 150 مىڭ قىتاي بالاسىن اسىراپ الدى. ونىڭ كوپشىلىگى ا ق ش- قا كەتتى.

امەريكالىق وتباسىلار قىتايدان 82674 بالا اسىراپ الدى - بۇل امەريكالىقتار باسقا كەز كەلگەن ەلدەن اسىراپ العان بارلىق بالالاردان كوپ.

ا ق ش ق ح ر شەشىمىنىڭ قىتايدا بالا اسىراپ الۋ تۋرالى وتىنىشتەرى ءالى قاراستىرىلىپ جاتقان جۇزدەگەن امەريكالىق وتباسىلارعا قالاي اسەر ەتەتىنىن انىقتاۋعا تىرىسىپ جاتىر.

قىتايداعى ا ق ش ديپلوماتتارىمەن تەلەفون ارقىلى سويلەسكەن سوزىندە بەيجىڭ «ەرەكشە جاعداي تارماعىنا جاتاتىنداردى قوسپاعاندا، بۇل وتىنىشتەردى قاي كەزەڭدە بولسا دا قاراۋدى جالعاستىرمايتىنىن» ايتتى.

ا ق ش ەلشىلىگى جازباشا تۇسىنىك الۋ ءۇشىن قىتايدىڭ ازاماتتىق ىستەر مينيسترلىگىنە جۇگىندى.

«ءبىز جۇزدەگەن وتباسى ءالى دە بالا اسىراپ الۋ پروتسەسىنىڭ اياقتالۋىن كۇتىپ جۇرگەنىن تۇسىنەمىز جانە ولاردىڭ جاعدايىنا تۇسىنىستىكپەن قارايمىز»، - دەپ جاۋاپ بەردى مەملەكەتتىك دەپارتامەنت.