قىتاي دارىگەرلەرى جەر سىلكىنىسى كەزىندە كۇردەلى وپەراتسيا جاسادى

استانا. قازاقپارت - قىتايلىق دارىگەرلەر 7 بالدىق جەر سىلكىنىسى كەزىندە كۇردەلى وپەراتسيا جاسادى. اناۋ-مىناۋ ەمەس ناۋقاستىڭ باس سۇيەگىن اشىپ مي حيرۋرگياسىن جۇرگىزگەن.

بۇل جاعداي شىڭجاڭ ولكەسى، اقسۋ ايماعىنىڭ  ارال اۋرۋحاناسىندا بولدى. ءزىلزالا تۋرا پروتسەدۋرا ءجۇرىپ جاتقان كەزدە باستالادى. بۇكىل اۋرۋحانانى تەڭسەگەن دۇمپۋگە قاراماستان اق حالاتتىلار سابىرلىق تانىتىپ، ءوز مىندەتىن جالعاستىرا بەرەدى.

مەديتسينا قىزمەتكەرلەرىنىڭ بۇل ارەكەتى بولمەدەگى بەينەباقىلاۋ كامەراسىنا ءتۇسىپ قالعان. وپەراتسيا ءساتتى اياقتالدى. قازىر ناۋقاستىڭ جاعدايى تۇراقتالىپ، دارىگەرلەردىڭ باقىلاۋىندا.

ايتا كەتۋ كەرەك، اپات سالدارىنان 5 ادام جاراقات الىپ، 3 ادام كوز جۇمدى. تاعى مىڭداعان ادام قاۋىپسىز جەرگە كوشىرىلدى. قازىر ءزىلزالا بولعان اۋماقتا گۋمانيتارلىق ميسسيالار جالعاسىپ جاتىر.

www.24.kz