قىتاي ءتورت كانادالىق ازاماتتى ءولىم جازاسىنا كەستى

استانا. KAZINFORM - كانادا ۇكىمەتى 19-ناۋرىز كۇنى قىتايدا ەسىرتكى تاسىمالى ءۇشىن ءولىم جازاسىنا كەسىلگەن ءتورت كانادالىق ازاماتقا قاتىستى سوت ۇكىمىنىڭ جىل باسىندا ورىندالعانىن مالىمدەدى.

بۇل تۋرالى Lianhe Zaobao حابارلادى.

كانادا سىرتقى ىستەر ءمينيسترى مەلاني جوليدىڭ ايتۋىنشا، ءولىم جازاسى ورىندالعان ءتورت ادام دا قوس ازاماتتىققا يە. ول رەسمي وتتاۆانىڭ ولىمگە بۇيىرىلعان وزگە كانادالىق ازاماتتاردىڭ جازاسىن جەڭىلدەتۋگە كۇش سالاتىنىن ايتتى.

- ءتورت كانادالىق ازاماتقا ءولىم جازاسى ورىندالعانىن قاتاڭ ايىپتايمىز. ولار ەسىرتكىگە قاتىستى قىلمىستارمەن سوتتالعان، - دەدى جولي.

كاناداداعى قىتاي ەلشىلىگى كانادا ۇكىمەتىنىڭ مالىمدەمەسىن «جاۋاپكەرسىزدىك» دەپ جازعىردى. ەلشىلىك تاراتقان مالىمدەمەدە قىتايدىڭ ەسىرتكىگە قاتىستى قىلمىستارعا ءارقاشان قاتاڭ جازا قولداناتىنى جانە بۇل ماسەلەدە «نولدىك توزىمدىلىك» ساياساتىن ۇستاناتىنى باسا ايتىلدى.

سونداي-اق، كانادا سىرتقى ىستەر مينيسترلىگى 2019 -جىلى قىتاي سوتى ەسىرتكى تاسىمالدادى دەپ ايىپتاپ، ءولىم جازاسىنا كەسكەن كانادالىق روبەرت شەللەنبەرگتىڭ ۇكىمى ءالى ورىندالماعانىن راستادى.

باسىلىمنىڭ جازۋىنشا، قىتاي مەن كانادا اراسىنداعى ديپلوماتيالىق بايلانىس 2018 -جىلدان بەرى شيەلەنىسىپ تۇر. سول جىلى ترامپ اكىمشىلىگىنىڭ سۇرانىسى بويىنشا Huawei كومپانياسىنىڭ قارجى ديرەكتورى مەن ۆانچجوۋ ۆانكۋۆەردە ۇستالعان ەدى. بۇعان جاۋاپ رەتىندە قىتاي ەكى كانادالىقتى تۇتقىنعا العان بولاتىن. كەيىن، مەن ۆانچجوۋ مەن كانادالىق ازاماتتار 2021 -جىلى ىركەس-تىركەس بوساتىلدى.

ەسكە سالايىق، بيىل ناۋرىز ايىنىڭ باسىندا قىتاي ۇكىمەتى كانادادان كەلەتىن اۋىل شارۋاشىلىعى جانە ازىق-تۇلىك ونىمدەرىنە قوسىمشا باج سالىعىن ەنگىزگەن بولاتىن.

اۆتور

ەرلان مازان